މަޖިލީހަށް ކުރިން ހުށަހެޅިގެން ކުރިއަށްދާ ޕެޓިޝަނެއްގައި އެޅުމަށް ގޮވާލާފައިވާ ފިޔަވަޅެއް އަލުން އެޅުމަށް އެދި އިތުރު ޕެޓިޝަނެއް ހުށަނޭޅޭނެ ގޮތަށް ރައްޔިތުންގެ މަޖިލީހުގެ ގަވާއިދު އިސްލާހުކުރަން މަޖިލީހުގެ އާންމު ކޮމިޓީން ފާސްކޮށްފި އެވެ.
މަޖިލީހުގެ ގަވާއިދުގެ 257-1 ގެ (ޅ) އުނިކުރަން ހުށަހެޅުއްވީ ފުނަދޫ ދާއިރާގެ މެންބަރު، މުހައްމަދު މަމްދޫހު އެވެ. އެ މާއްދާގައި އޮންނަނީ މައްސަލައަކާ ގުޅިގެން މަޖިލީހަށް ހުށަހަޅާފައިވާ ޕެޓިޝަނެއްގައި އެޅުމަށް ގޮވާލައިފައިވާ ފިޔަވަޅެއް އެޅުމަށް އެދި އިތުރު ޕެޓިޝަނެއް ހުށަނޭޅޭނެ ކަމަށެވެ.
މިއަދު ބޭއްވި މަޖިލީހުގެ އާންމު ކޮމިޓީގެ ބައްދަލުވުމުގައި ފާސްކޮށްފައި ވަނީ 257-1 ގެ (ޅ) އުނިކުރުމުގެ އިތުރުން އެ މާއްދާގެ އަކުރުތައް ތަރުތީބު ކުރުމަށެވެ.
މަޖިލީހުގެ ގަވާއިދަށް މި ބަދަލު ގެންނަން ކޮމިޓީން ފާސްކޮށްފައި މި ވަނީ ކައުންސިލްތަކުން ބަލަހައްޓާ ބިންތައް ސަރުކާރަށް ނެގޭ ގޮތަށް މަޖިލީހަށް ހުށަހަޅާފައިވާ ބިލު ފާސްކުރުމަށް ގޮވާލައި ސަރުކާރު އަޑީގައި އޮވެ ސޮއި ހަމަކުރަން ފެށި ޕެޓިޝަން އޮޅިގެން ކޮމިޓީއަށް ފޮނުވުމުން، އަލުން އެފަދަ ޕެޓިޝަނެއް މަޖިލީހަށް ހުށަހެޅުމުގެ ބޭނުމުގަ އެވެ.
ތަރައްގީގެ މަޝްރޫއުތައް ހިންގުމަށް ޓަކައި ރަށްތަކާއި ސިޓީ ކައުންސިލުތަކުގެ އިހުތިސާސުގައި ހިމެނޭ ބިންތައް މައި ސަރުކާރުން ބޭނުން އިރެއްގައި ނެގޭ ގޮތަށް ލާމަރުކަޒީ ގާނޫނު ބަދަލުކުރުމަށް ރައްޔިތުންގެ މަޖިލީހަށް ހުށަހަޅައިފާ ބިލު އެ އޮތް ގޮތަށް، ފާސްކުރުމަށް ގޮވާލައި ޕެޓިޝަނެއްގައި ސޮއިކުރަން ފެށީ އިއްޔެ އެވެ. އެ މަސައްކަތް ފެށީ ސަރުކާރު އަޑީގައި އޮވެ، ސ. މީދޫ ކައުންސިލްގެ ރައީސް، އަހުމަދު ޝާތިރު ލައްވަ އެވެ.
ލާމަރުކަޒީ ގާނޫނަށް ހުށަހަޅާފައިވާ އިސްލާހު ފާސްކުރަން ގޮވާލައި ސަރުކާރު އަޑީގައި އޮވެ ޕެޓިޝަނެއްގައި ސޮއިކުރަން ފެށީ އެ ބިލާ ދެކޮޅަށް ހުށަހެޅި ޕެޓިޝަނެއްގައި ސޮއި ހަމަކޮށް މަޖިލީހުގެ ތަޅުމާ ހަމައަށް މައްސަލަ ގޮސްފައި ވަނިކޮށެވެ. ސޯޝަލް މީޑިއާ އެކްޓިވިސްޓު މިދުއަމް ސައުދު ހުށަހެޅި ޕެޓިޝަނުގައި އޮތީ އެ ބިލަކީ ލާމަޒުކަޒީ ގާނޫނޫގެ ރޫހާ ހިލާފު ބިލެއް ކަމަށް ބުނެ އެ ބިލު އަނބުރާ ގެންދިޔުމަށް ގޮވާލައިފަ އެވެ.
ނަމަވެސް، ސަރުކާރު އަޑީގައި އޮވެ އިއްޔެ ސޮއިކުރަން ފެށި ޕެޓީޝަން މިހާރު ވަނީ 855 މީހުންގެ ސޮއިއާއެކު ކޮމިޓީއަށް ފޮނުވައިފަ އެވެ. އެނގިފައިވާ ގޮތުގައި އެ ޕެޓިޝަން ކޮމިޓީއަށް ފޮނުވިފައި ވަނީ އޮޅިގެންނެވެ. އެހެންކަމުން، މަޖިލީހުގެ ތަޅުމުގައި އެ ޕެޓިޝަންއާ ބެހޭގޮތުން ބަހުސްކުރުމަށް ލާޒިމުވާ މިންވަރަށް ސޮއި ހަމަކުރުމުގެ ފުރުސަތެއް ދެން ނޯންނާނެ އެވެ.
މަޖިލީހުގެ ގަވާއިދު ބުނާގޮތުން، މަޖިލީހަށް ހުށަހަޅާ ޕެޓިޝަނެއް ކޮމިޓީއަށް ފޮނުވޭނީ މަދުވެގެން 840 މީހުން ސޮއި ކުރުމުންނެވެ. ނަމަވެސް، މަޖިލީހުގެ ތަޅުމުގައި ޕެޓިޝަނަކާ ބެހޭގޮތުން ބަހުސްކުރުމަށް ލާޒިމުވާނީ އެ ޕެޓިޝަންގައި މަދުވެގެން 2100 މީހުން ސޮއިކުރުމުންނެވެ. މަޖިލީހުގެ ތަޅުމުގައި ބަހުސް ކުރަން ލާޒިމުވާ މިންވަރަށް ސޮއި ހަމަކުރާ ނަމަ، ޖެހޭނީ ކޮމިޓީއަށް ނުފޮނުވައި 2100 މީހުންގެ ސޮއި ހަމަކުރާށެވެ.
