ރައްޔިތުންގެ މަޖިލީހުގެ މެންބަރުންނާއި އެ މެންބަރުންގެ އާއިލާތަކަށް ސާކްގެ ގައުމުތަކާއި އާސިއާންގެ ގައުމުތަކުން ހެލްތު އިންޝޫރެންސް ލިބެންޖެހޭ ކަމަށް ބުނާ ގާނޫނުތައް އުވާލައި ހުރިހާ މެންބަރުންނަށް ވެސް އާންމު ރައްޔިތުންނަށް ލިބޭ ގައުމީ ސިއްހީ އިންޝޫރެންސް އެކަނި ލިބޭ ގޮތަށް ހެދުމަށް ގޮވާލައި ޕެޓިޝަނެއްގައި ސޮއިކުރަން ފަށައިފި އެވެ.
މި ޕެޓިޝަން ވެސް ހުށަހެޅީ ސަރުކާރުން ބޭނުންވާ ބަދަލުތައް ހިމަނައި ލާމަރުކަޒީ ގާނޫނަށް ބަދަލު ގެނައުމަށް ހުށަހަޅާފައިވާ ބިލާ ދެކޮޅަށް ޕެޓިޝަން ފެށި ސޯޝަލް މީޑިއާ އެކްޓިވިސްޓު މިދުއަމް ސައުދު އެވެ. މިރޭ ސޮއި ހަމަކުރަން ފެށި ޕެޓިޝަނަށް މިހާތަނަށް ވަނީ 950 އަށްވުރެ ގިނަ ސޮއި ލިބިފަ އެވެ.
"އާންމު ރައްޔިތުންނަށް ނުލިބޭ ސިއްހީ އިންޝުއަރެންސްއެއް އާންމު ރައްޔިތުންގެ ފައިސާއިން އެ އާންމުން ތަމްސީލް ކުރަން މަޖިލީހަށް ވަޑައިގަންނަވާ މެންބަރުންނަށް ދިނުމަކީ ތަސައްރަފު ފުދިފައިވާ އެއްވެސް ސިޔާސީ ނިޒާމެއް ދަންނަ ކަމެއް ނޫން. އަދި ދިވެހިރާއްޖެއަށް ވުރެ އެތައް ގުނައެއް މުއްސަނދި ގައުމުތަކުންވެސް ކުރާ ކަމެއް ނޫން،" އެ ޕެޓިޝަނުގައި ބުނެފައިވެ އެވެ.
ކޮންމެ މެންބަރަކާއި އެ މެންބަރެއްގެ އަނބިމީހާ/ފިރިމީހާ އަދި އުމުރުން 18 އަހަރު ނުފުރޭ ދަރިން ރާއްޖެއާއި ސާކް ގައުމުތަކާއި އަދި އާސިއާންގެ ގައުމުތަކުން ސިއްހީ ފަރުވާ ލިބޭނެ ފަދަ މެޑިކަލް އިންޝުއަރެންސް ސްކީމެއްގައި ބައިވެރި ކޮށްދޭން ވާނެ ކަމަށް ބުނަނީ މެންބަރުން އިމްތިޔާޒުތަކުގެ ގާނޫނުގަ އެވެ. އެއީ ކުރީގެ މެންބަރުންނަށް ވެސް ހެލްތު އިންޝޫރެންސް ލިބޭ ގާނޫނެވެ.
މެންބަރުންގެ މެޑިކަލް އިންޝޫރެންސްގެ މައްސަލައިގައި އަބަދުވެސް އާންމު ރައްޔިތުންގެ ފާޑުކިޔުން އަމާޒުވެ އެވެ. މެންބަރުންނަށް ވަކި ހާއްސަ އިންޝޫރެންސް ސްކީމެއް އޮވެގެން ނުވާނެ ކަމަށް ގިނަ ބަޔަކު ގަބޫލުކުރެ އެވެ.
ލާމަރުކަޒީ ގާނޫނަށް ގެންނަ ބަދަލުތަކާ ދެކޮޅަށް ސޮއިކުރި ޕެޓިޝަން ހުށަހެޅީ 2،300 އަށްވުރެ ގިނަ މީހުން ސޮޔާއެކު އެވެ. އެހެންވެ އެ ޕެޓިޝަން ކުރިއަށް އޮތް ތިން ޖަލްސާގެ ތެރެއިން އެއް ޖަލްސާއަށް އެޖެންޑާ ކުރަން ވަނީ މަޖުބޫރުވެފަ އެވެ.
