މެޑްރިޑް (އޮގަސްޓް 14) - ސައުދީ އަރަބިއްޔާގައި މި ފަހަރުން ބާއްވަމުން އައި ސްޕެނިޝް ސުޕަ ކަޕް ފުޓްބޯޅަ މުބާރާތް އަންނަ އަހަރު ތުރުކީގެ އިސްތަންބޫލްގައި ކުރިއަށް ގެންދަން ނިންމައިފި އެވެ.
ސްޕެއިނުގެ ފުޓްބޯޅަ ފެޑެރޭޝަނުން މި ގޮތަށް ނިންމާފައިވަނީ، އަންނަ އަހަރުގެ ޖެނުއަރީ މަސް ތެރޭގައި ސައުދީ އަރަބިއްޔާ އިން އެ ގައުމުގައި އޭޝިއަން ކަޕް ހޯސްޓްކުރާތީ އެވެ. ސައުދީ އަރަބިއްޔާ އިން އޭޝިއަން ކަޕް ބާއްވަނީ ޖެނުއަރީ 7 އިން ފެށިގެން ފެބްރުއަރީ 5 ވަނަ ދުވަހުގެ ނިޔަލަށެވެ.
އެ ގޮތުން، ސްޕެނިޝް ސުޕަ ކަޕް ކުރިއަށްގެންދަން ރާވާފައިވަނީ، އަންނަ އަހަރުގެ ފެބްރުއަރީ 2-7 އަށް އިސްތަންބޫލުގަ އެވެ. ހަތަރު ޓީމު ކުޅޭ މި މުބާރާތުގެ މެޗުތައް ކުޅޭނީ އިސްތަންބޫލުގެ މަޝްހޫރު އަޓަޓާކް އޮލިމްޕިކް ސްޓޭޑިއަމްގަ އެވެ.
އަންނަ އަަހަރުގެ ސުޕަ ކަޕް، ތުރުކީގަައި ކުރިއަށްދިޔަ ނަމަވެސް، 2028 ވަނަ އަހަރުގެ މުބާރާތް އަނެއްކާ ވެސް އޮންނާނީ ސައުދީ އަރަބިއްޔާގައި ކަމަށް ސްޕެއިނުގެ ފުޓްބޯޅަ ފެޑެރޭޝަނުން ވަނީ އިއުލާނުކޮށްފަ އެވެ.
އަންނަ އަހަރުގެ ސުޕަ ކަޕްގައި ވާދަކުރާ ޓީމުތަކަކީ، ސްޕެނިޝް ލީގުގެ ޗެމްޕިއަން، ބާސެލޯނާ އާއި ރަނަރަޕް، ރެއާލް މެޑްރިޑާއި ކޮޕަ ޑެލް ރޭ ޗެމްޕިއަން، ރެއާލް ސޮސިއެޑާޑްގެ އިތުރުން އެތުލެޓިކޯ މެޑްރިޑް އެވެ. ސުޕަ ކަޕްގެ އެންމެ ފަހުގެ ޗެމްޕިއަނުންނަކީ ބާސެލޯނާ އެވެ.
ސްޕެއިނުގެ ފުޓްބޯޅަ ސީޒަން ފެއްޓުމުގެ ކުރިން ކުޅެމުން އައި ސުޕަ ކަޕް ސައުދީ އަރަބިއްޔާގައި އެންމެ ފުރަތަމަ ހޯސްޓްކުރީ 2020 ވަނަ އަހަރު އެވެ. އޭގެ ކުރިން، ސްޕެއިނުން ބޭރުގައި މި މުބާރާތް އެންމެ ފުރަތަމަ ހޯސްޓްކުރީ، 2018 ވަނަ އަހަރު މޮރޮކޯގަ އެވެ.
ހަތަރު ޓީމުގެ މެދުގައި ކުރިއަށްދާ މިނީ ޓޯނަމެންޓެއް ގޮތަށް މި މުބާރާތް ކުޅެން ފެށީ 2019 ވަނަ އަހަރުން ފެށިގެންނެވެ. ސުޕަ ކަޕް އެންމެ ގިނަ ފަހަރު ކާމިޔާބުކުރުމުގެ ރެކޯޑް އޮތީ 16 ފަހަރު ތަށި އުފުލާލި ބާސެލޯނާ އަތުގަ އެވެ.
