ރާއްޖެއަށް ކުރިމަތިވެފައިވާ ޑޮލަރުގެ ދަތިކަމާއި، މާލީ ދާއިރާގައި ހުރި ކަންބޮޑުވުންތަކާއި ހައްލުތައް ކިޔައިދިނުމަށްޓަކައި ”ޑޮލަރު ސައްލާ“ ނަމުގައި ސަންގު ޓީވީ އާއި އަދަދު ނޫސް ގުޅިގެން މިރޭ ފޯރަމެއް ބޭއްވުމަށް ނިންމައިފި އެވެ.
މި ފޯރަމް ސަންގު ޓީވީގެ އިތުރުން ”އަދަދު“ ނޫހުގެ ސޯޝަލް މީޑިއާ ޕްލެޓްފޯމްތަކުން ވަގުތުން ލައިވް ސްޓްރީމް ކުރާނެ އެވެ.
ފޯރަމްގެ މައިގަނޑު މަގުސަދަކީ ރާއްޖޭގެ އިގްތިސާދަށް ދިމާވެފައިވާ އެންމެ ބޮޑު ގޮންޖެހުން ކަމަށްވާ ޑޮލަރު ލިބުމުގެ ދަތިކަމުގެ ހަގީގީ ހާލަތު އާންމުންނަށް ކިޔައިދީ، އެކަމުގެ ސަބަބުން ވިޔަފާރިތަކަށާއި އާންމު ރައްޔިތުންނަށް ހުރި ކަންބޮޑުވުންތައް ފާހަގަކުރުމެވެ. އަދި އިގުތިސާދަށް އަތުވެދާނެ ބަދަލުތަކަށް ލަފާކޮށް، މި ހާލަތުން އަރައިގަތުމަށް ބޭނުންވާ މުހިންމު ހައްލުތަކާ މެދު މަޝްވަރާކުރުމެވެ.
ޕެނަލިސްޓުން:
- ކުރީގެ ގަވަރުނަރު އަހުމަދު ނަސީރު
- މާލީ ދާއިރާގެ ތަޖުރިބާކާރުންގެ ގޮތުގައި އަހުމަދު ސަރުވަޝް އާއި އިސްމާއީލް ޒަރިޔަންދު
- އެސްޓީއޯގެ ކުރީގެ މެނޭޖިން ޑިރެކްޓަރު ހުސައިން އަމްރު
މި ފޯރަމް މޮޑަރޭޓްކޮށް ހުށަހަޅައިދެއްވާނީ އަދަދު ނޫހުގެ ސީއީއޯ ހުސައިން ފިޔާޒު މޫސާ އެވެ.
މި ފޯރަމްގައި ބައިވެރިވުމަށް ސަރުކާރަށާއި ބޭންކް އޮފް މޯލްޑިވްސް (ބީއެމްއެލް) އަށް ދައުވަތު އަރުވާފައިވީ ނަމަވެސް، އެ ބޭފުޅުން ވަޑައިގަންނަވާނެކަން އަދި ކަށަވަރުނުކޮށްދެ އެވެ.
މި ފޯރަމްގެ ސަބަބުން ރާއްޖޭގެ މާލީ ހާލަތާއި ޑޮލަރުގެ ބާޒާރަށް ދިމާވެފައިވާ ތަދުމަޑުކަމުގެ ފުރިހަމަ ތަސްވީރެއް ސާފުވެ، މުސްތަގުބަލުގައި އިގްތިސާދު މިސްރާބު ޖަހާނެ ގޮތާއި އަދި އަޅަންޖެހޭ ފިޔަވަޅުތައް އެނގިގެންދާނެ ކަމަށް އުއްމީދު ކުރައްވާ ކަމަށް ފިޔާޒު ވިދާޅުވި އެވެ.
