އޭން ހެތަވޭ އުޅެނީ ފޭކު ބަނޑެއް ޖަހައިގެން ކަމަށް ބުނެ ސޯޝަލް މީޑިއާގައި ފާޑުކީ މީހުންނަށް އޭނާ ރައްދު ދީފި އެވެ. އާ ފިލްމުގެ ޕްރިމިއާއަށް ފަހު ކުރި އިންސްޓަގްރާމް ޕޯސްޓެއްގައި ހެތަވޭ ބުނީ އޭނާ ހުރީ "ފޭކު އިސްތަށިގަނޑަކާއި އަސްލު ބަނޑަކާއެކު" ކަމަށެވެ.
އެމެރިކާގެ މަޝްހޫރު ބަތަލާ ހެތަވޭގެ ބަނޑު ހާމަވާ ގޮތަށް ހުރި ހެދުމެއްގައި ފެނިގެންދިޔައީ، މިދިޔަ އާދީއްތަ ދުވަހު ލޮސް އެންޖެލިސްގައި ބޭއްވި އޭނާގެ އާ ފިލްމު "ދަ އެންޑް އޮފް އޯކް ސްޓްރީޓް" ލޯންޗުކުރުމުގެ ހަފުލާގަ އެވެ.
އެ ހަފުލާގެ ފޮޓޯތަކާ އެކު ސޯޝަލް މީޑިއާގައި ގިނަ ބަޔަކު ވަނީ "ބަނޑު ފޭކުހެން ހީވަނީ ކީއްވެ؟" އަދި "އެއީ އަސްލެއް ނޫން" ކަމަށް ބުނެ ކޮމެންޓުކޮށްފަ އެވެ. ނަމަވެސް ބައެއް މީހުން ވަނީ އޭނާގެ ދިފާއުގައި ވާހަކަދައްކާފަ އެވެ. އެގޮތުން އެކަކު ލިޔެފައިވާ ގޮތުގައި، ކޮމެންޓުކުރި ގިނަ މީހުންނަށް "އެބްސް" ނުވަތަ ބަނޑުގެ މަސްތައް ވަރުގަދަކޮށް ހުންނަ މީހަކު ބަލިވެ އިނުމުން ބަނޑު ހުންނަ ގޮތް ފެނިފައި ނުވަނީ އެވެ.
އުމުރުން 43 އަހަރުގެ ހެތަވޭ އާއި އޭނާގެ ފިރިމީހާ އެޑަމް ޝުލްމަންއަށް ތިންވަނަ ދަރިއަކު ލިބެން އުޅޭކަން އިއުލާންކުރީ މިދިޔަ ޖޫން މަހުގެ ތެރޭގަ އެވެ.
ފާއިތުވި ހަފުތާތަކުގައި "ދަ އޮޑިސީ" ފިލްމު އިޝްތިހާރު ކުރުމުގެ ތެރޭގައި ވެސް ހެތަވޭ ބަލިވެ އިނުމުގެ ސަބަބުން ބަނޑު ބޮޑުވަމުންދާކަން ފާހަގަވި ނަމަވެސް، "ދަ އެންޑް އޮފް އޯކް ސްޓްރީޓް" ޕްރިމިއާގައި އޭނާ ލައިގެން ހުރި ހެދުމުގެ ސަބަބުން ގިނަ ބައެއްގެ ސަމާލުކަން އެކަމަށް ހުއްޓުނެވެ.
އެ ހަފުލާގައި އޭނާ ލައިގެން ހުރީ "އެޓެލިއާ ޕްރަބަލް ގުރުންގް" އިން އޭނާއަށް ހާއްސަކޮށް ފަރުމާކޮށްފައިވާ ކްރޮޕް ޓޮޕެކެވެ. އެ ހެދުން ފަރުމާކުރި ފަރާތުން ސިފަކުރި ގޮތުގައި އެއީ "ސްކަލްޕްޗަރަލް ހައި-ލޯ ހޯލްޓާ ޓޮޕް" އެކެވެ. އެ ޓޮޕާއެކު ހެތަވޭ ލައިގެން ހުރީ "ލާ ލީން" ބްރޭންޑުގެ ޖީންސަކާއި "އަކުއަޒޫރާ" ބްރޭންޑުގެ ރަތް ކުލައިގެ އުސް ފައިވާނެކެވެ.
ބަނޑާ ބެހޭ ގޮތުން ކުރި ތުހުމަތުތަކުގެ އިތުރުން، ބައެއް މީހުން ވަނީ އޭނާގެ މުޅި ހެދުން އެޅުމުގެ ވައްޓަފާޅިއަށް ވެސް ފާޑުކިޔާފަ އެވެ.
