ކެނެޑާގައި ކުޑަކުއްޖަކު ސީޓްބެލްޓް އަޅަން ދެކޮޅުހެދުމާ ގުޅިގެން ފްލައިޓެއް ކެންސަލްކޮށްފި އެވެ.
މިދިޔަ އޮގަސްޓް މަހުގެ 6 ވަނަ ދުވަހު ވިކްޓޯރިއާއިން ޓޮރޮންޓޯއަށް ފުރަން ތައްޔާރުވި ޕޯޓާ އެއާލައިންސްގެ ފްލައިޓް އަނބުރާ ޓާމިނަލަށް ޖައްސަން ޖެހުނީ، "ކުޑަކުއްޖަކު ސީޓުން ތެދުވެ، ސީޓްބެލްޓް އެޅުމަށް ދެކޮޅުހެދުމުން" ކަމަށް އެ އެއާލައިނުން ބުނެފައިވެ އެވެ.
މި ހާދިސާއާ ގުޅިގެން ފްލައިޓް ލަސްވުމުގެ ސަބަބުން، ދެން އޮތް ވަގުތަކީ ރަންވޭ ބަންދުކުރާ ވަގުތަށް ވުމުން އެ ރޭ ފްލައިޓަށް ނުފުރި، ހުރިހާ ފަސިންޖަރުން ޖެހިގެން އައި ދުވަހުގެ ފްލައިޓަކަށް ބަދަލުކުރަން ޖެހުނެވެ.
މި ހާދިސާއާ ގުޅިގެން، މިފަދަ ހާލަތްތަކުގައި ކުޑަކުދިންނާ މެދު އަމަލުކުރަންޖެހޭ ގޮތާއި އެއާލައިންތަކުން އިޖާބަދޭންޖެހޭ ގޮތާ މެދު އާންމުންގެ މެދުގައި ވަނީ ހިޔާލު ތަފާތުވުންތަކެއް އުފެދިފަ އެވެ.
ކުއްޖާގެ އަމަލުތަކާ ގުޅޭ ގޮތުން ޕޯޓާ އެއާލައިންސްއިން ބުނީ، އެ ކުއްޖާއާއެކު ދަތުރުކުރި ބެލެނިވެރިޔާ އާއި ފްލައިޓްގެ ކްރޫއިން އެކަން ހައްލުކުރަން ކުރި މަސައްކަތް ކާމިޔާބު ނުވި ކަމަށެވެ.
އެ އެއާލައިނުން އިތުރަށް ބުނި ގޮތުގައި، ނުރައްކާތެރި ހާލަތެއްގައި ބޯޓު އުދުއްސާލެވެން ނެތުމުން، ކްރޫއިން ނިންމީ ބޯޓު އަނބުރާ ޓާމިނަލަށް ގެންގޮސް އެ ދެ ފަސިންޖަރުން ބޯޓުން ބޭލުމަށެވެ.
އޭވިއޭޝަން ސޭފްޓީއާ ގުޅޭ ބައެއް ތަޖުރިބާކާރުން ދެކޭ ގޮތުގައި ޕޯޓާ އެއާލައިންސްގެ ކްރޫއިން ފްލައިޓް ހުއްޓާލުމަށް ނިންމި ނިންމުމަކީ އެ ކުއްޖާގެ އިތުރުން ފްލައިޓްގެ ހުރިހާ ފަސިންޖަރުންގެ ސަލާމަތަށްޓަކައި ނިންމި ނިންމުމެއް ކަމަށެވެ.
ބައެއް ފަރާތްތަކުން ބުނާ ގޮތުގައި މިއީ ބެލެނިވެރިން ކުދިންނަށް މާ ބޮޑަށް ދޫދިނުމުން ނުކުންނަ ނަތީޖާއެކެވެ. ފޮކްސް ނިއުސްގެ މޯނިން ޕްރޮގްރާމުގައި މިކަމާ މެދު ބަހުސްކުރަމުން، ކޯ-ހޯސްޓް ޗާލްސް ހާޓް ބުނީ އޭނާ ތާއީދުކުރަނީ ކުދިންނަށް އަދަބުދީގެން ކަންކަން އިސްލާހުކުރުމަށް ކަމަށެވެ.
އެހެން ބައެއް މީހުން ފާހަގަކުރާ ގޮތުގައި، ބައެއް ފަހަރު ކުދިން މިފަދަ ގޮތަކަށް އަމަލުކުރަނީ އުދުހުމަށް ބިރުގަންނާތީ ކަމަށާއި، އެއީ ގަސްތުގައި އުނދަގޫކުރަން ކުރާ ކަމެއް ނޫން ކަމަށެވެ.
ޕޯޓާ އެއާލައިންސްގެ އެ ފްލައިޓުން ދަތުރުކުރި ފަސިންޖަރަކު ބުނީ، އެ ކުއްޖާ އުޅުނީ ނުކިޔަމަންތެރިވެގެން ނޫން ކަމަށާއި، ނަމަވެސް އެ ކުއްޖާ ހުރީ ވަރަށް ބޮޑަށް ބިރުގަނެފައި ކަމަށެވެ.
"އެ ކުއްޖާ އުޅުނީ ސީޓު ދަށަށް ވަދެ ފިލަން. ގަދަކަމުން ސީޓުގައި ބައިންދައި ބެލްޓް އަޅުވަން އުޅުމުން، ސީޓު ދަށުން ދެމިގަނެގެން ނުކުންނަނީ،" އޭނާ ބުންޏެވެ.
މިފަދަ ހާދިސާއެއް 2018 ވަނަ އަހަރު ވެސް ވަނީ ހިނގާފަ އެވެ. އެ ފަހަރު ޝިކާގޯއިން އެޓްލާންޓާއަށް ދަތުރުކުރި ސައުތުވެސްޓް އެއާލައިންސްގެ ފްލައިޓަކުން ބައްޕައަކާއި އަންހެން ދަރިއަކު ބޭރުކުރާ މަންޒަރު ފެންނަ ވީޑިއޯތައް ދައުރުވި އެވެ.
އެ ހާދިސާ ރެކޯޑުކުރި ފަސިންޖަރަކު ބުނި ގޮތުގައި، އެ ކުއްޖާ ބޮޑާހޭކުން ހުއްޓާލައި، ފަސް މިނެޓަށް ވުރެ ގިނަ އިރު ވަންދެން މަޑުމަޑުން ސީޓުގައި އިނެވެ. ނަމަވެސް އެއަށްފަހު އެއާލައިންގެ ކްރޫއިން އައިސް އެމީހުން ބޯޓުން ބާލާނެ ކަމަށް ބައްޕައަށް އެންގީ އެވެ.
އެ ހާދިސާގައި ހިމެނޭ ސައުތުވެސްޓް އެއާލައިންސްއިން ބުނީ، ފުރަތަމަ ލިބުނު ރިޕޯޓްތަކުން އެނގޭ ގޮތުގައި ކްރޫއިންނާއި ކުޑަކުއްޖަކާއެކު ދަތުރުކުރި ފަސިންޖަރަކާ ދެމެދު ބޯޓު ތެރޭގައި ހޫނު ބަހުސެއް ހިނގާފައިވާ ކަމަށެވެ.
މީގެ އިތުރުން 2012 ވަނަ އަހަރު ހިނގި މިފަދަ ހާދިސާއަކަށް ފަހު، ބޯޓުން ބޭލި އާއިލާއަކުން އެންބީސީގެ 'ޓުޑޭ ޝޯ' ގައި ބައިވެރިވެ، އެއާލައިނުން އިންސާނިއްޔަތުކަމެއް ނެތް ގޮތަށް އަމަލުކުރި ކަމަށް ތުހުމަތުކޮށްފައިވެ އެވެ.
އެ ހާދިސާގައި ހިމެނޭ ޖެޓްބްލޫ އެއާލައިންސްއިން ބުނީ، ގިނަ ވަގުތުތަކެއް ވަންދެން ކްރޫއިންގެ އިރުޝާދުތަކަށް ބައެއް ފަސިންޖަރުން ތަބާނުވި ކަމަށެވެ.
އެ އެއާލައިނުން އިތުރަށް ބުނީ، ބޯޓުގައި ތިބި ހުރިހާ ފަސިންޖަރުންނާއި ކްރޫއިންގެ ސަލާމަތަށްޓަކައި، އެކަމުގައި ހިމެނޭ ފަސިންޖަރުން ބޯޓުން ބޭލުމަށް ކެޕްޓަން ނިންމެވީ ކަމަށެވެ.
