ތައިލެންޑުގެ ކުރީގެ މަޖިލިސް މެންބަރަކު، ބެންކޮކް ކައިރީގައި ސަރުކާރުގެ އިސް އޮފިޝަލެއްގެ ގަޔަށް ބަޑިޖަހައި މަރާލުމަށް ފަހު، ޔޫޓިއުބް ލައިވްސްޓްރީމެއް މެދުވެރިކޮށް އެކަން ކުރިކަން އިއުލާންކޮށްފި އެވެ.
ނޮންތަބޫރީ ދާއިރާގެ ކުރީގެ މެންބަރު ޗަލޮންގް ރިއައުރައެންގް، ޔޫޓިއުބް ޕްރޮގްރާމްގެ ހޯސްޓް އަންޗަލީ ޕައިރީރަކަށް ގުޅައި ބުނީ، ވެރިރަށް ބެންކޮކްގެ އުތުރުގައި ފުލުހުންގެ ކުރީގެ އޮފިޝަލެއް ކަމަށްވާ ތޮންގްޗައި ޔެންޕްރަސާޓްގެ އޮފީސް ބޭރުގައި އޭނާގެ ގަޔަށް ބަޑިޖަހާފައިވާ ކަމަށެވެ. މި ހަބަރާއެކު ޕްރޮގްރާމްގެ ހޯސްޓަށް ބޮޑު ސިހުމެއް ލިބުނެވެ.
ކަރަށް ވަޒަން އެރުމުގެ ސަބަބުން ތޮންގްޗައިއަށް ހޮސްޕިޓަލުގައި ފަރުވާ ދެމުން ދަނިކޮށް ވަނީ މަރުވެފަ އެވެ. މި ހާދިސާގައި އޭނާގެ ޑްރައިވަރުގެ އަތަށް ވެސް ވަނީ ވަޒަން އަރައި ޒަހަމްވެފަ އެވެ.
މި މައްސަލައިގައި ޗަލޮންގް ހައްޔަރުކުރި ނަމަވެސް، ފުލުހުންގެ އިދާރާގައި ނޫސްވެރިންގެ ބައްދަލުވުމެއް ބޭއްވުމުގެ ފުރުސަތު އޭނާއަށް ވަނީ ދީފަ އެވެ. އެ ބައްދަލުވުމުގައި އޭނާ ވަނީ ސިނގިރޭޓެއް ބޯން އިނދެ، ހިނގައިދިޔަ ކަންތައްތައް ކިޔައިދޭން މަސައްކަތް ކޮށްފަ އެވެ.
ފުލުހުން ބުނި ގޮތުގައި މިފަދަ އާދަޔާ ހިލާފު ފުރުސަތެއް އޭނާއަށް ދިނީ މަރުވި މީހާގެ އާއިލާގެ ކިބައިން މައާފަށް އެދުމަށެވެ. ނަމަވެސް، މައިކްރޯފޯނު ކައިރީގައި ހުރެ އޭނާ ވަނީ ހަ މިނެޓަށް ވުރެ ގިނަ އިރުވަންދެން އޭނާ ކުރި އަމަލުތަކުގެ ތަފުސީލު ކިޔައިދީފަ އެވެ.
ނޫސްވެރިންނާ ވާހަކަދައްކަމުން ޗަލޮންގް ބުނީ ތޮންގްޗައި ހުރީ އޭނާދެކެ "ރުޅިއައިސްފައި" ކަމަށެވެ. ނަމަވެސް އެއީ ކީއްވެގެން ކަމެއް އޭނާ ހާމައެއް ނުކުރެ އެވެ. އަދި އޭނާގެ "ގާތް އެކުވެރިއެއް" ކަމަށްވާ ތޮންގްޗައިގެ ގަޔަށް ބަޑިޖެހުމުގެ އެއްވެސް ގަސްދެއް ނެތް ކަމަށް ވެސް އޭނާ ބުންޏެވެ.
ޗަލޮންގް ބުނި ގޮތުގައި އޭނާ ތޮންގްޗައި ގާތު ވާހަކަދައްކަން ބޭނުންވާ ކަމަށް ބުންޏެވެ. އެ ސަރަހައްދުގެ މީޑިއާތަކުން ރިޕޯޓްކޮށްފައިވާ ގޮތުގައި މި ދެ މީހުންގެ މެދުގައި ޖެހުނީ އަމިއްލަ ޒާތީ މައްސަލައެކެވެ.
"އޭނާ [ތޮންގްޗައި] އަހަރެން ކޮއްޕާލާފައި ބުނީ ވާހަކަދައްކަން ބޭނުން ނުވާ ކަމަށް،" ޗަލޮންގް ކިޔައިދިނެވެ.
އޭގެ ފަހުން ތޮންގްޗައި އޭނާގެ ކާރާ ދިމާލަށް ދަނިކޮށް ފަހަތުން ދިޔަ ކަމަށް ޗަލޮންގް ބުންޏެވެ.
"އަހަރެން ބަޑި ނެގީ އޭނާގެ ގަޔަށް ޖަހާކަށް ނޫން. އެކަމަކު [ތޮންގްޗައިގެ ޑްރައިވަރު] ބަޑި ނަގައި އަހަންނާ ދިމާލަށް ދިއްކުރުމުން އަހަރެން ބަޑިޖެހީ،" ޗަލޮންގް ބުންޏެވެ.
މަރުވި ތޮންގްޗައިއަކީ ފުލުހުންގެ ރިޓަޔާޑް ކާނަލެއްގެ އިތުރުން، ނޮންތަބޫރީ ޕްރޮވިންޝަލް އެޑްމިނިސްޓްރޭޓިވް އޯގަނައިޒޭޝަން (ޕީއޭއޯ) ނަމަކަށް ކިޔާ ސަރަހައްދީ ސަރުކާރުގެ އިދާރާގެ ރައީސެވެ.
ތައިލެންޑުގެ ބޮޑުވަޒީރު އަނޫޓިން ޗާންވީރަކުލް ހޯމަ ދުވަހުގެ މެންދުރުފަހު ވިދާޅުވީ، އޭނާގެ ޕާޓީގެ ކުރީގެ މެންބަރެއް ކަމަށްވާ ޗަލޮންގްއާ މެދު ފުލުހުން އަމަލުކުރި ގޮތުން ހައިރާންވެވަޑައިގަންނަވާ ކަމަށެވެ.
"ކުށްވެރިޔާގެ އަތުގައި ބިޑިނާޅުވައި، ނޫސްވެރިންގެ ބައްދަލުވުމެއް ބާއްވައި، އެއީ އާދައިގެ ކަމެއްގެ ގޮތުގައި ދެއްކުމަކީ ރަނގަޅު ގޮތެއް ނޫން،" ބޮޑުވަޒީރު ވިދާޅުވި އެވެ.
"އޭނާއަކީ ކޮންމެ މީހަކަށް ވިޔަސް، މިހާރު އެއީ ގާތިލެއް،" އަނޫޓިން ވިދާޅުވި އެވެ. އަދި ޗަލޮންގްއާ މެދު ގާނޫނީ ގޮތުން އެޅެން އޮތް އެންމެ ހަރުކަށި ފިޔަވަޅު އަޅާނެ ކަމަށް ވެސް ވިދާޅުވި އެވެ.
ނޮންތަބޫރީގެ ގަވަރުނަރު ވަނީ ޗަލޮންގްއަށް އެއްވެސް ހާއްސަ އިނާޔަތެއް ދީފައިވާ ކަމަށް ބުނާ ވާހަކަތައް ދޮގުކުރައްވާފަ އެވެ. އޭނާ ވިދާޅުވީ ނޫސްވެރިންނާ ވާހަކަދައްކަމުން ދިޔައިރު ސިނގިރޭޓް ބޯން ފުރުސަތު ދިނީ، އޭނާ ވަރަށް ބޮޑަށް ހާސްވެ އަތް ތުރުތުރުލާތީ ކަމަށެވެ.
ހޯމަ ދުވަހުގެ މި ބަޑިޖެހުމުގެ ހާދިސާ ހިނގާފައި މިވަނީ، 14 އަހަރުގެ ފިރިހެން ކުއްޖަކު އޭނާގެ ގޭގަ އާއި ސްކޫލުގައި އަށް މީހަކު މަރާލުމަށްފަހު އަމިއްލައަށް މަރުވި ހާދިސާއަށް ތިން ދުވަސް ފަހުންނެވެ. އެއީ 2022 ވަނަ އަހަރަށްފަހު ތައިލެންޑުގައި ހިނގި އެންމެ ނުރައްކާތެރި ބަޑިޖެހުމުގެ ހާދިސާ އެވެ. ނަމަވެސް މި ދެ ހާދިސާއާ އެއްވެސް ގުޅުމެއް ނެތެވެ.
