ބެންކޮކްގެ ސްކޫލެއްގައި ކުޑަ ކުއްޖަކު ދިން ބަޑީގެ ހަމަލާތަކެއްގައި އަށް މީހުން މަރުވެ، 22 މީހުން ޒަހަމްވުމާ ގުޅިގެން، ބަޑި ގެންގުޅުމާ ބެހޭ ގާނޫނުތައް އިތުރަށް ހަރުކަށި ކުރައްވާނެ ކަމަށް އެ ގައުމުގެ ބޮޑުވަޒީރު އަނޫޓިން ޗާންވީރަކުލް ވައުދުވެވަޑައިގެންފި އެވެ.
އުމަރުން 14 އަހަރުގެ ކުއްޖަކު އިއްޔެ ބަޑިޖަހާފައި ވަނީ އޭނާ ވެސް ކިޔަވަމުން ދިޔަ ނޮންތަބޫރީގައި ހުންނަ ދެބްސިރިން ސުކޫލުގަ އެވެ.
ފުލުހުން މައުލޫމާތު ދޭ ގޮތުގައި، އެ ކުއްޖާ އެންމެ ފުރަތަމަ އޭނާ ދިރިއުޅޭ ގޭގައި އޭނާގެ ކާފަ އާއި މާމަ މަރާލުމަށްފަހު، އޭނާ ކިޔަވަމުންދިޔަ ސުކޫލަށް ގޮސް ފަސް ޓީޗަރުން މަރާލި އެވެ. އޭގެ ފަހުން އެ ކުއްޖާ ވަނީ އަމިއްލައަށް މަރުވެފަ އެވެ.
ޒަހަމްވި ދަރިވަރުންގެ ތެރެއިން އެކަކު ވަނީ ހޮސްޕިޓަލުގައި ފަރުވާ ދެމުންދަނިކޮށް މަރުވެފަ އެވެ.
ބޮޑުވަޒީރު އަނޫޓިން ވިދާޅުވީ، އާންމު ތަންތަނުގައި ހަތިޔާރު ގެންގުޅުން މަނާކުރާ އާ ގާނޫނުތަކެއް ތައާރަފު ކުރައްވާނެ ކަމަށެވެ. މި ގާނޫނުގެ ދަށުން ބަޑި ގެންގުޅުމުގެ ހުއްދަ އޮންނާނީ ހަމައެކަނި ރަސްމީ ވާޖިބު އަދާކުރާ ސަރުކާރުގެ އޮފިޝަލުންނަށް އެކަނި ކަމަށް އޭނާ ފާހަގަކުރެއްވި އެވެ. މި ހާދިސާއަކީ ގައުމުގައި ހިނގައިގެންވާނެ ކަމެއް ނޫން ކަމަށާއި، މިކަމާ މެދު ނުހަނު ހިތާމަކުރައްވާ ކަމަށްވެސް ބޮޑުވަޒީރު ވިދާޅުވިއެވެ.
ފުލުހުންގެ ތަހުގީގުން އެނގިފައިވާ ގޮތުގައި، ހަމަލާ ދިނުމަށް ބޭނުންކުރި ބަޑިއާއި ވަޒަނަކީ އެ ކުއްޖާގެ ކާފަގެ އެއްޗިއްސެވެ. އެއީ ގާނޫނީ ގޮތުން ރަޖިސްޓްރީކޮށް، ހުއްދަ ހޯދައިގެން ގެންގުޅުނު ހަތިޔާރެކެވެ.
ތައިލެންޑަކީ ދެކުނު އިރުމަތީ އޭޝިއާގައި އާންމުންގެ އަތުގައި އެންމެ ގިނައިން ހަތިޔާރު ހުންނަ އެއް ގައުމެވެ. ތަފާސްހިސާބުތަކުން ދައްކާ ގޮތުގައި އެ ގައުމުގެ އާންމުންގެ އަތުގައި 10.3 މިލިއަން ހަތިޔާރު ހުރިއިރު، އޭގެ ތެރެއިން ހަތަރު މިލިއަނެއްހާ ހަތިޔާރަކީ ގާނޫނާ ހިލާފަށް ގެންގުޅޭ ތަކެއްޗެވެ.
މި ހަމަލާ ދިން ކުއްޖާގެ އާއިލާއިން ބުނާ ގޮތުގައި އެއީ ވަރަށް މަޑުމައިތިރި ކުއްޖެކެވެ. ނަމަވެސް އޭނާ ގިނަ ވަގުތު ހޭދަކުރަނީ ގޭތެރޭގައި އަނިޔާވެރި ވީޑިއޯ ގޭމް ކުޅުމުގައެވެ. ފުލުހުން އެ ކުއްޖާގެ އިލެކްޓްރޯނިކް ސާމާނުތައް ބެލިބެލުމުން، އެމެރިކާގެ ސުކޫލުތަކުގައި ދީފައިވާ ބަޑީގެ ހަމަލާތަކާ ގުޅޭ ވީޑިއޯތައް އޭނާ ބަލާފައިވާކަން ވަނީ ހާމަވެފައެވެ.
އިއްޔެ ފަތިހު 05:00 ހާއިރު އުމުރުން 73 އަހަރުގެ ކާފަ އާއި 74 އަހަރުގެ މާމަގެ ބޮލަށް ބަޑިޖަހައި މަރާލުމަށް ފަހު، އޭނާ ސުކޫލަށް ދިޔައީ ސުކޫލު ބަހުގަ އެވެ. ސުކޫލަށް ގޮސް ފުރަތަމަ ދެ ގަޑީގައި ކިޔެވުމުގައި ބައިވެރިވުމަށްފަހު، ހަމަލާ ދޭން ފެށީ ދެވަނަ ގަޑި ފެށުނުތާ ބައިގަޑިއިރެއްހާ އިރު ފަހުންނެވެ.
ބޮޑުވަޒީރު ވިދާޅުވި ގޮތުގައި، މި ހަމަލާއަކީ ވަރަށް ބޮޑަށް ރޭވިގެން، ވަކި އަމާޒުތަކެއް ކަނޑައަޅައިގެން ދީފައިވާ ހަމަލާއެކެވެ.
ތައިލެންޑުގައި މިހާރުވެސް ހަތިޔާރު ގެންގުޅުމާ ބެހޭ ހަރުކަށި ގާނޫނުތަކެއް އޮވެއެވެ. ގާނޫނާ ހިލާފަށް ހަތިޔާރު ގެންގުޅޭ މީހުންނަށް 10 އަހަރުގެ ޖަލު ހުކުމެއް އާދެއެވެ. ނަމަވެސް މި ގާނޫނުތައް ތަންފީޒު ކުރުމުގައި ގޮންޖެހުންތަކެއް ހުރިކަން ކަމާބެހޭ ފަރާތްތަކުން ގަބޫލުކުރެއެވެ. ބޮޑުވަޒީރު އަނޫޓިން މީގެ ކުރިން ދާހިލީ ވަޒީރުގެ މަގާމުގައި ހުންނެވި އިރުވެސް ވަނީ ހަތިޔާރު އެތެރެކުރުމާއި އާ ލައިސަންސް ދޫކުރުން ވަގުތީ ގޮތުން މަނާކުރުން ފަދަ ފިޔަވަޅުތަކެއް އަޅުއްވާފަ އެވެ.
