ބެންކޮކްގެ ސްކޫލެއްގައި ބަޑިޖަހައި ގިނަ ބަޔަކު މަރާލި ފުރާވަރު އުމުރުގެ ކުއްޖާގެ އަތުން މިދިޔަ އަހަރު ޓީޗަރަކު އެއާ ގަންއެއް އަތުލާފައިވާ ކަމަށާއި، އެ ކުއްޖާ އިންޓަނެޓުން އަނިޔާވެރި މަންޒަރުތައް ހިމެނޭ ވީޑިއޯތައް ބަލާފައިވާ ކަމަށް ފުލުހުން އާދީއްތަ ދުވަހު ބުނެފި އެވެ.
މި ހާދިސާއާ ގުޅިގެން ސްކޫލްތަކުގެ ސަލާމަތީ ކަންކަން ވަރުގަދަކުރުމަށް އާ އުސޫލުތަކެއް އެކުލަވާލާނެ ކަމަށް އެ ގައުމުގެ ސަރުކާރުން މިހާރު ވަނީ އިއުލާންކޮށްފަ އެވެ.
ވޭތުވެދިޔަ ހުކުރު ދުވަހު ހިނގި މި ނުރައްކާތެރި ހާދިސާގެ ތަހުގީގު ކުރިއަށްދާއިރު، އުމުރުން 14 އަހަރުގެ އެ ފިރިހެން ކުއްޖާ ވަނީ ގޭގައި އޭނާގެ ކާފަ އާއި މާމަ ބަޑިޖަހައި މަރާލުމަށް ފަހު، ސްކޫލަށް ގޮސް އިތުރު ހަ މީހަކު މަރާލާފަ އެވެ. އެއަށްފަހު އެ ކުއްޖާ އަމިއްލައަށް ގަޔަށް ބަޑިޖަހައި މަރުވެފައިވާއިރު، ބަޑި ބޭނުންކުރާނެ ގޮތް އެ ކުއްޖާ ދަސްކުރީ ސޯޝަލް މީޑިއާ މެދުވެރިކޮށް ކަމަށް ފުލުހުން ބުނެ އެވެ.
ޕްރޮވިންޝަލް ޕޮލިސް ރީޖަން 1 ގެ ޑެޕިއުޓީ ކޮމިޝަނަރު އައްތަޕޯލް އަނުސިތު ނޫސްވެރިންނަށް މައުލޫމާތު ދެއްވަމުން ވިދާޅުވީ، ހެކިންގެ ފަރާތުން ލިބުނު މައުލޫމާތަށް ބަލާއިރު، ބަޑި ބޭނުންކުރާނެ ގޮތް ދަސްކުރުމަށް އެ ކުއްޖާ ޝައުގުވެރިކަން ފާޅުކުރަން ފެށީ މީގެ އެއް އަހަރު ނުވަތަ ދެ އަހަރު ކުރިންނެވެ.
މިހާތަނަށް 17 ހެކިވެރިއެއްގެ ބަޔާން ނަގާފައިވާ ކަމަށް އައްތަޕޯލް ވިދާޅުވި އެވެ. އަދި އެ ކުއްޖާގެ ދަބަހުން ވަޅިއެއް ފެނިފައިވާ ކަމަށާއި، ހާދިސާ ހިނގި ތަންތަނުން ބަޑިއަކާއި، ބޭނުންކޮށްފައިވާ ވަޒަންތަކުގެ ބައިތަކުގެ އިތުރުން ކޮމްޕިއުޓަރެއް ފެނިފައިވާ ކަމަށް ވެސް އޭނާ ވިދާޅުވި އެވެ.
"އެ ކުއްޖާގެ ކޮމްޕިއުޓަރު ތަހުގީގު ކުރިއިރު، ސޯޝަލް މީޑިއާގައި ހުރި އަނިޔާވެރިކަން ދައްކުވައިދޭ ވީޑިއޯތައް އެ ކުއްޖާ ބަލާފައިވާކަން ވަނީ އެނގިފައި،" ޑެޕިއުޓީ ކޮމިޝަނަރު ވިދާޅުވި އެވެ. ނަމަވެސް، އެ ކުއްޖާ އަމަލީ ގޮތުން ބަޑިޖަހަން ފަރިތަކޮށްފައިވާ ކަމުގެ ހެއްކެއް މިހާތަނަށް ފެނިފައި ނުވާ ކަމަށް އޭނާ ފާހަގަކުރެއްވި އެވެ.
އައްތަޕޯލް އިތުރަށް ވިދާޅުވީ، މިދިޔަ އަހަރުގެ ތެރޭގައި އެ ކުއްޖާ ސްކޫލަށް "ބީބީ ގަން" އެއް (އެއާ ގަންގެ ބާވަތެއް) ގެންދިއުމުން ޓީޗަރަކު އެ އަތުލާފައިވާ ކަމަށެވެ. އަދި އެ ކުއްޖާގެ މައިންބަފައިން ވަކިވުމާ ގުޅިގެން، ފާއިތުވި 12 އަހަރު އޭނާ ދިރިއުޅެމުން އައީ ކާފަ އާއި މާމަ ގާތުގައި ކަމަށް ވެސް އޭނާ ވިދާޅުވި އެވެ.
ތައިލެންޑުގެ މިނިސްޓްރީ އޮފް އެޑިއުކޭޝަނުން ބުނީ ކުރިއަށް އޮތް ތިން މަސް ދުވަހުގެ ތެރޭގައި ސްކޫލްތަކުގެ ސަލާމަތީ ކަންކަން ވަރުގަދަކުރުމަށް އާ އުސޫލުތަކެއް އެކުލަވާލާނެ ކަމަށެވެ. މީގެ ތެރޭގައި ނަފްސާނީ ދުޅަހެޔޮކަން ދެނެގަތުމަށް ކުރާ ސްކްރީނިންތަކާއި، ނުރައްކަލެއް ކުރިމަތިވެދާނެ ފަދަ ފަރާތްތައް ހާއްސަ އެހީތެރިން ކައިރިއަށް ފޮނުވާނެ ނިޒާމެއް ގާއިމުކުރުމާއި، ކުއްލި ހާލަތްތަކުގައި އަމަލުކުރާނެ ގޮތުގެ ތަމްރީނުތައް ހިމެނެ އެވެ. މީގެ އިތުރުން ބުލީކުރުން ހުއްޓުވުމަށާއި، ސްކޫލްތަކަށް މަނާ ތަކެތި ވެއްދުން ހުއްޓުވުމަށް ކުރާ މަސައްކަތްތައް އިތުރަށް ހަރުދަނާކުރާނެ ކަމަށް ވެސް އެ މިނިސްޓްރީން ބުންޏެވެ.
މި ހާދިސާގައި މަރުވި މީހުންގެ އިތުރުން 20 އަށްވުރެ ގިނަ މީހުންނަށް ވަނީ އެކިވަރުގެ އަނިޔާތައް ލިބިފަ އެވެ. މިއީ 2022 ވަނަ އަހަރަށް ފަހު ތައިލެންޑުގައި ހިނގި ބަޑިޖެހުމުގެ އެންމެ ނުރައްކާތެރި ހާދިސާއަށް ވާއިރު، ދެކުނު އިރުމަތީ އޭޝިއާގައި އެންމެ ގިނައިން ބަޑި ގެންގުޅޭ ގައުމުގެ ގޮތުގައި އޮތް ތައިލެންޑުގައި، ހަތިޔާރު ކޮންޓްރޯލް ކުރުމާ ބެހޭ ގޮތުން ކުރެވޭ ބަހުސްތައް މިހާރު ވަނީ އަލުން އިތުރުވެފަ އެވެ.
