ކޮލަމްބިއާއަށް ފަހުގެ ތާރީހެއްގައި އައި އެންމެ ބާރުގަދަ ބިންހެލުމާ ގުޅިގެން، އެ ގައުމުގައި ކުއްލި ނުރައްކަލުގެ ހާލަތު އިއުލާންކޮށްފައިވާއިރު، މަރުވި މީހުންގެ އަދަދު މަދުވެގެން 132 އަށް އަރައިފި އެވެ.
ބިންހެލުމުގެ ސަބަބުން ވެއްޓިފައިވާ އިމާރާތްތަކުގެ ދަށުގައި ގިނަ ބަޔަކު ތާށިވެފައި ތިބޭނެ ކަމަށް ބެލެވޭތީ، މަރުވި މީހުންގެ އަދަދު މިއަށްވުރެ އިތުރުވުން އެކަށީގެންވާ ކަމަށް ކަމާބެހޭ ފަރާތްތަކުން ލަފާކުރެ އެވެ.
ކޮލަމްބިއާގެ ޖިއޮލޮޖިކަލް ސާވިސްއިން ބުނި ގޮތުގައި، ރިކްޓަރ މިންގަނޑުން 7.4 ގެ ބާރުމިނުގައި މި ބިންހެލުން އައިސްފައިވަނީ ޗޮކޯ ޕްރޮވިންސްގެ 103 ކިލޯމީޓަރު އަޑިންނެވެ. މި ބިންހެލުމުގެ ލޮޅުންތައް ކޮލަމްބިއާގެ ހުޅަނގުގެ އެތައް ސަތޭކަ މޭލެއްގެ ސަރަހައްދަށް ވަނީ އިހުސާސް ކުރެވިފަ އެވެ.
މި ހާދިސާގައި އެންމެ ގިނަ މީހުން މަރުވެފައިވަނީ ކޮލަމްބިއާގެ ކޮފީ ހައްދާ ސަރަހައްދެއް ކަމަށްވާ ޕެރެއިރާ ސިޓީންނެވެ. މީގެ އިތުރުން އެ ސިޓީގެ ވަށައިގެންވާ ރަށްތަކަށާއި ވޭޔޭ ޑެލް ކައުކާ ސަރަހައްދަށް ވެސް ބޮޑެތި ގެއްލުންތަކެއް ވަނީ ލިބިފަ އެވެ.
ކޮލަމްބިއާގެ އެސޯސިއޭޝަން އޮފް ކެޕިޓަލް ސިޓީޒްއިން ހޯމަ ދުވަހު ނެރުނު ބަޔާނެއްގައި ބުނެފައިވާ ގޮތުގައި، މި ބިންހެލުމުގައި މިހާތަނަށް 480 އަށްވުރެ ގިނަ މީހުންނަށް ވަނީ އެކިވަރުގެ އަނިޔާތައް ލިބިފަ އެވެ.
ކޮލަމްބިއާގެ އޭވިއޭޝަން އޮތޯރިޓީން ރިޕޯޓްކޮށްފައިވާ ގޮތުގައި، ޕެރެއިރާ، މަނިޒާލެސް، ކިބްޑޯ، އަރްމީނިއާ، ކާޓާގޯ އަދި ބުއެނަވެންޗޫރާގެ ސަރަހައްދީ އެއާޕޯޓްތަކަށް ވަނީ ގެއްލުންތަކެއް ލިބިފަ އެވެ.
ގައުމުގެ ވެރިރަށް ބޮގޮޓާގައި ބިންހެލުމުގެ ސަބަބުން ގަސްތަކާއި ޓްރެފިކް ބައްތިތައް ވަރަށް ބޮޑަށް ހެލި، ބައެއް އިމާރާތްތަކުގައި ރެނދުލާފައިވާ ކަމުގެ ރިޕޯޓްތައް ލިބިފައިވީ ނަމަވެސް، އެ ސިޓީގެ އިންފްރާސްޓްރަކްޗާއަށް މިހާތަނަށް ބޮޑު ގެއްލުމެއް ލިބިފައެއް ނުވެ އެވެ.
މި ބިންހެލުމުގެ ލޮޅުންތައް އަވަށްޓެރި ވެނެޒުއޭލާ، އިކުއެޑޯ އަދި ޕެނަމާއަށް ވެސް ވަނީ އިހުސާސް ކުރެވިފަ އެވެ.
މި ބިންހެލުން އައިސްފައި މިވަނީ، ވެނެޒުއޭލާގެ އުތުރު ސަރަހައްދަށް އައި ދެ ބިންހެލުމެއްގައި 6،300 އަށްވުރެ ގިނަ މީހުން މަރުވި ހާދިސާއަށް ދެ މަސް ދުވަސް ވެސް ނުވަނީހެވެ.
