އޮސްޓްރޭލިއާގެ ސިޑްނީ އެއާޕޯޓުގެ ރަންވޭގައި އާދީއްތަ ދުވަހުގެ ހެނދުނުގެ ވަގުތެއްގައި ޖެޓްސްޓާ އެއާވޭސްގެ ބޯޓަކާއި ގަތަރު އެއާވޭސްގެ ބޯޓެއް އެކްސިޑެންޓު ނުވީ ކިރިޔާ ކަމަށް ރިޕޯޓުތައް ބުނެފި އެވެ.
މި ހާދިސާއާ ގުޅިގެން އޮސްޓްރޭލިއާގެ އޭވިއޭޝަން ސޭފްޓީ އިދާރާތަކުން މިހާރު ވަނީ ތަހުގީގެއް ފަށާފަ އެވެ.
މި ހާދިސާ ހިނގާފައިވަނީ އާދީއްތަ ދުވަހުގެ ހެނދުނު 7:00 އެހާއިރު، ގޯލްޑް ކޯސްޓަށް ދަތުރުކުރުމަށް ހަމަޖެހިފައި އޮތް ޖެޓްސްޓާގެ އެއާބަސް އޭ320 މަރުކާގެ ބޯޓެއް ރަންވޭމަތީގައި ދުއްވަމުން ދަނިކޮށް، އެ ބޯޓުގެ ކުރިމަތިން ގަތަރު އެއާވޭސްގެ ބޯއިން 777 މަރުކާގެ ބޯޓެއް ޓެކްސީވޭ ހުރަސްކުރަނިކޮށެވެ.
އޮސްޓްރޭލިއަން ޓްރާންސްޕޯޓް ސޭފްޓީ ބިއުރޯ (އޭޓީއެސްބީ) އިން ބުނި ގޮތުގައި، މި ނުރައްކާތެރި ކުރިމަތިލުމުން ސަލާމަތްވީ ދެ ބޯޓު ވެސް ކުއްލި ގޮތަކަށް ހުއްޓުވުމުންނެވެ.
މި ހާދިސާގައި ޖެޓްސްޓާ ބޯޓުގެ ކެބިން ކްރޫއަކަށް އަނިޔާވެފައިވާއިރު، އެއްވެސް ފަސިންޖަރަކަށް އަނިޔާއެއް ލިބިފައެއް ނުވެ އެވެ. ނަމަވެސް، ގަތަރު އެއާވޭސްގެ ބޯޓުގެ ކުރީކޮޅުގެ ފުރޮޅުތަކަށް ގެއްލުންތަކެއް ލިބިފައިވާ ކަމަށް ރިޕޯޓުކޮށްފައިވެ އެވެ.
ޖެޓްސްޓާ އިން ބުނި ގޮތުގައި އެ ކުންފުނީގެ ބޯޓު ދަތުރުކުރަމުން ދިޔައީ އެއާ ޓްރެފިކް ކޮންޓްރޯލުން ދީފައިވާ އިރުޝާދުތަކާ އެއްގޮތަށެވެ. ނަމަވެސް، އަނެއް ބޯޓު މާ ބޮޑަށް ކައިރިވުމުގެ ސަބަބުން ޕައިލެޓުންނަށް މަޖުބޫރުވީ ކުއްލި ގޮތަކަށް ބްރޭކް ޖައްސައި ބޯޓު ހުއްޓުވާށެވެ.
މި ހާދިސާއާ ގުޅިގެން ޖެޓްސްޓާގެ އެ ފްލައިޓް ވަނީ ކެންސަލްކޮށްފަ އެވެ. އަދި އެ ބޯޓުން ދަތުރުކުރަން ތިބި ފަސިންޖަރުން ފަހުގެ ފްލައިޓްތަކަށް ވަނީ ބަދަލުކޮށްފަ އެވެ.
އޭޓީއެސްބީން މިހާރު ވަނީ މި މައްސަލައިގެ ތަހުގީގެއް ފަށާފަ އެވެ. މި ތަހުގީގުގެ ތެރެއިން ފްލައިޓް ކްރޫއިންނާއި، ޓަގު އޮޕަރޭޓަރުންނާއި، އެއާ ޓްރެފިކް ކޮންޓްރޯލަރުންގެ އިތުރުން ހާދިސާ ފެނުނު މީހުންގެ ބަޔާން ނެގުމާއި ސީސީޓީވީ ފުޓޭޖްތައް ބެލުމަށް ވަނީ ހަމަޖެހިފަ އެވެ.
މި ހާދިސާ ހިނގާފައި މިވަނީ ސިޑްނީ އެއާޕޯޓުގެ އެއާ ޓްރެފިކް ކޮންޓްރޯލްގައި މަސައްކަތްކުރާ މުވައްޒަފުން މަދުވުމުގެ ސަބަބުން ފަހަކަށް އައިސް ފްލައިޓްތައް ވަރަށް ބޮޑަށް ލަސްވަމުންދާ ދަނޑިވަޅެއްގަ އެވެ.
