މި އަހަރުގެ ކިޔެވުން ފެށުމުގެ ކުރިން ނިންމާނެ ކަމަށް ސަރުކާރުން ބުނި ސްކޫލްތައް އޭސީ ކުރުމުގެ މަޝްރޫއު ނިމޭނެ ވަކި ތާރީހެއް ނުދެއްވައި، ދެވަނަ ޓާމުގެ ކިޔެވުން ފެށުމުގެ ކުރިން ގިން ސްކޫލްތަކުގައި އޭސީ ހަރުކުރެވޭތޯ މަސައްކަތް ކުރަމުންދާ ކަމަށް އެޑިއުކޭޝަން މިނިސްޓަރު ވިދާޅުވެއްޖެ އެވެ.
ރައްޔިތުންގެ މަޖިލީހަށް މިއަދު ހާޒިރުކޮށް މެންބަރަކު ކުރެއްވި ސުވާލަކަށް ޖަވާބުދެއްވަމުން އެޑިއުކޭޝަން މިނިސްޓަރު، އިސްމާއިލް ޝަފީއު ވިދާޅުވީ ރާއްޖޭގަައި ހިންގާ 217 ސްކޫލްގެ ތެރެއިން މިހައިތަނަށް 61 ޕަސެންޓު ސްކޫލްތަކުގައި އޭސީ ހަރުކޮށް ނިންމާފައިވާ ކަމަށެވެ.
"އަޅުގަނޑުމެން ބޭނުން ވަރަށް އަވަހަށް ނިންމަން، އެކަމަކު ހުންނަ ގޮންޖެހުންތައް ހުންނާނެ، އެ ގޮންޖެހުންތަކާ އެކުގައި ވެސް އިރާދަކުރެއްވިއްޔާ އަޅުގަނޑުމެންގެ ޓާގެޓަކީ ހަމަ ދެވަނަ ޓާމު ފެށެންވާއިރަށް ގިނަ ސްކޫލްތަކުގައި މި މަސައްކަތް ނިންމާލުން،" ޝަފީއު ވިދާޅުވި އެވެ.
ދިރާސީ އައު އަހަރުގެ ކިޔެވުން ފެށިއިރު ސްކޫލުތައް އޭސީ ކުރުމުގެ މަޝްރޫއު ނުނިމުނު
އަދަދު އަށް އެނގިފައިވާ ގޮތުގައި ސްކޫލްތައް އޭސީ ކުރުމަށް ބޭނުންވާ އޭސީތައް ބައެއް ރަށްރަށަށް ފޮނުވާ ނުނިމޭއިރު، ގިނަ ރަށްތަކުގެ ސްކޫލްތައް އޭސީކުރުމުގެ މަސައްކަތް މިހާތަނަށް ނިމިފައެއް ނުވޭ.
މިނިސްޓަރު ވިދާޅުވީ ބާކީ ހުރި ސްކޫލްތަކަށް ވެސް އޭސީ ފޮނުވައި ނިމިފައިވާ ކަމަށާއި މިހާރު ކުރިއަށް ދަނީ އެ ސްކޫލްތަކުގެ ކަރަންޓު ވިއުގަ އަޕްގްރޭޑު ކުރުމުގެ މަސައްކަތް ކަމަށެވެ. އެ ސްކޫލްތަކުގެ ތެރޭގައި 45 އަހަރަށްވުރެ ދުވަސްވެފައިވާ ސްކޫލްތައް ހިމެނޭތީ އެ މަސައްކަތް ނުކޮށް އޭސީ ހަރުނުކުރެވޭކަން މިނިސްޓަރު ފާހަގަކުރެއްވި އެވެ.
ރާއްޖޭގެ ހުރިހާ ސްކޫލެއް އޭސީ ކުރުމުގެ މަޝްރޫއު ސަރުކާރުން ފެށީ ޖޫން 2، 2024 ގަ އެވެ. އެ މަޝްރޫއު ފެނަކަ އާ ހަވާލުކުރީ މިދިޔަ އަހަރުގެ ޖޫން 12، ގައި 55 މިލިއަން ރުފިޔާއަށެވެ.
ނަމަވެސް ބީލަމަށް ނުލައި ސަރުކާރުން ނޮވެމްބަރު 6، ގައި ބަހާލި 206 މަޝްރޫއުތަކުގެ ތެރޭގައި ސްކޫލްތައް އޭސީކުރުމުގެ މަޝްރޫއު އެސްޓާސްއާ ހަވާލުކުރި އެވެ. އެ މަޝްރޫއު އެސްޓާސްއާ ހަވާލުކުރީ 58.4 މިލިއަން ރުފިޔާއަށެވެ. އެއީ ފެނަކައާ ހަވާލުކުރި އަގަށްވުރެ 3.4 މިލިއަން ރުފިޔާ ބޮޑު އަގެކެވެ.
ސްކޫލްތައް އޭސީ ކުރުމުގެ މަޝްރޫއު މި އަހަރުގެ ދިރާސީ އަހަރު ފެށުމުގެ ކުރިން ނިންމާނެ ކަމަށް މީގެ ކުރިން ސަރުކާރުން ބުންޏެވެ. ޖެނުއަރީ 22، 2025 ގައި މުހައްމަދު މުއިއްޒު ވިދާޅުވީ އިޔާދަކުރަނިވި ހަކަތަ ބޭނުންކޮށްގެން ރާއްޖޭގެ ހުރިހާ ސްކޫލެއް އެ އަހަރުގެ ސެޕްޓެމްބަރަށް އޭސީކޮށް ނިންމާނެ ކަމަށެވެ.
