ވެރިކަން ކުރާ ޕީޕަލްސް ނެޝަނަލް ކޮންގްރެސް (ޕީއެންސީ) އަށް ރައްޔިތުންގެ މަޖިލީހުގެ މެޖޯރިޓީ ލިބުމުން ޑޮލަރުގެ އަގު ތިރިކުރާނެ ކަމުގެ ޔަގީންކަން އިކޮނޮމިކް މިނިސްޓަރު ސައީދު ދެއްވިތާ ދެ އަހަރު ފަހުން ވެސް، ޑޮލަރު އަގު އުފުލިފައި ހުރީ އިދިކޮޅު މޯލްޑިވިއަން ޑިމޮކްރަޓިކް ޕާޓީ (އެމްޑީޕީ) ގެ ދެ ސަރުކާރުގެ ސަބަބުން ކަމަށް ދޭހަވާ މޭރުމަކުން މިނިސްޓަރު ވާހަކަ ދައްކަވައިފި އެވެ.
މިއަދުގެ މަޖިލިސް ޖަލްސާގައި ސައީދުއާ އެ ސުވާލު އަމާޒުކުރެއްވީ ވައިކަރަދޫ ދާއިރާގެ މެންބަރު ހުސައިން ޒިޔާދު (ފިއްޓޭ) އެވެ. އެ ސުވާލުގެ ޖަވާބުގައި، ޑޮލަރުގެ އަގު އުފުލުނީ އަދި ތިރި ނުވެގެން އުޅެނީ އެމްޑީޕީގެ ދެ ސަރުކާރުގެ ސަބަބުން ކަމަށް ސައީދު ވިދާޅުވި އެވެ.
"ގާނޫނު ސަސްޕެންޑުކުރީ ވެސް މިދިޔަ ސަރުކާރުން. ގާނޫނު ސަސްޕެންޑުކޮށް ފައިސާ ޗާޕުކުރަމުން ދިޔައީ. އޭގެ ނަތީޖާ މިއަދު ބައްދަލުކުރާނެކަން އެ ވާހަކަ ދެއްކިން. ރައީސް ނަޝީދުގެ ސަރުކާރުގެ 10ރ. އާއި 15ރ. ގެ ދޭތެރޭގެ ބޭންޑެއް އެޅި ވާހަކަ ދެއްކި. އޭގެ ސަބަބުން ރައްޔިތުންނަށް ސަލާމަތް ނުވެވިގެން މި އުޅެނީ،" ސައީދު ވިދާޅުވި އެވެ.
ޑޮލަރާ ގުޅޭ މައުލޫމާތު ބޭންކް އޮފް މޯލްޑިވްސް (ބީއެމްއެލް) އާއި މަރުކަޒީ ބޭންކުން ހާމަކުރަމުންދާ ކަމަށް ވިދާޅުވެ ސައީދު އެ ސުވާލަށް ޖަވާބެއް ނުދެއްވަ އެވެ.
"ޑޮލަރުގެ މައުލޫމާތު ބޭންކް އޮފް މޯލްޑިވްސްއިން، ބޭންކުގެ ސީއީއޯ ހަފްތާއަކު އެކި ފޯރަމްތަކުގައި އެ ގެންދަވަނީ ޖަވާބު ދެއްވަމުން. އަދި ސެންޓަރްލަ ބޭންކުން ވެސް މިއާ ބެހޭ މައުލޫމާތު ދަނީ އެ ގެންދަވަމުން،" ސައީދު ވިދާޅުވި އެވެ.
ޑޮލަރުގެ މައްސަލައިގައި މިއަދު ސައީދުއާ ސުވާލު ކުރެއްވީ މަރަދޫ ދާއިރާގެ މެންބަރު އަހުމަދު ދީދީ އެވެ. އޭނާ ސުވާލުކުރީ މީގެ ދެ އަހަރެއްހާ ދުވަސްކުރިން 20 މަޖިލިސް އިންތިހާބުގެ ކެމްޕޭނުގައި ލ. މާވަށުގައި ވާހަކަ ދައްކަވަމުން، މަޖިލީހުގެ މެޖޯރިޓީ ލިބިއްޖެ ނަމަ ޑޮލަރުގެ އަގު ތިރި ކުރައްވާނެ ކަމަށް ވިދާޅުވީ ދިރާސާއެއް ހެއްދެވުމަށްފަހުތޯ ސާފުކުރުމަށެވެ.
އެ ސުވާލުގެ ޖަވާބުގައި ސައީދު ފާހަގަކުރެއްވީ މަޖިލީހުގެ މެޖޯރިޓީ ޕީއެންސީއަށް ލިބުމަކީ ބޮޑު ނަސީބެއް ކަމަށެވެ. އެހެން ނޫންނަމަ ރާއްޖެ އޮންނާނީ ބަނގުރޫޓުވެފައި ކަމަށް ވިދާޅުވެ ސުވާލަށް ޖަވާބު ނުދީ ކުރީ ސަރުކާރާ ގުޅޭގޮތުން ފާއިތުވި ދެ އަހަރާއި ބައިގައި އޭނާ ދައްކަވަމުންދާ ވާހަކަ ތަކުރާރު ކުރެއްވި އެވެ.
"ރާއްޖެ އެ އޮތީ ހަމަޖެހުމުގެ ނޭވާއަކާ ހަމައަށް ގެނެވިފައޭ. އަޅުގަނޑު ހަމްދު ކުރަން. އަޅުގަނޑުމެން މިއަދު ކުރިއަށްދާންވީ، އިކޮނޮމީ ބިލްޑު ކުރުމަށް ވާދަވެރިން ވެސް މަސައްކަތް ކުރަންވީ، އަޅުގަނޑުމެންނަށް އެއްބާރުލުން ދޭންވީ،" ދީދީގެ ސުވާލަށް ޖަވާބު ނުދެއްވާ ސައީދު ވިދާޅުވި އެވެ.
ސައީދު މިހާރު މިހެން ވިދާޅުވަމުން ގެންދެވި ނަމަވެސް ރައްޔިތުންގެ މަޖިލިސް އިންތިހާބުގެ ކެމްޕެއިނުގެ ދުވަސްވަރު، ލ. މާވަށުގައި ބޭއްވި ޖަލްސާއެއްގައި ވިދާޅުވީ ޑޮލަރުގެ އަގު 15 ރުފިޔާ 42 ލާރިއަށް ވުރެ ވެސް ބޮޑަށް ތިރި ކުރާނެ ކަމަށެވެ.
"ހަމައެކަނި އަޅުގަނޑުމެންނަށް މަޖިލީހުގެ މެޖޯރިޓީ ލިބިގެން ވިޔަސް ދިވެހި ރުފިޔާ ޑޮލަރުގެ ކުރިމަތީގައި 30-40 ޕަސެންޓް ވަރުގަދަވެގެންދާނެ. ކޮބައިތޯ ނަތީޖާއަކަށް ވާނެ ކަމަކީ. 15.42 އަކަށްވުރެ ވެސް ޑޮލަރު ރޭޓް ދަށަށް ދިޔުމެއް ނޫންތޯ މުސްތަގުބަލުގައި،" ސައީދު އެއިރު ވިދާޅުވެފައިވެ އެވެ.
ޑޮލަރުގެ ކަޅު ބާޒާރުގައި ރެކޯޑު އަގަކަށް ޑޮލަރުގެ އަގު އުފުލިފައި ހުންނަތާ އެތައް މަސްތަކެއް ވޭތުވެފައިވާއިރު، އަގު އުފުލުނު ފަހުން އެއަށް ވުރެ ދަށަށް ނުދާ ކަން ފާހަގަކުރެވެ އެވެ. މިއަދުގެ ރޭޓުތައް ބެލިއިރު ވެސް ޑޮލަރެއް ގަންނަން ލިބެނީ 20.50ރ. އަށްވުރެ މަތީ ރޭޓުތަކުގަ އެވެ.
