ޑިވެލޮޕްމަންޓް ޕީޑިއެޓްރިކްސްގެ ދާއިރާއިން މަތީ ތައުލީމު ހާސިލު ކުރެއްވި ފުރަތަމަ ދިވެހި ޑޮކްޓަރު، އައިމިނަތު ފަޒްނާ މިއަދު ނިޔާވެއްޖެ އެވެ.
އެނގިފައިވާ ގޮތުގައި ގދ. ގައްދޫއަށް ނިސްބަތްވެވަޑައިގަންނަވާ ފަޒްނާ ނިޔާވިއިރު، އޭނާ ގެންދެވީ ކެންސަރު ބައްޔަށް ފަރުވާ ކުރައްވަމުންނެވެ. ނިޔާވީ، ބައްޔަށް ފަރުވާ ކުރާތާ ދުވަސްގަނޑެއް ފަހުން ކަމަށް އެނގިފައިވެ އެވެ.
ޑރ. ފަޒްނާ، 47، ނިޔާވީ އައިޖީއެމްއެޗް ހޮސްޕިޓަލުގައި ފަރުވާ ހޯއްދަވަމުންދަނިކޮށެވެ. މައްޔިތާގެ މައްޗަށް ކުރާ ކަށުނަމާދު އޮންނާނީ މިރޭ އިޝާ ނަމާދަށްފަހު އާސަހަރާ މިސްކިތުގަ އެވެ.
ފަޒްނާ މަތީ ތައުލީމު ހާސިލު ކުރެއްވީ ނެޝަނަލް ޔުނިވާސިޓީ އޮފް މެލޭޝިޔާ އަދި އެމެރިކާގެ ޔުނިވާސިޓީ އޮފް ކެލިފޯނިއާއިންނެވެ. އޭނާ ރާއްޖެ ވަޑައިގެން އައިޖީއެމްއެޗް ހޮސްޕިޓަލުގައި ހިދުމަތް ކުރައްވަން ފެއްޓެވީ އޮކްޓޯބަރު، 2024، ގަ އެވެ.
ޑިވެލޮޕްމަންޓް ޕީޑިއެޓްރީޝަނުންނަކީ އޯޓިޒަމް، އޭޑީއެޗްޑީ އަދި އުނގެނުމުގެ އުނދަގޫތައް ހުންނަ ކުޑަކުދިން ޑަޔަގްނޯސް ކުރަން ހާއްސަ ޑޮކްޓަރުންނެވެ. ޑރ. ފަޒްނާ ވަނީ އެ ދާއިރާއިން އެމެރިކާގައި ތިން އަހަރު ކިޔަވައިވިދާޅުވެފަ އެވެ.
އައިޖީއެމްއެޗްގެ އިތުރުން، ފަރުވާ ކްލިނިކް، ކުލުނު ކްލިނިކް، ސްޕެކްޓްރަމް ޗިލްރެން ޑިވެލޮޕްމަންޓް ސެންޓަރުގައި ވެސް ފަޒްނާ ދިޔައީ މަސައްކަތް ކުރައްވަމުންނެވެ.
