ރައީސް މުހައްމަދު މުއިއްޒުގެ ޖިންސީ ޝިކާރައަކަށްވި ކަމަށް ތުހުމަތު ކުރާ ރައީސް އޮފީހުގައި ކުރިން މަސައްކަތްކުރި މުވައްޒަފެއްގެ ވާހަކަ ގެނެސްދިން ޑޮކިއުމެންޓަރީ "އައިޝާ" ގެ މައްސަލައިގައި ފުލުހަށް ހާޒިރުކުރި ރައީސް އޮފީހުގެ ކުރީގެ މުވައްޒަފު ތަހުގީގަށް ހުރިހާ ވާހަކައެއް ކިޔައިދޭން ނިންމާފައިވާ ކަމަށް އޭނާގެ ގާނޫނީ ވަކީލު ހުސައިން ޝަމީމް މިރޭ ވިދާޅުވެއްޖެ އެވެ.
ނޫސްވެރިންނަށް މައުލޫމާތު ދެއްވަމުން ޝަމީމް ވިދާޅުވީ އޭނާގެ ކްލައިންޓް ބޭނުންވަނީ ތުހުމަތުކުރާ މައްސަލައާ ގުޅިގެން ފޯންކޯލްތަކާއި މެސެޖުތައް ހިއްސާކޮށް، ތަހުގީގަށް ދޭންޖެހޭ ހުރިހާ އެއްބާރުލުމެއްދީ ހުރިހާ ވާހަކައެއް ކިޔައިދޭން ކަމަށެވެ.
"އަޅުގަނޑުމެން މިތިބީ ފުލުހަށް ބޭނުންވާ އެހީތެރިކަމާއި އެއްބާރުލުން، ތަހުގީގަށް ބޭނުންވާ އެއްބާރުލުން ފުރިހަމައަށް ދޭން. ހުރިހާ ވާހަކައެއް ކިޔައިދޭން ބޭނުންވޭ، މިކަން ހިނގައިދިޔަ ގޮތާއި. ފުލުހުން ތުހުމަތުކުރާ ކޮންމެ ކަމެއް ފުލުހުންގެ ތަހުގީގަށް ބަޔާނެއް ތަފްސީލުތަކާ އެއްކޮށް ފޯންކޯލްތަކާއި މެސެޖުތަކާއި އެހެން ހުރިހާ ތަފްސީލްތަކާ އެއްކޮށް އަޅުގަނޑުގެ ކްލައިންޓް ބޭނުންފުޅުވޭ،" އޭނާ ވިދާޅުވި އެވެ.
މައްސަލައާ ގުޅިގެން ތަހުގީގަށް ބަޔާން ނެގުމަށް ރައީސް އޮފީހުގެ މުވައްޒަފު މާދަމާ ފުލުހަށް ހާޒިރުކުރާނެ ކަމަށް މައުލޫމާތު ލިބެ އެވެ.
ތަހުގީގު ބޭނުމަށް އެ މުވައްޒަފު ފުރުންވެސް ވަނީ މަނާކޮށްފަ އެވެ. އޭނާ ފުރުން މަނާކުރީ ފުލުހުން ކޯޓަށް ހުށަހެޅި ސިއްރު އިންޓެލިޖެންސް ރިޕޯޓަކަށް ބިނާކޮށެވެ. އޭނާ ފުރުން މަނާ ކުރި ނަމަވެސް ދިރިއުޅެމުންދާ ގެ ބަލައިފާސްކޮށްފައެއް ނުވެ އެވެ.
ޑޮކިއުމެންޓަރީގެ މައްސަލަ ބަލަން އަމުރު ކުރީ މުއިއްޒެވެ. އެމަނިކުފާނު އެގޮތަށް އެންގިތާ މަދު ގަޑިއިރުތަކެއްގެ ތެރޭގައި ފުލުހުން ވަނީ އަދަދު ނޫހުގެ އޮފީހަށް ވަދެ ލެޕްޓޮޕްތަކާއި ހާޑްޑިސްކުތަކެއް ގެންގޮސްފަ އެވެ.
އެ މައްސަލައާ ގުޅިގެން އަދަދު ނޫހަށް ރެއިޑު ކުރުމުގެ އިތުރުން މި ނޫހުގެ ސީއީއޯ ހުސެއިން ފިޔާޒް މޫސާ އަދި މެނޭޖިން އެޑިޓަރު ހަސަން މުހައްމަދުގެ ޕާސްޕޯޓު ހިފަހައްޓަން ފުލުހުން އެދިގެން ކްރިމިނަލް ކޯޓުން ވަނީ އަމުރެއް ނެރެފަ އެވެ. އަދި އެ މައްސަލައިގެ ތަހުގީގަށް ފިޔާޒް އާއި ހަސަން ވަނީ މިދިޔަ ހަފުތާގައި ފުލުސް އޮފީހަށް ވެސް ހާޒިރުކޮށްފަ އެވެ.
