ސަރުކާރުގެ އާ ތަރުޖަމާނު މުހައްމަދު ހުސެއިން ޝަރީފް (މުންދު) ބޭއްވެވި ފުރަތަމަ ނޫސްވެރިންގެ ބައްދަލުވުމުގައި، ސިޔާސީ މުވައްޒަފުންގެ އަދަދު 700 އަށް ވުރެ އިތުރު ނުކުރުމަކީ ސަރުކާރުގެ ވައުދެއް ނޫން ކަމަށް ވިދާޅުވެ ދޮގު ހަދައިފި އެވެ.
ބުރާސްފަތި ދުވަހު މުންދު ބޭއްވި ނޫސްވެރިންގެ ބައްދަލުވުމުގައި އަދަދު އިން ކުރި ސުވާލަކަށް ޖަވާބު ދެއްވަމުން އޭނާ ވިދާޅުވީ، ސިޔާސީ މުވައްޒަފުންގެ އަދަދު 700 އަށް ވުރެ ގިނަ ނުކުރުމަކީ އަމާޒެއް ކަމަށާއި އެއީ ވައުދެއް ނޫން ކަމަށެވެ.
"މިސާލަކަށް 700 ވަޒީފާއަކީ ރިޔާސީ ވައުދެއް ނޫން. އެއީ ރިޔާސީ ވައުދެއް ނޫން. އެކަމަކު އިންތިގާލީ މަރުހަލާގައި އަމާޒެކޭ އެއީ،" މުންދު ވިދާޅުވި އެވެ.
މުންދު އެހެން ވިދާޅުވި ނަމަވެސް އޮކްޓޯބަރު 10، 2023، ގައި ރައީސް މުހައްމަދު މުއިއްޒު ސަރުކާރުގެ އިންތިގާލީ ތަރުޖަމާނު ފިރުޒުލް އަބްދުﷲ ބޭއްވެވި ނޫސްވެރިންގެ ބައްދަލުވުމެއްގައި އޭނާ ސަރީހަ އިބާރާތުން ވިދާޅުވެފައި ވަނީ ސަރުކާރުގެ ސިޔާސީ މަގާމުތަކުގެ އަދަދު 700 އަށް ވުރެ ގިނަ ނުކުރަން ނިންމާފައިވާ ކަމަށެވެ.
"އިންތިހާބީ ރައީސުލްޖުމްހޫރިއްޔާ މި ވަނީ، ސަރުކާރު އެކުލަވާލުމުގައި ސިޔާސީ މަގާމުތަކާ ގުޅޭ ގޮތުން މުހިންމު ނިންމުމެއް ނިންމަވާފައި. އިންތިހާބީ ރައީސުލްޖުމްހޫރިއްޔާ ނިންމަވާފައި ވަނީ އެ މަނިކުފާނުގެ ސަރުކާރުގެ ސިޔާސީ މަގާމުތަކުގެ އަދަދު 700 އަށް ވުރެ ގިނަ ނުކުރުމަށް،" ފިރުޒުލް ވިދާޅުވި އެވެ.
ފިރުޒުލްގެ ނޫސްވެރިންގެ ބައްދަލުވުމުގައި އޭނާ ވަނީ ސިޔާސީ މުވައްޒަފުންގެ އަދަދު ކަނޑައެޅި ގޮތް ވެސް ތަފުސީލުކޮށްދެއްވައިފަ އެވެ.
"އިންތިހާބީ ރައީސުލްޖުމްހޫރިއްޔާ 700 މި އަދަދު ނިންމަވާފައި ވަނީ ސަރުކާރުގެ ވުޒާރާތަކާއި ރައީސުލްޖުމްހޫރިއްޔާގެ އޮފީހާއި ރައީސުލްޖުމްހޫރިއްޔާގެ ގެކޮޅާއި ނައިބުރައީސްގެ ގެކޮޅާއި މި ހުރިހާ ތަނެއްގައި މަސައްކަތް ކުރާ އިދާރީ މުވައްޒަފުން ހިމެނޭހެން އެމަނިކުފާނު ނިންމަވާފައި ވަނީ އެމަނިކުފާނުގެ ސަރުކާރުގެ ސިޔާސީ މަގާމުތައް 700 އަށް ވުރެ ގިނަ ނުކުރުމަށް،" ފިރުޒުލް ވިދާޅުވި އެވެ.
މި ސަރުކާރުން އައްޔަން ކޮށްފައިވާ ސިޔާސީ މުވައްޒަފުންގެ އަދަދު 2000 އާ ގާތް ކުރާނެ ކަމަށް ބެލެވެ އެވެ. ނަމަވެސް އެ މައުލޫމާތު ނުދީ ސަރުކާރުން ހިފަހައްޓާތީ އެ އަދަދު ކަށަވަރެއް ނުވެ އެވެ.
