ލަންޑަން (އޭޕްރީލް 30) - މަނާބޭހުގެ މައްސަލައެއްގައި ސަސްޕެންޝަންގައި ހުރި ޗެލްސީ އަށް ކުޅޭ ޔޫކްރެއިންގެ ތަރި، މިހައިލޯ މުޑްރިކް، އޭނާގެ ސަސްޕެންޝަންގެ މައްސަލައިގައި ހައްލެއް ހޯދުމަށްޓަކައި، ކުޅިވަރުގެ އެންމެ މަތީ ކޯޓު، ކޯޓް އޮފް އާބިޓްރޭޝަން ފޯ ސްޕޯޓްސް (ކާސް) އަށް ހުށަހަޅައިފި އެވެ.
އުމުރުން 25 އަހަރުގެ މުޑްރިކް މަނާބޭހެއް ބޭނުންކުރި މައްސަލައެއްގައި ސަސްޕެންޝަނުގައި ހުރި މުއްދަތުގައި މިހާރު ވަނީ 18 މަހެއްހާ ދުވަސް ހޭދަވެފަ އެވެ. މުޑްރިކްގެ ޔޫރިން ޓެސްޓަކުން މަނާބޭހަށް ޕޮޒިޓިވްވި މައްސަލައެއްގައި އޭނާ އަށް ވަގުތީ ސަސްޕެންޝަނެއް އައީ 2024 ވަނަ އަހަރުގެ ޑިސެމްބަރު މަހު އެވެ. އޭގެ ފަހުން، 2025 ވަނަ އަހަރުގެ ޖޫން މަހު، މުޑްރިކް އަށް އިނގިރޭސި އެފްއޭ އިން އައި ސަސްޕެންޝަނުގައި އޮތީ ހަތަރު އަހަރެވެ.
އެކަމަކު، މުޑްރިކް އަށް ދީފައިވާ މި ސަސްޕެންޝަނުގެ ފުރިހަމަ މައުލޫމާތުތަކެއް އިނގިރޭސި އެފްއޭ އިން ހުށަހަޅާފައިނުވެ އެވެ. މި ކަހަލަ މައްސަލަތަކުގައި އަމަލުކުރަމުން އަންނަ ގޮތަށް ބަލާއިރު، މުޑްރިކް އަށް މި ސަސްޕެންޝަނުން ސަލާމަތްވެ، އެންމެ އަވަހަށް ކުޅުމަށް އެނބުރި އާދެވޭނީ، 2028 ވަނަ އަހަރުގެ ޑިސެމްބަރު މަހު އެވެ. އެކަމަކު، މުޑްރިކް މި ވަނީ، މި މައްސަލައިގައި ހަގީގަތް ސާފުކޮށް، އޭނާ އަށް ދިފާއީ ގޮތުން ވާހަކަ ދައްކަން ފުރުސަތު ހޯދުމުގެ ގޮތުން ކާސް އަށް މައްސަލަ ހުށަހަޅައިފަ އެވެ.
ސްވިޒަލެންޑްގައި ގާއިމްވެފައި ހުރި، ކާސް އިން ބުނެފައިވަނީ، މުޑްރިކްގެ ފަރާތުން މިދިޔަ ފެބްރުއަރީ މަހުގެ 25 ވަނަ ދުވަހު، ސަސްޕެންޝަންގެ މައްސަލައިގައި އެޕީލްގެ ލިޔެކިޔުންތައް ލިބިފައިވާ ކަމަށެވެ. މި މައްސަލައިގައި މުޑްރިކްގެ ވަކީލުންގެ ގޮތުގައި ހަމަޖައްސާފައިވަނީ، ފްރާންސްގެ މިޑްފީލްޑަރު، ޕައުލް ޕޮގްބާގެ މަނާބޭހުގެ މައްސަލައިގައި ކޯޓުގައި ވަކާލާތު ކޮށްދިން ލީގަލް ޓީމު ކަމަށްވާ، މޯގަން ސްޕޯޓްސް ލޯ އެވެ.
ޕޮގްބާ އަށް ވެސް ފުރަތަމަ ހަތަރު އަހަރުގެ ސަސްޕެންޝަނެއް އަތުވި ނަމަވެސް، ކާސް އަށް ގޮސްގެން، 18 މަސް ދުވަހަށް އެ ސަސްޕެންޝަންގެ މުއްދަތު ވަނީ ކުޑަކޮށްފަ އެވެ.
އާސެނަލްގެ ޑީލެއް، 2023 ވަނަ އަހަރު، ހައިޖެކްކުރުމަށް ފަހު، ޗެލްސީން މުޑްރިކްގެ ސޮއި ހޯދީ ޔޫކްރެއިންގެ ޝަހުތަރު ޑޮނެސްކަށް 100 މިލިއަން ޑޮލަރު ދައްކައިފަ އެވެ. ޗެލްސީ އަށް ކުޅުނު 73 މެޗުން މުޑްރިކަށް ޖެހުނީ އެންމެ 10 ގޯލެވެ. ސަސްޕެންޝަންގައި ހުރި ނަމަވެސް، ޗެލްސީން އަންނަނީ ބަރާބަރަށް މުޑްރިކްގެ މުސާރަ ދެމުންނެވެ. އެއީ، އަހަރަކަށް ގާތްގަނޑަކަށް ހަތް މިލިއަން ޑޮލަރެވެ.
