ލަންޑަން (އޭޕްރީލް 28) - ހުސްވެފައިވާ ޗެލްސީގެ ކޯޗުގެ މަގާމު، ބޯންމައުތުގެ ކޯޗު، ސްޕެއިނުގެ އަންޑޯނީ އިރައޯލާ ހަވާލުކުރެވޭތޯ މަޝްވަރާތައް ފަށާފައިވާ ކަމަށް މީޑިއާ ރިޕޯޓްތައް ބުނެފި އެވެ.
ފަސް އަހަރާއި ބައިގެ ކޮންޓްރެކްޓެއްގެ ދަށުން ޗެލްސީގެ ކޯޗަކަށް ގެނައި، ލިއަމް ރޮސެނިއާ، ތިން މަސް ދުވަހަށް ފަހު މަގާމުން ވަކިކޮށްފައިވަނީ މީގެ ހަ ވަރަކަށް ދުވަސް ކުރިންނެވެ. ޗެލްސީން ނިންމާފައިވަނީ މި ސީޒަނުގެ ބާކީބައިގައި، ކުޅޭނީ ވަގުތީ ކޯޗު، ކަލުމް މެކްފާލޭންގެ އިރުޝާދުގެ ދަށުންނެވެ. މިއީ، މި ސީޒަނުގައި އޭނާ ވަގުތީ ގޮތުން ޗެލްސީ އަށް ކޯޗުކޮށްދޭ ދެ ވަނަ ފަހަރެެވެ. އެ ގޮތުން، ޖެނުއަރީ މަހު، އެންޒޯ މަރެސްކާ، ޗެލްސީގެ ކޯޗުކަމުން ވަކިކޮށް، ރޮސެނިއާއާ އެ ޓީމު ހަވާލުވުމުގެ ކުރިން، މެކްފާލޭން ވަނީ ދެ މެޗެއްގައި ޗެލްސީ އަށް ކޯޗުކޮށްދީފަ އެެވެ.
ޗެލްސީން އާ ކޯޗެއް ހޯދުމުގެ މަސައްކަތް ކުރަމުން އަންނައިރު، އެ ޓީމުން ބޭނުންވާ ކޯޗުންގެ ލިސްޓުގެ ތެރޭގައި، ރެއާލް މެޑްރިޑުން މި ސީޒަނުގައި ވަކިކުރި ކޯޗު، ޒަބީ އަލޮންސޯ އާއި ކޯމޯގެ ކޯޗަކަށް ހުރި ސެސްކް ފަބްރެގަސް ހިމެނެ އެވެ. އަދި، ކުރިން ޗެލްސީ އަށް ކޯޗުކޮށްދިން ބެންފީކާގައި މިހާރު ހުރި ހޯސޭ މޮރީނިއޯ ނޫނީ ނަޕޯލީގެ ކޯޗަކަށް ހުރި އެންޓޯނިއޯ ކޮންޓޭ އަލުން ގެންނަން އުޅޭ ކަމަށް ވެސް މީޑިއާގައި އަންނަނީ ވާހަކަ ދެކެވެމުންނެވެ.
އެކަމަކު، ފުޓްބޯލް ލަންޑަން އާއި އިނގިރޭސި އެހެން ނޫސްތަކުން ރިިޕޯޓްކުރާގޮތުގައި، ޗެލްސީން މިހާރު ވަނީ އިރައޯލާއާ އެކު މަޝްވަރާތައް ފަށައިފަ އެވެ. އަދި، އިރައޯލާ ހުރީ ޗެލްސީގެ ޕްރޮޖެކްޓާ މެދު ޝައުގުވެރިވެފަ އެވެ.
މީގެ އަށް އަހަރު ކުރިން އިރައޯލާ ކޯޗިން ކެރިއަރު ފެށީ ސައިޕްރަސްގެ އޭއީކޭ ލަނާކާ އިންނެވެ. އެ ޓީމަށް 2018-2019 ސީޒަނުގައި ކޯޗުކޮށްދިނުމަށް ފަހު، ޖެހިގެން އައި ސީޒަނުގައި، ސްޕެއިނުގެ މިރަންޑެސް އަށް ކޯޗުކޮށްދިންނެވެ. އެ ކްލަބްގައި ކުރި މަސައްކަތް ރަނގަޅުވުމުން 2020-2023 އަށް ރަޔޯ ވަޔެކާނޯގައި ކޯޗުކޮށްދޭން ފުރުސަތެއް ލިބުނެވެ. ވަޔެކާނޯ އަށް ފަހު، ދެން، އިރައޯލާ ފެނުނީ ބޯންމައުތުގެ ކޯޗެއްގެ ގޮތުގަ އެވެ.
އިރައޯލާ، ބޯންމައުތުގެ ކޯޗުކަމާ ހަވާލުވީ 2023 ވަނަ އަހަރުގެ ޖޫން މަހު އެވެ. އެއީ، އޭރު އެ ޓީމުގެ ކޯޗަކަށް ހުރި ގެރީ އޮނީލް ވަކިކުރުމަށް ފަހު ބޯންމައުތު މެނޭޖްމަންޓުން ގެނައި ބަދަލެކެވެ. އިރައޯލާ އަށް ދެ އަހަރުގެ ކޮންޓްރެކްޓެއް އެންމެ ފުރަތަމަ ބޯންމައުތުން ދިންއިރު، ފަހުން އެ އެއްބަސްވުން އާ ކޮށް މި ސީޒަން ނިމުމުން އޭނާ ބޯންމައުތު ދޫކޮށްލާނީ، ތިން އަހަަރު އެ ޓީމުގައި ހޭދަކޮށްފަ އެވެ. ބޯންމައުތުން ކޯޗަކަށް ގެންނަން ނިންމާފައިވަނީ، އާރްބީ ލައިޕްޒިގާއި ބޮރޫޝިއާ މުންޗެންގްލަޑްބެކް އަދި ބޮރޫޝިއާ ޑޯޓްމަންޑްގެ ކުރީގެ ކޯޗު މާކޯ ރޯސް އެވެ .
