އިރާނު ހަނގުރާމަ 4 ނުވަތަ 5 ހަފުތާއަށް ދެމިގެންދާނެ ކަމަށް ބެލެވުނަސް، އެއަށްވުރެ ދިގުލައިގެން ހިނގައިދާނެ ކަމަށް އެމެރިކާގެ ރައީސް ޑޮނަލްޑް ޓްރަމްޕް ވިދާޅުވެއްޖެ އެވެ.
ހޯމަ ދުވަހު ވައިޓް ހައުސްގައި ވާހަކަ ދައްކަވަމުން ޓްރަމްޕް ވިދާޅުވީ، ހަނގުރާމައިގެ ފުރަތަމަ ޕްލޭން އެގޮތަށް އޮތް ނަމަވެސް، އެއަށްވުރެ މާ ދިގު މުއްދަތަކަށް ހަނގުރާމަ ކުރިއަށް ގެންދަން ޖެހިއްޖެ ހާލަތެއްގައި ވެސް، އެކަމަށް ބޭނުންވާ ފުރިހަމަ ގާބިލްކަން އެމެރިކާއަށް ލިބިގެންވާ ކަމަށެވެ.
ޓްރަމްޕް ވިދާޅުވީ، އިރާނުގެ "އަސްކަރީ ލީޑަޝިޕް ނައްތާލުމަށް" އެންމެ ފުރަތަމަ ލަފާކުރީ ހަތަރު ހަފުތާގެ މުއްދަތެއް ނަގާނެ ކަމަށެވެ.
އެމެރިކާ އާއި އިޒްރޭލުން ފުރަތަމަ ދިން ހަމަލާތަކުގައި އިރާނުގެ ރޫހާނީ ލީޑަރު އަލީ ޚާމަނާއީ އާއި، އިސްލާމިކް ރިވޮލިއުޝަނަރީ ގާޑް ކޯޕްސްގެ ވެރިޔާ ހިމެނޭހެން އެ ގައުމުގެ އެތައް ވެރިންނެއް އަވަހަރާކޮށްލާފައިވެ އެވެ.
އިޒްރޭލާ ގުޅިގެން އިރާނާ ދެކޮޅަށް ހަނގުރާމައަށް ދިއުމަށް އެމެރިކާއިން ނިންމި ސަބަބުތައް ޓްރަމްޕް ބަޔާންކޮށް ދެއްވިއެވެ. އެމަނިކުފާނު ވިދާޅުވީ އިރާނަކީ އެމެރިކާއަށް އޮތް "ބޮޑު ނުރައްކަލެއް" ކަމަށެވެ.
މިދިޔަ އަހަރުގެ ޖޫން މަހު އިރާނަށް ދިން ހަމަލާތަކުގައި އެގައުމުގެ ނިއުކްލިއާ ޕްރޮގްރާމް "ފުނޑުފުނޑުކޮށްލެވިފައިވާ" ކަމަށް ޓްރަމްޕް ވިދާޅުވި އެވެ. ނަމަވެސް ބެލިސްޓިކް މިސައިލް ޕްރޮގްރާމް ވަރަށް ބާރަށް ކުރިއަރަމުންދާ ކަމަށާއި، އެއީ އެމެރިކާއަށާއި އެހެން ގައުމުތަކުގައި ތިބި އެމެރިކާގެ ސިފައިންނަށް އޮތް ވަރަށް ބޮޑު ނުރައްކަލެއް ކަމަށް ޓްރަމްޕް ވިދާޅުވި އެވެ.
"އިރާނުގެ ސަރުކާރު އަތުގައި މިހާރުވެސް ޔޫރަޕަށާއި، އެތެރެއާއި ބޭރުގައި ހުރި އަހަރެމެންގެ އަސްކަރީ މަރުކަޒުތަކަށް ހަމަލާދެވޭ ފަދަ މިސައިލް އެބަހުރި. އަދި މާލަސްތަކެއް ނުވެ އެމެރިކާއާ ހަމައަށް ފޯރާނެ މިސައިލްވެސް އެމީހުން ހޯދާނެ،" ހަނގުރާމަ ފެށުމުގެ ކުރިން ވެސް ދައްކަވަމުން އައި ވާހަކަ ޓްރަމްޕް ތަކުރާރުކުރެއްވި އެވެ.
ހޮނިހިރު ދުވަހު ފެށި ހަނގުރާމައިގައި މިހާތަނަށް އިރާނުން 555 މީހުން، ލުބުނާނުން 13 މީހުން، އިޒްރޭލުން 10 މީހުން، ޔޫއޭއީ އިން ތިން މީހުން، އަދި އިރާގުން 2 މީހުން މަރުވެފައިވެއެވެ. މީގެ އިތުރުން އޮމާން، ބަހްރެއިން އަދި ކުވެއިތުން ކޮންމެ ގައުމަކުން އެކަކު މަރުވި ކަމަށް ރިޕޯޓްކޮށްފައިވެއެވެ. އަދި އެމެރިކާގެ ސިފައިންގެ ހަތަރު މީހަކު މަރުވިކަން އެ ގައުމުން ބުނެފައިވެ އެވެ.
