އިޒްރޭލާއި އެމެރިކާއިން އިރާނަށް ދޭ ހަމަލާތައް ކުށްވެރިނުކޮށް، އިރާނުން ރައްދުގައި އަރަބި ގައުމުތަކަށް ދެމުންދާ ހަމަލާތަކާ ދެކޮޅުކަން މުހައްމަދު މުއިއްޒު ހާމަކުރައްވައިފި އެވެ.
ނޫސްވެރިންނާ ބައްދަލުކުރައްވާ މުއިއްޒު މިއަދު ވިދާޅުވީ އިރާނުން ދެމުންދާ ހަމަލާތަކާ ގުޅިގެން އަރަބި އިސްލާމީ ގައުމުތަކުގެ ވެރިންނަށް ގުޅައި އެ ގައުމުތަކާއެކު ރާއްޖެއިން އޮތްކަން ހާމަކުރުމުގެ މަސައްކަތް ކުރައްވަމުން ގެންދަވާ ކަމަށެވެ.
މިގޮތުން މުއިއްޒު ވިދާޅުވީ ޔޫއޭއީގެ ރައީސަށް ރޭ ފޯނުން ގުޅުއްވައި ރާއްޖެއިން އެ ގައުމާއެކު އޮތްކަން ހާމަކުރައްވާފައިވާ ކަމަށާއި އިރާނުން ދޭ ހަމަލާތަކުގައި ބޮޑެތި ގެއްލުންތަކެއް ލިބެމުންދާ ކަމަށެވެ.
"އަރަބި އިސްލާމީ ގައުމުތަކުގެ ވެރިންނަށް އަޅުގަނޑު އިރާދަކުރެއްވިއްޔާ ގުޅާ ވާހަކަދެއްކުން، ރާއްޖޭގެ ސަޕޯޓް އެފަރާތްތަކަށް އޮތްކަން ދެންނެވުމުގެ މަސައްކަތް އެބަކުރިއަށް ގެންދަން. މިހާރު ރޭގައި އަޅުގަނޑު ވާނީ ޔޫއޭއީގެ ރައީސާ ވާހަކަދައްކާފައި ފޯނު ކޯލެއްގައި،" މުއިއްޒު ވިދާޅުވި އެވެ.
"ރާއްޖޭގެ ސަޕޯޓު ޔޫއޭއީއަށް މިދިމާވެގެން އުޅޭ، އިރާނުން ދެމުންދާ ހަމަލާތަކާ ގުޅިގެން ލިބެމުންދާ ގެއްލުންތަކާ ގުޅިގެން މީހުންވެސް މަރުވޭ އެބަ. އިމާރާތްތަކަށްވެސް ގެއްލުންވޭ އެބަ. އެކަމާ ގުޅޭގޮތުން ރާއްޖޭގެ ފަރާތުން ދިވެހި ރައްޔިތުންގެ އެބޭފުޅުންނާ އެކީގައި ތިބިކަން ދަންނަވާފައިވާނެ."
މީގެއިތުރުން މިއަދު ސައިދީ އަރަބިއްޔާ އާއި ބަހުރައިން އާއި އޮމާން އަދި ގަތަރުގެ ވެރިންނަށް މިއަދު ގުޅައި އެ ގައުމުތަކާއެކު ވެސް ތިއްބެވިކަން ހާމަކުރައްވާނެ ކަމަށް މުއިއްޒު ވިދާޅުވި އެވެ.
އިޒްރޭލާއި އެމެރިކާއިން އިރާނަށް ދިން ހަމަލާ މުއިއްޒު ކުށްވެރި ނުކުރައްވާ ސަބަބެއް މިހާތަނަށް ހާހަމަކުރައްވާފައެއް ނުވެ އެވެ. އޭގެއިތުރުން އިރާނުގެ ރޫހާނީ ލީޑަރު އާޔަތުﷲ އަލީ ޚާމަނާއީ އަވަހާރަކޮށްލުމުން އެކަމާ ގުޅިގެން ވެސް ރާއްޖެއިން މިހާތަނަށް އެއްޗެއް ނުބުނެ އެވެ.
