ކެންސަރުގެ ބާވަތްތަކުގެ ތެރެއިން، ސައެންސްވެރިން ބުނާ ގޮތުގައި އެންމެ ވޭންދެނިވި ބާވަތަކީ ކަށީގެ ތެރެއަށް ފެތުރިގެންދާ ބާވަތުގެ ކެންސަރެވެ. އަދި އެންމެ ގިނަ މީހުން މަރުވާ ކެންސަރުގެ ބާވަތަކީ ވެސް އެއީއެވެ. އެހެންކަމުން ހަށިގަނޑުގެ އެހެން ގުނަވަނެއްގައި އުފެދިފައިވާ ކެންސަރުގެ އަސަރު ކަށިތަކާ ހަމައަށް ފެތުރޭ ހާލަތުގައި ފަރުވާ ކުރުމަށް އާ ބޭހެއް އީޖާދުކުރުމުގެ މަސައްކަތުގައި ސައެންސްވެރިން ވަނީ އެތައް އަހަރެއް ހޭދަކޮށްފައެވެ.
އެ ގޮތުން ޗައިނާގެ ޒޭޖިއާން ޔުނިވަސިޓީގެ ސައެންސްވެރިން މިހާރު ވަނީ ގެސްޑާމިން ބީ (gasdermin B) ކިޔާ ޕްރޮޓީނެއް އުފެއްދުމަށް އަމާޒުކޮށް އީޖާދުކުރި، ޑީއެންއޭ އެކުލެވޭ ފެޓީ ކެޕްސޫލެއް، ނޭނޯތެރަޕީއެއްގެ ގޮތުގައި އުފައްދައިފައެވެ. ނޭނޯ ތެރަޕީއަކީ 5-500 ނޭނޯމީޓަރުގެ ބޮޑުމިނުގައި ހުންނަ ވަރަށް ކުދިކުދި އެތިކޮޅުތަކެކެވެ. (ނޭނޯމީޓަރެއްގެ ބޮޑުމިނަކީ މީޓަރެއްގެ ބިލިއަން ބައިކުޅަ އެއް ބައެވެ.)
މި ކެޕްސޫލުން ކުރާނެ ކަމަކީ، ހަށިގަނޑުގައި ހުންނަ ދުޅަހެޔޮ ސެލްތަކަށް ގެއްލުމެއް ނުދީ، ކެންސަރު ސެލްތަކުގައި ގެސްޑާމިން ބީ ޕްރޮޓީން އުފެއްދުމެވެ. މި ކެޕްސޫލްގައި އެކުލެވޭ އޮޕްސާ (OPSA) ކިޔާ ކެމިކަލްއަކީ، ހަށިގަނޑުގައި ގުދުރަތީ ގޮތުން އެކުލެވިގެންވާ ކެންސަރާ އިދިކޮޅު ދިފާއީ ނިޒާމު އިތުރަށް ހަރަކާތްތެރި ކުރުވާނެ މާއްދާއެކެވެ.
އަލަށް މި އުފެއްދި ފަރުވާގެ އަޖުމަ ބެލުމުގެ ގޮތުން، ލެބޯޓެރީގައި މީދަލަށް މި ފަރުވާ ދިނުމުން އެދެވޭ ނަތީޖާއެއް ފެނުނު ކަމަށް ސައެންސްވެރިން ބުނެއެވެ. މީދަލުގެ ހަށިގަނޑުގައި މި ފަރުވާ ބޭނުންކުރުމުން، ކެންސަރު ސެލްތައް މަރާލައި، ހަށިގަނޑުގެ ދިފާއީ ނިޒާމުގެ މަސައްކަތް ހީވާގިވެގެން ދިޔަކަން ފާހަގަކުރެވުނެވެ.
މީދަލުގައި މި ފަރުވާގެ އަޖުމަ ބެލީ، ސިއްހަތު ސަލާމަތުން ތިބި މީދާތަކެއްގެ އެއް ފަޔަށް، އުރަމަތީ ކެންސަރުގެ ސެލްތަކެއް، އިންޖެކްޝަނެއްގެ ޒަރީއާއިން ފޮނުވައިގެންނެވެ. އެއަށް ފަހު އެ ފައިގެ ކަށިގަނޑުގައި ޓިއުމަރު އުފެދުމުން، މި ނޭނޯތެރަޕީގެ އިންޖެކްޝަން، ދެ ދުވަހުން އެއް ދުވަހު، ފަސް ދުވަސް ވަންދެން މީދާތަކުގެ ނަގުލަށް ޖެހިއެވެ.
ދެ ހަފުތާ ފަހުން ބެލި އިރު، މީދާތަކުގެ ފައިގެ ކަށީގައި އުފެދުނު ޓިއުމަރު ހުރީ، ފަރުވާ ފެށި އިރު ހުރި ވަރަށް ވުރެ 94 އިންސައްތަ ކުޑަވެފައެވެ. އަދި ކެންސަރު ސެލްތައް ވެއްދި ފައިގެ ހަރަކާތްތައް ވެސް މުޅިން ރަނގަޅުކަން ފާހަގަކުރެވުނެވެ. މިއިން އެނގުނީ ނޭނޯތެރަޕީގެ ފަރުވާއިން، ކެންސަރު ޓިއުމަރު އުފެދިފައިވާ ގުނަވަނުގައި އަޅާ ވޭން ކުޑަވެގެންދާ ކަމެވެ.
