ނިއު ދިއްލީ، އިންޑިއާ (ޑިސެމްބަރު 20) - އަންނަ އަހަރު ސްރީ ލަންކާ އާއި އިންޑިއާގައި ހޯސްްޓްކުރާ ޓީ20 ކްރިކެޓް ވޯލްޑް ކަޕްގައި، އިންޑިއާ އިން ނެގި ސްކޮޑުން އެ ޓީމުގެ ވައިސް ކެޕްޓަނަކަށް ހުރި ޝުބްމަން ގިލް ބާކީކޮށްފި އެވެ.
އިންޑިއާ އިން ވަނީ ފެބްރުއަރީ 7 ވަނަ ދުވަހު ފަށާ ކްރިކެޓް ވޯލްޑް ކަޕަށާއި ޖެނުއަރީ މަހު ނިއު ޒީލެންޑާ ދެކޮޅަށް ކުޅޭ ފަސް މެޗުގެ ޓީ20 ސީރީސް އަށް ސްކޮޑެއް އެކުލަވާލައިފަ އެވެ. އެ ގޮތުން، އެ ސްކޮޑުން ގިލް ބާކީކުރިއިރު، އޭނާ އަދާކުރަމުން އައި ވައިސް ކެޕްޓަންގެ ޒިންމާ ހަވާލުކޮށްފައިވަނީ، އަކްސާރު ޕަޓޭލްއާ އެވެ.
ފަހަަކަށް އައިސް ޓީ20 ފޯމެޓްގައި ގިލްގެ ކުޅުން ވަނީ ވަރަށް ބޮޑަށް ދަށްވެފަ އެވެ. އެ ހުރިހާ ކަމަކަށް ބަލައި، މި ވަގުތު އެންމެ ފޯމުގައި ހުރި ކުޅުންތެރިންނަށް ފުރުސަތު ދިނުމުގެ ގޮތުން، އިންޑިއާގެ ކްރިކެޓް ބޯޑް، ބީސީސީއައި އިން ނިންމީ ގިލް ބާކީކޮށް، ޖުމްލަކޮށް ފޯމުގައި ތިބި ކުޅުންތެރިންނަށް ކުޅުމުގެ ފުރުސަތު ރަނގަޅަށް ލިބޭ ގޮތަށް ކަންކަން ބައްޓަން ކުރުމަށެވެ.
މިހާރު އޮތް ގޮތުން، ނިއު ޒީލެންޑާ ދެކޮޅަށް އިންޑިއާ އިން ކުޅޭ ޓީ20 ސީރީސްގެ މެޗުތައް ތާވަލުކޮށްފައިވަނީ، ޖެނުއަރީ 21، 23، 25، 28 އަދި 31 އަށެވެ.
ޖުމްލަ އެކު، 20 ޓީމު ވާދަކުރާ ޓީ20 ވޯލްޑް ކަޕްގެ ގްރޫޕް އޭގައި ހިމެނެނީ، އިންޑިއާ، ޕާކިސްތާން، އެމެރިކާ، ނަމީބިއާ އަދި ނެދަލެންޑްސް އެވެ. ގްރޫޕް ބީގައި ހިމެނެނީ، އޮސްޓްރޭލިއާ، ސްރީ ލަންކާ، ޒިމްބާބްވޭ، އޮމާން އަދި އަޔަލެންޑް އެވެ. ގްރޫޕް ސީގައި، މުޅިން އަލަށް ވޯލްޑް ކަަޕަށް ކޮލިފައިވި އިޓަލީން ވާދަކުރާނީ ނޭޕާލާއި ބަންގްލަދޭޝާއި ވެސްޓް އިންޑީސް އަދި އިންގްލެންޑް އެވެ. އަދި، ގްރޫޕް ޑީގައި ހިމެނެނީ، ނިއު ޒީލެންޑާއި ދެކުނު އެފްރިކާ، އަފްގާނިސްތާން، ކެނަޑާ އަދި ޔުނައިޓެޑް އަރަބް އެމިރޭޓްސް އެވެ.
އެންމެ ފަހުގެ ޗެމްޕިއަން، އިންޑިއާ އިން ޕާކިސްތާނާ އެއް ގްރޫޕެއްގައި ހިމެނުނު ނަމަވެސް، ފެބްރުއަރީ 15 ވަނަ ދުވަހު، ޕާކިސްތާނާ ކުޅޭ މެޗު އޮންނާނީ ލަންކާގެ ކޮލަމްބޯގަ އެވެ. އެއީ، އިންޑިއާއާ ދެމެދު އޮތް ގުޅުން ގޯސްވެފައިވާތީ ޕާކިސްތާންގެ އެއްވެސް މެޗެއް އިންޑިއާގައި ކުޅެން ބޭނުންނުވާތީ އެވެ.
މިހާރު އޮތް ގޮތުން، އަންނަ މާޗް މަހު އަށް ވަނަ ދުވަހު މި މުބާރާތުގެ ފައިނަލް މެޗު ކުޅޭނީ އަހުމަދުއާބާދުގެ ނަރެންދުރަ މޯދީ ސްޓޭޑިއަމްގަ އެވެ. އެހެން ނަމަވެސް، މުބާރާތުގެ ފައިނަލަށް ޕާކިސްތާން ދަތުރުކޮށްފިނަަމަ، ފައިނަލް މެޗު ކުޅޭނީ ކޮލަމްބޯގަ އެވެ.
އެންމެ ފަހުން ޓީ20 ވޯލްޑް ކަޕް އޮތީ މިދިޔަ އަހަރު ވެސްޓް އިންޑީސްގަ އެވެ. އެ މުބާރާތުގެ ޗެމްޕިއަންކަން އިންޑިއާ އިން ހޯދިއިރު، މިއީ، އެ ޓީމަށް 17 އަހަރު ތެރޭ ޓީ20 ވޯލްޑް ކަޕް ކާމިޔާބު ކުރެވުނު ފުރަތަމަ ފަހަރެވެ. އިންޑިއާ އިން އެ ތަށި ހޯދައިދިން ކެޕްޓަން، ރޯހިތު ޝަރްމާ، މި ފޯމެޓުގެ ޓީމުން ރިޓަޔާކޮށްފައިވާއިރު، އަންނަ އަހަރުގެ މުބާރާތުގެ އެމްބަސަަޑަރަކީ އޭނަ އެވެ.
