މި އަހަރު ސަރުކާރުގެ އެކި ތަންތަނަށް މުވައްޒަފުން ނެގީ ވަރަށް ލިމިޓެޑުކޮށް ކަމަށް ރައީސް މުހައްމަދު މުއިއްޒު މިއަދު ވިދާޅުވެއްޖެ އެވެ.
ށ. އަތޮޅަށް ކުރައްވާ ދަތުރުގައި ނޫމަރާއަށް ވަޑައިގެން އެ ރަށުގެ ރައްޔިތުންނާ ބައްދަލުކުރައްވާ މުއިއްޒު ވިދާޅުވީ އާންމު އުސޫލުން ސަރުކާރުގެ ތަންތަނަށް މުވައްޒަފުން ނަގަމުންދަނީ ވަރަށް ލިމިޓެޑުކޮށް ކަމަށެވެ.
"ހަގީގަތުގައި މި އަހަރު ވެސް އާންމު އުސޫލުން ސަރުކާރުގެ ތަންތަނަށް ވަޒީފާތަކަށް މީހުން ނުނަގަން، ވަރަށް ލިމިޓެޑުކޮށް ގެންދަނީ،" މުއިއްޒު ވިދާޅުވި އެވެ.
މުއިއްޒު ވިދާޅުވީ މުވައްޒަފުން ނެގުން ލިމިޓް ކުރި ނަމަވެސް، ރަށްރަށުގެ ސިއްހީ މަރުކަޒުތަކާއި ހޮސްޕިޓަލުތަކަށް ބޭނުންވާ މުވައްޒަފުން ނެގުމަށް އިސްކަންދީ އެކަން ފަހިކުރަމުންދާ ކަމަށެވެ.
އެ ގޮތުން އަންނަ އަހަރު ވެސް ސިއްހީ ދާއިރާއަށް އިސްކަންދީ ފަހިކުރަން ޖެހޭ ކަންކަން ފަހިކުރަމުންދާނެ ކަމަށް މުއިއްޒު ވިދާޅުވި އެވެ.
މުއިއްޒުގެ ސަރުކާރުގައި ތިބީ 922 ސިޔާސީ މުވައްޒަފުން ކަމަށް ރައީސް އޮފީހުން ބުނެ އެވެ. ނަމަވެސް، އެ ނަންބަރު ޔަގީން ކުރެވޭނެ އެއްވެސް ގޮތެއް ނެތެވެ. އިދިކޮޅު ފަރާތްތަކުން އަންދާޒާ ކުރާ ގޮތުގައި އެ އަދަދު ހުރީ 2،000 އަށްވުރެ މަތީގަ އެވެ.
މުއިއްޒުގެ ސަރުކާރުގެ އެންމެ ބޮޑު ސިއްރަކަށް ވެފައިވަނީ ސިޔާސީ މުވައްޒަފުންގެ އަދަދެވެ. ރަށްރަށުގެ ކުޅިވަރު ސްޓޭޑިއަމްތައް ބެލެހެއްޓުމާއި، ހޮސްޕިޓަލްތައް ބެލެހެއްޓުމާއި، ފަޅު ރަށްރަށް ބެލެހެއްޓުމަށް ވެސް ސިޔާސީ މުވައްޒަފުން ބޮޑު މުސާރަ ދީފައި އެބަތިއްބެވެ.
މި އަހަރުގެ ސެޕްޓެމްބަރު މަސް ފެށުނުއިރު މުސާރަ އާއި އިނާޔަތްތަކަށް އަދި ޕެންޝަނަށް ހަރަދު ކުރީ ޖުމްލަ 9.5 ބިލިއަން ރުފިޔާ އެވެ. އެއީ މިދިޔަ އަހަރުގެ މި މުއްދަތާ އަޅާބަލާއިރު 575.4 މިލިއަން ރުފިޔާއިން އިތުރު އަދަދެކެވެ.
ދައުލަތުގެ މުވައްޒަފުންގެ މުސާރަ ބޮޑުކުރަމުންދިޔަ ނަމަވެސް ބާޒާރުގައި ތަކެތީގެ އަގުތައް އުފުލި ލިބޭ އާމްދަނީން ފަރުނުޖެހޭތީ އާންމުންގެ ކަންބޮޑުވުން އެބައޮތެވެ.
ދައުލަތުގެ ހަރަދުތައް ކުޑަކުރަން ފިޔަވަޅުތަކެއް އަޅާނެ ކަމަށް މުއިއްޒު ވިދާޅުވި ނަމަވެސް ސަރުކާރުގެ ހަރަދުތައް ދުވަހެއް ދުވަހަކަށް އަންނަނީ އިތުރުވަމުންނެވެ.
