ކަސްޓަމްސްއިން ބަލަމުން ދިޔަ މައްސަލައެއް ނިންމުމުގެ މުގާބިލުގައި ރިޝްވަތު ދޭން އެދުނު މައްސަލައެއްގައި ކަސްޓަމްސްގެ ކުރީގެ އިސް އޮފިސަރަކަށް ދައުވާކޮށްދޭން އެދި އެންޓި ކޮރަޕްޝަން ކޮމިޝަން (އޭސީސީ) އިން އެ މައްސަލަ ޕްރޮސިކިއުޓާ ޖެނެރަލް އޮފީހަށް ނިމުނު ހަފުތާގެ ތެރޭގައި ފޮނުވައިފި އެވެ.
މި މައްސަލާގައި ދައުވާކޮށްދިނުމަށް އެދި ފޮނުވީ، ކަސްޓަމްސް ސާވިސްގެ ކުރީގެ ސީނިއާ ސުޕްރިންޓެންޑެންޓް މުއާޒު އަލީ (ހ. ނިއުހެޕިނަސް، މާލެ) ގެ މައްޗަށެވެ.
މުއާޒުއަށް ތުހުމަތުުކުރެވެނީ 2018 ގައި އަމިއްލަ ކުންފުންޏަކުން އެތެރެކުރި 450 ސިނގިރޭޓު ކޭސް ހުޅުމާލޭ ބޮންޑުގައި ބެހެއްޓުމަށް ފަހު، އޭގެ ތެރެއިން 430 ކޭސް ރީ-އެކްސްޕޯޓުކުރަން ހުއްދަ ހޯދުމަށް އެ ތަކެތި ރީއެކްސްޕޯޓު ނުކުރި މައްސަލައެއްގެ އެވެ.
އޭސީސީން ބުނި ގޮތުގައި، ކަސްޓަމްސްއިން އެ ކުންފުނީގެ މައްސަލަ ބަލަމުންދިޔައިރު، މުއާޒު ވަނީ އެ ކުންފުންޏަށް ފަހިވާގޮތަށް މައްސަލަ ނިންމުމުގެ މުގާބިލުގައި އެ ކުންފުނީގެ ދެ މީހެއްގެ ކިބައިން ރިޝްވަތަށް އެދިފަ އެވެ.
މި މައްސަލައިގައި އޭނާގެ މައްޗަށް ކުރާ ދައުވާއަކީ، އެނގިހުރެގެން މަންފާއަކަށް އެދުމާއި، ގަބޫލުކުރުމާއި، ތިމާއަށްޓަކައި ނުވަތަ އެހެން މީހަކަށްޓަކައި އެ މަންފާ ގަބޫލުކުރުމަށް އެއްބަސްވުމުގެ ކުށުގެ ދައުވާ އެވެ. މިއީ ޖިނާޔަތުގެ ތިން ވަނަ ދަރަޖައިގެ ކުށެކެވެ. މި ކުށުގެ އަސާސީ އަދަބަކީ ތިން އަހަރާއި ދެ މަހާއި 12 ދުވަހަށް ޖަލަށް ލުމެވެ. އެންމެ ބޮޑު އަދަބަކީ އަށް އަހަރު ދުވަހުގެ ޖަލު ހުކުމެކެވެ.
މީގެ ހަތް އަހަރު ކުރިން އެތެރެކުރި ސިނގިރޭޓުތަކެއްގެ މައްސަލައިގައި ކަސްޓަމްސްގެ އޮފިސަރަކަށް ރިޝްވަތުގެ ދައުވާކުރާއިރު، ދުންފަތުގެ ބާވަތްތަކުން ނަގާ ޑިއުޓީ ބޮޑުކޮށް، ވޭޕު މަނާކުރުމާ އެކީ ވަގަށް ސިނގިރޭޓު އެތެރެކުރަން އުޅުމުގެ މައްސަލަތައް ވަނީ އިތުރުވެފަ އެވެ. މިހެން އެތެރެކުރަން އުޅުނު ބައެއް ޝިޕްމަންޓުތައް އަތުލައިގަތް ނަމަވެސް، އަތުލައިގަނެވެނީ މަދު އަދަދެއް ކަމަށް ބެލެވެ އެވެ.
މި ފަހުން ކަސްޓަމްސްއިން ހިފަހައްޓާފައި ހުރި ސިނގިރޭޓު ޝިޕްމަންޓެއް ހިފަހައްޓާފައި ހުއްޓާ، އޭގައި ހުރި ސިނގިރޭޓުތައް ވަގަށް ނެގި މައްސަލައެއް ވެސް ވަނީ ފެންމަތިވެފަ އެވެ. މިއީ ވަރަށް އިންތިޒާމު ވެގެން ނޫނީ ނުކުރެވޭނެ ކަމެއް ނަމަވެސް، އަދި މި މައްސަލައިގައި އެންމެ މީހަކު ވެސް ހައްޔަރުކުރި ކަމެއް ނޭނގެ އެވެ.
