ރައްޔިތުންގެ މަޖިލީހުގެ އިންތިހާބު ދުވަސްވަރު، ކެރޭނެއް ގަތުމުގެ ނަމުގައި މޯލްޑިވްސް ޕޯޓްސް ލިމިޓެޑު (އެމްޕީއެލް) އިން ރާއްޖޭގެ އަމިއްލަ ކުންފުންޏަކަށް 17 މިލިއަނަށް ވުރެ ގިނަ ރުފިޔާ ދޫކޮށްފައިވާކަން އެނގިއްޖެ އެވެ.
އެ މުއާމަލާތުގެ މައުލޫމާތު އެނގޭ ބައެއް މަސްދަރުތަކުން އަދަދު ނޫހަށް ބުނީ އެ ހިޔާނާތް ހިންގާފައި ވަނީ މިދިޔަ އަހަރުގެ މާޗު މަހު އެވެ.
އެ ފައިސާ ބޭރުކުރީ ހުޅުމާލޭ ޕޯޓަށް ކެރޭނެއް ގަތުމުގެ ނަމުގަ އެވެ. އެ އެއްބަސްވުން ހެދީ ޗައިނާގެ ކުންފުންޏަކާއެކު އެވެ. ނަމަވެސް، ޗައިނާ ކުންފުނީގެ ދިވެހި އެޖެންޓުގެ ހައިސިއްޔަތުން މިކަމުގައި ހުރިހާ މުއާމަލާތެއްކުރީ ބިޒް އޭޝިއާ ޕްރައިވެޓް ލިމިޓެޑުން ކަމަށް، މި ނޫހާ ވާހަކަ ދެއްކި މީހުން ބުންޏެވެ.
"މިކަމުގެ ހުރިހާ ކަމެއްގައި އުޅުނީ ދިވެހި އެޖެންޓު. ފައިސާ ވެސް ދިނީ އެ މީހުންނަށް،" އަދަދު ނޫހާ ވާހަކަ ދެއްކި އެކަކު ބުންޏެވެ.
ކެރޭނު ޖުމުލަ އަގަކީ 19 މިލިއަން ރުފިޔާ ކަމަށް އެނގިފައިވެ އެވެ. އެ އަގުގެ 90 ޕަސެންޓު (17 މިލިއަން ރުފިޔާ) ދިވެހި އެޖެންޓަށް އެމްޕީއެލްއިން ދައްކާފައިވާ ކަމަށްވެ އެވެ.
"މި މައްސަލަ ފަޅައިއެރީ، އާ ސީއީއޯ ރިޝްވާން ވަޑައިގެންނެވި ފަހުން. މި މައްސަލަ ވަރަށް ސީރިއަސް މައްސަލައެއްގެ ގޮތުގައި އެބަ ބަލާ،" އަދަދު ނޫހާ ވާހަކަ ދެއްކި މީހަކު ބުންޏެވެ.
މި މައްސަލައިގައި ބިޒް އޭޝިއާގެ އިސްވެރިޔަކަށް ގުޅުމުން އެ ކުންފުންޏަކީ، ކެރޭނެ ގަތުމަށް ހަވާލުކުރި ޗައިނާ ކުންފުނީގެ ދިވެހި އެޖެންޓު ކަމަށް އެއްބަސްވި އެވެ. ނަމަވެސް އިތުރު މައުލޫމާތެއް ނުދެ އެވެ.
މަޖިލިސް ކެމްޕޭނު ތެރޭގައި ފެނަކަ ކޯޕަރޭޝަން މެދުވެރިކޮށް ޕީއެންސީގެ ކެންޑިޑޭޓުންނަށް ފައިސާ ނެރެފައިވާކަން މަރުކަޒީ ބޭންކުގެ ފައިނޭންޝަލް އިންޓެލިޖެންސް ޔުނިޓު (އެފްއައިޔޫ) އިން ހާމަވެފައިވެ އެވެ.
މި ސަސްޕިޝަސް ޓްރާންސެކްޝަން ރިޕޯޓު (އެސްޓީއާރު) ގައި ވަނީ ޖެނުއަރީ 1، 2023 އިން ފެށިގެން ސެޕްޓެމްބަރު 30، 2024 ގެ ނިޔަލަށް ކޮށްފައިވާ މުއާމަލާތްތަކެވެ. މި މުއްދަތުގެ ތެރޭގައި ފެނަކައިން 47 ޓްރާންސެކްޝަނެއްގެ ދަށުން ކެންގޯއަށް 37 މިލިއަން ރުފިޔާ ދޫކޮށްފައިވެ އެވެ.
މަޖިލީހުގެ ކެމްޕޭނު ދުވަސްވަރު ޕްރޮޖެކްޓުތަކުގެ އެޑްވާންސް ޕޭމަންޓުގެ ގޮތުގައި އެޗްޑީސީން ވެސް އެތައް މިލިއަން ޑޮލަރެއް ޗައިނާގެ ބައެއް ކުންފުނިތަކަށް ދޫކޮށްފައިވާކަން އެނގިފައިވެ އެވެ. ނަމަވެސް އޭސީސީ އާއި އޮޑިޓަ ޖެނެރަލް މި މައްސަލަތައް ބަލައި ފިޔަވަޅެއް އެޅިކަން ހާމަކޮށްފައެއް ނުވެ އެވެ.
