އެމްޑީޕީން މާލޭގައި މިރޭ ކުރިއަށް ގެންދާ މުޒާހަރާއަކީ ސުލްހަވެރި މުޒާހަރާއެއް ނޫން ކަމަށް ހޯމް މިނިސްޓަރު އަލީ އިހުސާނު ވިދާޅުވެއްޖެ އެވެ.
އިހުސާނު މިރޭ އެކްސްގައި ކުރެއްވި ޕޯސްޓެއްގައި ވިދާޅުވީ ފުލުހުންގެ ހަތިޔާރުތައް އަތުލައިގަނެ، ކުރާ މުޒާހަރާއަކީ ސުލްހަވެރި މުޒާހަރާއަކަށް ނުވާނެ ކަމަށެވެ. އޭނާ ޕޯސްޓު ކުރި ވީޑިއޯ އިން ފެންނަނީ އާންމުންގެ މީހަކު ފުލުހުންގެ ޝީލްޑެއް ގެންގުޅޭ މަންޒަރެވެ.
މިރޭ އެމްޑީޕީގެ މުޒާހަރާ އާޓިފިޝަލް ބީޗުން ފެށުމަށް ފަހު މަޖީދީ މަގަށް ވަންނަން މަސައްކަތް ކުރުމާއެކު ފުލުހުން ވަނީ މުޒާހަރާއަށް ހުރަސް އަޅާފަ އެވެ. ސުލްހަވެރިކަމާއެކު ކުރިއަށް ދިޔަ އެ މުޒާހަރާއަށް ފުލުހުން ހުރަސް އެޅީ އެއްވެސް ސަބަބެއް ވެސް އިއުލާނުކުރުމެއް ނެތި އެވެ.
ފުލުހުން މުޒާހަރާގެ ބައިވެރިންނަށް ހުރަސް އަޅައި، ހާލަތާ ނުބައްދަލު ބާރުގެ ބޭނުންކޮށް، މުޒާހަރާގެ ބައިވެރިންގެ މޫނަށް ޕެޕަސްޕްރޭ ޖަހަން ފެށުމާއެކު އެވަގުތުކޮޅު މުޒާހަރާ ހަލަބޮލިވި އެވެ. އެހެންނަމަވެސް މިހާރު ވެސް އެއްވެސް ހަމަނުޖެހުމެއް ނެތި މުޒާހަރާ ކުރިއަށް އެބަ ދެ އެވެ. މުޒާހަރާގެ ބައިވެރިން ދަނީ ރައީސް މުހައްމަދު މުއިއްޒުގެ އިސްތިއުފާއަށް ގޮވާލައި، މުޒާހަރާއަށް ހުރަސް ނޭޅުމަށް ފުލުހުންނަށް ގޮވާލަމުންނެވެ.
އެމްޑީޕީން އިންތިޒާމުކޮށްގެން މިރޭ ބާއްވާ މުޒާހަރާއަށް ވަގުތު ކުޑަތަން ވެފައި ވަނިކޮށް ސަރުކާރުން ވަނީ މުޒާހަރާއަށް ހުރަސް އެޅުމުގެ ގޮތުން މާލޭގެ ވަރަށް ގިނަ ސަރަހައްދުތައް ބަންދުކޮށްފަ އެވެ. ސަރުކާރުގެ ކުންފުނިތަކުން ވަނީ މިރޭ އެކިއެކި ހަރަކާތްތައް ވެސް އިންތިޒާމުކޮށްފަ އެވެ.
