އިދިކޮޅު އެމްޑީޕީން މިރޭ އާޓިފިޝަލް ބީޗުގައި ބާއްވާ ބޮޑު މުޒާހަރާ ބޯމަތިވެފައިވަނިކޮށް ހައުސިން ޑިވެލޮޕްމަންޓު ކޯޕަރޭޝަން (އެޗްޑީސީ) މުޒާހަރާ އޮންނަ ގަޑީގައި ހުޅުމާލެ ބީޗުގައި ސްޓޭޖް ޝޯއެއް ބާއްވަން ނިންމައިފި އެވެ.
އެޗްޑީސީގެ ރަސްމީ އެކްސް އެކައުންޓުން ރޭ ކުރި ޕޯސްޓެއްގައި ބުނީ ހުޅުމާލެ ފުރަތަމަ ފިޔަވައްސާއި ދެވަނަ ފިޔަވައްސާއި ދެމެދު އޮންނަ ޗެނަލް ކައިރި، ފުރަތަމަ ފިޔަވަހި ބީޗުގައި ބާއްވާ މި ޝޯ ދެނީ ދިވެހި ބޭންޑު "ޓޫ އޮފް އަސް" އިން ކަމަށެވެ. ޝޯ ފެށުމަށް ހަމަޖެހިފައިވަނީ 8:45 ގަ އެވެ.
މިއީ ހުޅުމާލޭގެ ގޮނޑުދޮށް ސާފުކުރަން އެޗްޑީސީން އިސްނަގައިގެން މިއަދު ކުރިއަށް ގެންދާ ހަރަކާތް ނިންމާލަން ބާއްވާ ޝޯއެއް ކަމަށް ވެސް އެޗްޑީސީން ބުނެފައިވެ އެވެ. އެޗްޑީސީގެ އިތުރުން ވެސް ސަރުކާރުގެ ގިނަ ކުންފުނިތަކުން އަންނަނީ މާދަމާ ރޭގެ މުޒާހަރާގައި މުވައްޒަފުން ބައިވެރިވެދާނެތީ ގިނަ ހަރަކާތްތަކެއް ރާވަމުންނެވެ.
އެގޮތުން ކަސްޓަމްސް އިން ވަނީ މަސް ބޭނުމުގެ މުބާރާތެއް މިއަދަށް ރާވައިފަ އެވެ. މަހަށް ފުރަން ރާވާފައިވަނީ މިއަދު ހަވީރުގެ ވަގުތެއްގަ އެވެ.
ވެރިކަންކުރާ ޕީޕަލްސް ނޭޝަނަލް ކޮންގްރެސް (ޕީއެންސީ) އިން ބުދަ ދުވަހުގެ ރޭ ބޭއްވި ޖަގަހަ ޖަލްސާއަށް ދިޔުމަށް ސަރުކާރުގެ ކުންފުނިތަކުގެ މުވައްޒަފުންނަށް މަޖުބޫރު ކުރި ކަމަށާއި، ޖަލްސާއަށް ދިޔަ މުވައްޒަފުންގެ ހާޒިރީ ބެލިކަން ވެސް މި ނޫހަށް ވަނީ އެނގިފަ އެވެ.
މި ނޫހަށް މައުލޫމާތު ދިން އެސްއޯއީތަކުގެ ބައެއް މުވައްޒަފުން ބުނި ގޮތުގައި މި ޖަލްސާއަށް ދާން ކުންފުނިތަކުގެ ވެރިން މި ހަފުތާ ފެށުމާއެކު އަންގަން ފެށި އެވެ. އެކަން އަންގަން ގްރޫޕުތަކަށް މެސެޖުކޮށް، ވަކި މީޓިންތަކެއް ބޭއްވި ކަމަށް އެ މުވައްޒަފުން ބުންޏެވެ.
އެގޮތުން، އެމްޕީއެލް، ސްޓެލްކޯ، އެމްއޭސީއެލް، އެސްޓީއޯ ފަދަ ކުންފުނިތަކުގެ މުވައްޒަފުންނަށް ރޭގެ ޖަލްސާއަށް ދާން އެންގި ކަމަށް އެ ކުންފުނިތަކުވެ މުވައްޒަފުން ބުންޏެވެ.
އެމްޑީޕީގެ މުޒާހަރާ ބޯމަތިވެފައިވަނިކޮށް ސިފައިން ވަނީ ކަނޑުދަތުރުކުރާ އުޅަނދުތައް ބަލައިފާސްކުރަން ހާއްސަ އޮޕަރޭޝަނެއް ފަށާފަ އެވެ.
މީގެ އިތުރުން، އަންގާރަ ދުވަހުގެ ރޭ ދަންވަރު ގިނަ އަދަދެއްގެ ފުލުހުން ވަނީ ރަޔަޓު ގިޔަރުގައި މާލޭގެ މަގުތަކަށް ނުކުމެފަ އެވެ. ރަޔަޓު ގިޔަރުގައި ފުލުހުން ހަރަކާތްތެރިވެފައިވަނީ ހުކުރު ދުވަހުގެ ރޭ އެމްޑީޕީގެ މުޒާހަރާ ފަށާ އާޓިފިޝަލް ބީޗު ކައިރީގަ އެވެ.
