އިދިކޮޅު ސިޔާސީ ޕާޓީ އެމްޑީޕީ އިން މާދަމާ ބޮޑު އެއްވުމަށް ބާއްވަން ތައްޔާރުވަމުންދަނިކޮށް އެ ޕާޓީގެ އެކައުންޓުތައް ފްރީޒް ކުރަން ސިވިލް ކޯޓުގައި އެދެފި އެވެ.
އެމްޑީޕީގެ އެކައުންޓުތައް ފްރީޒް ކުރަން އެދުނީ އައިލެންޑް އޭވިއޭޝަނުންނެވެ. އެއީ އެ ކުންފުންޏަށް އެމްޑީޕީ އިން ދައްކަންޖެހޭ 3.6 މިލިއަން ރުފިޔާގެ ދަރަންޏެއްގެ މައްސަލައިގަ އެވެ.
އެމްޑީޕީން މާދަމާ އެއްވުމެއް މީހުން ދިއުމުގެ ފުރުސަތު ހަނި ކުރަން ސަރުކާރުން ދަނީ ގިނަ މަސައްކަތްތަކެއް ކުރަމުންނެވެ. އެގޮތުން ސަރުކާރުގެ އޮފީސްތަކުން ދަނީ މާދަމާއަށް މަސް ދަތުރު ފަދަ ގިނަ ހަރަކާތްތަކެއް ރާވަމުންނެވެ.
މާދަމާގެ އެއްވުމުގެ ކުރިން ފުލުހުންނާއި ސިފައިންގެ އިސް ވެރިންގެ ހާއްސަ ބައްދަލުވުމެއް ވެސް މިއަދު ވަނީ ބާއްވައިފަ އެވެ. އަދި ފުލުހުންގެ ހާއްސަ ތަމުރީނުތަކެއް ވެސް މި ހަފުތާގައި މާލޭގައި ވަނީ ކުރިއަށްގެންގޮސްފަ އެވެ.
މާދަމާގެ އެއްވުމުގައި އެމްޑީޕީ އިން ހަމަނުޖެހުން އުފައްދަން އުޅޭ ކަމަށް ބުނެ ފުލުހުން ވަނީ ސާބިތުނުހިފޭ ބަޔާނެއް ވެސް ނެރެފަ އެވެ. މާލެ ތެރެ ހަލަބޮލިކުރަން އުޅޭ ކަމަށް ބުނެ އެމްޑީޕީ އިން ބަޔާން ނެރުނުއިރު، އެ މައްސަލަ ތަހުގީގު ކުރަމުންދާ ކަމަކަށް ފުލުހުން ނުބުނެ އެވެ.
"ލޫޓުވައިފި، ލޫޓުވައިފި" ނަމުގައި އެމްޑީޕީ އިން މާދަމާ ބާއްވާ މުޒާހަރާގައި އަދާލަތު ޕާޓީ އިން ބައިވެރިވުމަށް މިހާރު ވަނީ ނިންމައިފަ އެވެ. އެ އެއްވުން އޮންނާނީ މާދަމާ ރޭ 8:30 ގަ އެވެ.
