އަންނަ އަހަރުގެ ފެބްރުއަރީ މަހުން ފެށިގެން ބޭންކް އޮފް މޯލްޑިވްސްގެ ކްރެޑިޓް ކާޑުތަކުގެ ޑޮލަރު ލިމިޓު ބޮޑުކޮށްދޭނެ ކަމަށް ރައީސުލްޖުމްހޫރިއްޔާ މުހައްމަދު މުއިއްޒު ވިދާޅުވެއްޖެ އެވެ.
ދާދި ދެންމެއަކު މުއިއްޒު އެކްސްގައި ކުރެއްވި ޕޯސްޓެއްގައި ވިދާޅުވީ ބީއެމްއެލްގެ ކްލެސިކް، ގޯލްޑް އަދި ޕްލެޓިނަމް ކާޑުތަކުގެ ޑޮލަރު ލިމިޓު ފެބްރުއަރީ 1، 2026، އިން ފެށިގެން ބޮޑުކޮށްދެއްވާނެ ކަމަށެވެ.
"ކްރެޑިޓް ކާޑް އިން މަހަކު ބޭނުންކުރެވޭ ޑޮލަރު ލިމިޓު ބޮޑު ކުރުމަށް ސަރުކާރުން ކުރަމުންދާ މަސައްކަތުގެ ތެރެއިން، 1 ފެބްރުއަރީ 2026 އިން ފެށިގެން ބޭންކް އޮފް މޯލްޑިވްސް ގެ ކްލެސިކް ކާޑުގެ ލިމިޓް 750 ޑޮލަރުން 1400 ޑޮލަރަށް، ގޯލްޑް ކާޑުގެ ލިމިޓް 750 ޑޮލަރުން 1500 ޑޮލަރަށް، އަދި ޕްލެޓިނަމް ކާޑުގެ ލިމިޓް 1500 ޑޮލަރުން 2000 ޑޮލަރަށް ބޮޑު ކުރެވިގެންދާނެ،" މުއިއްޒު ކުރެއްވި ޕޯސްޓުގައި ވިދާޅުވި އެވެ.
ކްރެޑިޓް ކާޑުތަކުގެ ޑޮލަރު ލިމިޓު އަންނަ އަހަރުން ފެށިގެން ބޮޑުކޮށްދެއްވާނެކަން މުއިއްޒު މިއަދު އިއުލާނު ކުރެއްވިއިރު، ޑެބިޓު ކާޑު ބޭނުންކޮށްގެން ބޭރު ގައުމުތަކުގައި ވިޔަފާރި ކުރެވޭ އަދަދު ވެސް އަންނަ ނޮވެމްބަރު 11، އިން ފެށިގެން އިތުރުވާނެ ކަމަށް އެމަނިކުފާނު ވަނީ ސެޕްޓެމްބަރު 22، ގައި އިއުލާނު ކުރައްވައިފަ އެވެ.
ރާއްޖޭގެ ބައެއް ރަށްރަށަށް މިފަހުން ކުރެއްވި ދަތުރުގެ ތެރެއިން މ. މުލީގައި ހުންނަވައި ވާހަކަދައްކަވަމުން މުއިއްޒު އިއުލާނު ކުރެއްވީ މައިގަނޑު ތިން ބޭނުމަކަށް ވިޔަފާރި ކުރެވޭ އަދަދު އިތުރު ކުރުމަށެވެ.
އެއީ ބޭރު ގައުމުތަކުގައި ހުންނަ ޕީއޯއެސް މެޝިންތަކުން ވިޔަފާރި ކުރެވޭ އަދަދު 1،000 ޑޮލަރަށް، އަދި އެއާލައިން ޓިކެޓާއި ހޮޓާތަކަށް ލާރި ދެއްކުމާށް ކާޑުން ދެއްކޭ އަދަދު 3,000 ޑޮލަރަށް އިތުރު ކުރުމެވެ.
އޭގެއިތުރުން ހަމަ އެ ތާރީހުން ފެށިގެން ބޭސްފަރުވާއަށް ބޭރަށް ދާ ފަރާތްތަކުން ހޮސްޕިޓަލަށް ދައްކަން ޖެހޭ ފައިސާ ޑެބިޓު ކާޑު މެދުވެރިކޮށް ދެއްކުމަށް ބޭންކުގައި އެދުމުން އެ ފައިސާ ވެސް ޑެބިޓު ކާޑުން ކެނޑޭނެ ގޮތް ހައްދަވައި ދެއްވާނެ ކަމަށް މުއިއްޒު ވިދާޅުވި އެވެ.
ބީއެމްއެލްގެ ޑެބިޓު އަދި ކްރެޑިޓް ކާޑުތަކުގެ ޑޮލަރު ލިމިޓު ބޮޑުކުރާނެކަން އިއުލާނު ކުރި ނަމަވެސް، ދިވެހިން އާންމުކޮށް އޮންލައިންކޮށް ވިޔަފާރި ކުރާ ބައެއް ވެބްސައިޓުތަކުން ޑެބިޓު ކާޑު މެދުވެރިކޮށް ވިޔަފާރި ކުރާއިރު، 30 ޕަސެންޓުގެ ފީއެއް ނަގަން ބީއެމްއެލްއިން އޮތީ މީގެ ކުރިން ނިންމައިފަ އެވެ.
އެހެންކަމުން ޑެބިޓު ކާޑުގެ ޑޮލަރު ލިމިޓު ބޮޑު ކުރި ނަމަވެސް އެ ވެބްސައިޓުތައް މެދުވެރިކޮށް ވިޔަފާރި ކުރާއިރު، ހަމަ އެ 30 ޕަސެންޓު އަދިވެސް ދައްކަންޖެހޭނެ އެވެ.
މި ފަހަކަށް އައިސް ބޮޑެތި ބަދަލުތަކެއް ސަރުކާރުން އިއުލާނު ކުރަމުންދާއިރު އިދިކޮޅު އެމްޑީޕީން ދަނީ އަންނަ ހުކުރު ދުވަހު ބޮޑު މުޒާހަރާއެއް ބާއްވަން ތައްޔާރުވަމުންނެވެ.
އެމްޑީޕީން މުޒާހަރާއަށް ތައްޔާރުވަމުން ދަނިކޮށް އިއްޔެ ސަރުކާރުން ވަނީ ޕޭ ހާމަނައިޒޭޝަންގެ ތެރެއިން މިހައިތަނަށް މުސާރަ ބޮޑުވެފައި ނުވާ ސިވިލް ސާވިސް ހުރިހާ މުވައްޒަފުންނާއި ޖުޑީޝަރީގެ ހުރިހާ މުވައްޒަފުން އަދި ކައުންސިލްތަކުގެ ހުރިހާ މުވައްޒަފުންގެ މުސާރަ ނޮވެމްބަރު 1، ގައި އެއްހަމަ ކުރެވި ބޮޑުވެގެންދާނެކަން އިއުލާނު ކޮށްފަ އެވެ.
