ރައީސް މުހައްމަދު މުއިއްޒު ހަތަރު އަތޮޅަކަށް ވަޑައިގެން، 16 ރަށެއްގައި ބޭންކް އޮފް މޯލްޑިވްސް (ބީއެމްއެލް) ގެ އޭޓީއެމް ހުޅުވުމަށްފަހު މާލެ ވަޑައިގެންފި އެވެ.
މި މަހުގެ 19، ގައި ފެއްޓެވި މި ދަތުރުގައި މުއިއްޒު ވ، ފ، މ، އަދި ތ. އަތޮޅުގެ މީހުން ދިރިއުޅޭ ހުރިހާ ރަށަކަށް ވަޑައިގެންނެވި އެވެ. ދަތުރުގެ ތެރެއިން ވ. އަތޮޅުގައި ތިން އޭޓީއެމް ފ. އަތޮޅުގައި ހަތަރު އޭޓީއެމް އަދި ތ. އަތޮޅުގައި ނުވަ އޭޓީއެމް ހުޅުވި އެވެ.
އޭޓީއެމް ހުޅުވުމެގެ އިތުރުން މުއިއްޒުގެ ދަތުރުގެ ތެރެއިން އެކި ރަށްރަށުގައި ސަރުކާރުން ވައުދުވެފައިވާ ތަރައްގީގެ މަޝްރޫއުތަކުގެ އެއްބަސްވުންތަކުގައި ސޮއިކޮށް، ބައެއް މަޝްރޫއުތަކުގެ އަމަލީ މަސައްކަތް ފަށްޓަވައިދެއްވި އެވެ.
މި މަޝްރޫއުތަކުގެ ތެރޭގައި ބިން ހިއްކުން، އެއާޕޯޓު އެޅުން، ގޮނޑުދޮށް ހިމާޔަތްކުރުން، ފެނާއި ނަރުދަމާ ގާއިމުކުރުން އަދި އައުޓް ޑޯ ޖިމުތައް ގާއިމުކުރުން ހިމެނެ އެވެ.
މުއިއްޒުގެ ކުރައްވާ ދަތުރުތަކުގެ މައިގަނޑު މަގުސަދަކީ ބައެއް ރަށްރަށުގައި ބީއެމްއެލް ގެ އޭޓީއެމް ހުޅުވަން ރިބަން ކެނޑުން ކަމަށް ބުނެ ގިނަ ފާޑުކިޔުންތަކެއް ދަނީ އަމާޒުވަމުންނެވެ. އެ ފާޑުކިޔުންތަކަށް ދަތުރުގެ ތެރެއިން މުއިއްޒު ރައްދު ދެއްވި އެވެ.
ތ. މަޑިފުށީ ރައްޔިތުންނާއި ބައްދަލުކުރައްވާ ވާހަކަދައްކަވަމުން އެމަނިކުފާނު ވިދާޅުވީ އޭޓީއެމް ހުޅުވުމަކީ އާދައިގެ، ކުޑަ ކަމެއް ނޫން ކަމަށެވެ.
"އޭޓީއެމް ތަކަކީ ކުޑަކުޑަ ކަމެއްގެ ގޮތުގައި ބައެއް މީހުން ދެކުނު ނަމަވެސް، އެއީ އެކަމުގެ ނަފާ ލިބޭ ރަށްރަށުގަ ތިބޭ ރައްޔިތުންނަށް ވަރަށް ފަސާހެވާ ކަންކަން،" މުއިއްޒު ވިދާޅުވި އެވެ.
މިކަމުގެ ސަބަބުން ރައްޔިތުންގެ އަތުން ކުރަމުންދިޔަ އެތައް ހަރަދެއް ސަލާމަތްވެ، ރައްޔިތުން ބާރުވެރިވެ، ރަށްރަށުގެ އިގުތިސޯދު ރަނގަޅުވެގެންދާނެ ކަމަށް ވެސް އެމަނިކުފާނު މިއަދު ވިދާޅުވި އެވެ.
