ލޯކަލް ކައުންސިލްތަކުގެ އިންތިހާބު ބޯމަތިވެފައި ވާއިރު، ރައީސް މުހައްމަދު މުއިއްޒު ހަތަރު އަތޮޅަކަށް މިއަދު ފެށްޓެވި ދަތުރުގެ ތެރެއިން ވ. ފުލިދޫއަށް ވަޑައިގެން އެ ރަށުގައި ބޭންކް އޮފް މޯލްޑިވްސް (ބީއެމްއެލް) ގެ އޭޓީއެމްއެއް ހުޅުއްވައިދެއްވައިފި އެވެ.
އަށް ދުވަހުން ހަތަރު އަތޮޅަކަށް ކުރައްވާ މި ދަތުރުގެ ތެރެއިން މުއިއްޒު ފުލިދޫއަށް ވަޑައިގެންނެވީ މިއަދު ހަވީރު އެވެ. މި ދަތުރުގައި އެމަނިކުފާނުގެ އަރިހުގައި ވަޒީރުންނާއި ސަރުކާރުގެ ކުންފުނިތަކުގެ ވެރިން އަދި މަޖިލިސް މެންބަރުން ބައިވެރިވެ އެވެ.
ފުލިދޫގައި އޭޓީއެމް ހުޅުވުމަށް ބޭއްވި ރަސްމިއްޔާތުގައި މުއިއްޒުގެ އިތުރުން ބީއެމްއެލްގެ ގެ ޗީފް އެގްޒެކެޓިވް އޮފިސަރު މުހައްމަދު ޝަރީފު އަދި ޗެއާޕާސަން އަހްމަދު އަލީ ހަބީބް ބައިވެރިވެވަޑައިގެންނެވި އެވެ.
އޭޓީއެމްގެ އިތުރުން ފުލިދޫގައި އަލަށް ތަރައްގީ ކުރާ ބަނދަރުގެ މަޝްރޫ އާއި ސިއްހީ މަރުކަޒުގެ އައު އިމާރާތް ތަރައްގީ ކުރުމުގެ މަޝްރޫއުގެ އަމަލީ މަސައްކަތް ފެށުމަށް ރަސްމިއްޔާތު ތަކެއް ވަނީ ބާއްވާފަ އެވެ. އަދި، އެ ރަށުގައި ވޮލީ ކޯޓެއް އެޅުމަށް އެއްބަސްވުމެއްގައި ވަނީ ސޮއިކޮށްފަ އެވެ.
ލޯކަލް ކައުންސިލް އިންތިހާބު ކައިރި ވެފައިވަނިކޮށް، ރައީސް ކުރައްވަމުން ގެންދަވާ މި ދަތުރުތަކުގައި ކޮންމެ ރަށެއްގެ ކައުންސިލާއި އަންހެނުންގެ ތަރައްގީއަށް މަސައްކަތްކުރާ ކޮމިޓީ އާއި ބައްދަލުކުރައްވަ އެވެ. ފުލިދޫގައި ވެސް އެ ބައްދަލުވުންތައް ބޭއްވި އެވެ.
މި މަހުގެ 19-26 ގެ ނިޔަލަށް ކުރައްވާ ދަތުރުގައި ވ. އަތޮޅު ނިންމެވުމަށް ފަހު، ފ، މ. އަދި ތ. އަތޮޅަށް މުއިއްޒު ވަޑައިގަންނަވާނެ އެވެ.
އަދަދު ނޫހަށް އެނގިފައިވާ ގޮތުގައި ވ. އަތޮޅުގެ ތިން ރަށެއްގައި އަދި ފ. އަތޮޅުގެ ހަތަރު ރަށެއްގައި އޭޓީއެމް ހުޅުވާނެ އެވެ.
