އާންމުންގެ މެދުގައި ސަރުކާރަށް އޮތް ތާއިދު ކުޑަވަމުން ދާއިރު، ކުރީގެ ރައީސުންނާއި ރައްޔިތުންގެ މަޖިލީހުގެ ކުރީގެ މެންބަރުންނަށް ދެމުންދާ އިނާޔަތްތައް ކުޑަކުރުމުގެ ވިސްނުން ރައީސް މުހައްމަދު މުއިއްޒު ޕީޕަލްސް ނެޝަނަލް ކޮންގްރެސް (ޕީއެންސީ) ގެ އިސްވެރިންނާ ހިއްސާކުރައްވައިފި އެވެ.
މަޖިލީހުގެ ކުރީގެ މެންބަރުންނާއި ރައީސުންނަށް ދެމުން އަންނަ އިނާޔާތްތައް ކުޑަކުރަން ނުވަތަ ކަނޑާލުމުގެ ބަހުސް ދޭތެރެދޭތެރެއިން ފެންމަތިވެ އެވެ. އަލުން އަނެއްކާ މި ބަހުސް ތިލަވި ދަނޑިވަޅަކީ ތަކެތީގެ އަގުތައް ބޮޑުވެ، އަތްމަތި ދަތިވަމުންދާތީ އާންމުންގެ ނުރުހުން ސަރުކާރަށް އަމާޒުވެފައިވާ ދަނޑިވަޅެކެވެ.
"އަޅުގަނޑަށް ފެންނަނީ މަޖިލިސް މެންބަރުކަން ކޮށްފައި ތިއްބަވާ ކުރީގެ އެމްޕީންނަށް މިހާރު ގާނޫނުން ދޭ ފައިސާގެ އަދަދު މަދުކުރަން. އަދި ކުރީގެ ރައީސުންނަށް ދޭ އަދަދު މަދުކުރަން. ރައްޔިތުން އެދެނީ އެ ގޮތް. އަޅުގަނޑުމެންނަކީ ރައްޔިތުންގެ މަންދޫބުން، ޚާދިމުން،" ޕީއެންސީއަށް ނިސްބަތްވާ ރައްޔިތުންގެ މަޖިލީހުގެ މެންބަރުންގެ ތިއްބަވާ ގްރޫޕެއްގައި އެހެން ބޭފުޅުންގެ ހިޔާލަށް އެދިވަޑައިގެން މުއިއްޒު އިއްޔެ ލިޔުއްވި އެވެ.
މުއިއްޒު އެހެން ލިޔުއްވުމާއެކު ގިނަ މެންބަރުން ވަނީ އެ ހިޔާލަށް ތާއީދު ކުރައްވާފަ އެވެ. މެންބަރުންގެ ކަންބޮޑުވުމަކަށް އޮތީ އެހެން ދާއިރާތަކުން ވެސް ޑަބަލް ޕެންޝަން ލިބޭއިރު އެ ޕެންޝަންތައް ނުކަނޑައި މެންބަރުންގެ އިނާޔަތް ކުޑަކުރަން ވިސްނުމެވެ.
މެންބަރުންގެ އިނާޔަތް ކުޑަކުރުމުން ކުރިއަށް އޮތް އިންތިހާބުތަކުގައި ޕީއެންސީއަށް ގެއްލުން ލިބުމުގެ ފުރުސަތު އޮތް ކަމަށް ވެސް ބައެއް މެންބަރުން ވިދާޅުވި އެވެ. މިއީ ނޫސްވެރިންގެ ޕްރެޝަރާ ގުޅިގެން ކުރާ ކަމެއްގެ ގޮތުގައި ބައެއް މެންބަރުން ސިފަކުރެއްވި އެވެ.
މިހާރު އެކްސްގައި ދައުރުވަމުންދާ ލިޔެކިޔުންތަކުން ހާމަވެފައިވާ ގޮތުގައި މަޖިލީހުން ކުރީގެ މެންބަރުންގެ ހެލްތު އިންޝޫރެންސަށް 2014 އިން ފެށިގެން މި އަހަރުގެ މެއި މަހުގެ ނިޔަލަށް 18.9 މިލިއަން ރުފިޔާ ހޭދަކޮށްފައިވެ އެވެ. އެ އިނާޔަތްތައް ކަނޑާލަން ގިނަ އަދަދެއްގެ ރައްޔިތުން އަންނަނީ ގޮވާލަމުންނެވެ.
ވެލާނާ އިންޓަނޭޝަނަލް އެއާޕޯޓް (ވީއައިއޭ) ގެ ވީއައިޕީ ހިދުމަތްތައް މެންބަރުން ބޭނުންކުރާތީ ވެސް ފާޑުކިޔުން ވަނީ އަމާޒުވެފަ އެވެ. ވިހި ވަނަ މަޖިލީހުގެ މެންބަރުން ފުރަތަމަ 14 މަސްދުވަހުގެ ތެރޭގައި 1.4 މިލިއަން ރުފިޔާ ވީއައިޕީ ހިދުމަތަށް ބޭނުންކުރިއިރު ޕީއެންސީގެ ސުޕަމެޖޯރިޓީ އޮތް މަޖިލީހުން އެ ކަމާ ގުޅޭގޮތުން ވާހަކަ ދައްކާފައި ނުވެ އެވެ.
މަޖިލީހުގެ މެންބަރުންނަށް ދޭ އިނާޔަތްތައް
މަޖިލީހުގެ މެންބަރުންނަށް އިނާޔަތާއި ހެލްތު އިންޝޫރެންސް ލިބެނީ 2013 ވަނަ އަހަރު ފާސްކުރި އިމްތިޔާޒުގެ ގާނޫނުގެ ދަށުންނެވެ. އެ ގާނޫނުގެ 8 ވަނަ މާއްދާގެ ޅ. ގައި ބުނަނީ ރައްޔިތުންގެ މަޖިލީހުގެ މެންބަރުންނަށް އޮންނަ ފަދަ ހެލްތު އިންޝޫރެންސް ސްކީމެއްގެ ދަށުން ބޭސްފަރުވާ ކޮށްދޭންވާނެ ކަމަށެވެ.
މެންބަރުން މާލީ އިނާޔަތަށް ކޮލިފައި ވަނީ މެންބަރުކަމުން ވަކިވުމަށް ފަހު އަދި 55 އަހަރު ފުރުމުންނެވެ. އެއް ދައުރު ފުރިހަމަކުރި މެންބަރުންނަށް މުސާރައިގެ 30 ޕަސެންޓު އަދި ދެ ދައުރު ފުރިހަމަކުރި މެންބަރުންނަށް މުސާރައިގެ 45 ޕަސެންޓު ދެ އެވެ. މުސާރައިގެ 30 ޕަސެންޓަރީ 12،750ރ. އެވެ. 45 ޕަސެންޓަކީ 19،125ރ. އެވެ.
ދައުލަތުގެ ވަޒީފާއެއް އަދާކުރާނަމަ އިނާޔަތް އޮންނަނީ ނުލިބޭ ގޮތަށެވެ. އެ އިނާޔަތް ލިބޭނަމަ އެހެން ޕެންޝަނެއް ނުލިބޭނެ ކަމަށް ގާނޫނު ބަޔާންކުރެ އެވެ. އޭގެ އިތުރުން ހެލްތު އިންޝުއަރެންސާއި އޮފިޝަލް ޕާސްޕޯޓެއް ވެސް ކުރީގެ މެންބަރުންނަށް ލިބެ އެވެ.
ކުރީގެ ރައީސުންނަށް ދޭ އިނާތްތައް
ރައީސުލްޖުމްހޫރިއްޔާކަން ކޮށްފައިވާ މީހުންނަށް ދައުލަތުން އިނާޔަތް ދެނީ 2009 ވަނަ އަހަރު ފާސްކުރި "ރައީސުލްޖުމްހޫރިއްޔާކަން ކޮށްފައިވާ މީހަކަށް ދޭންޖެހޭ ރައްކާތެރިކަމާއި އިނާޔަތްތަކާ ބެހޭ ޤާނޫނު" ގެ ދަށުންނެވެ.
އެ ގާނޫނުގައި ބުނާ ގޮތުން އެއް ދައުރު އަދާކުރި މީހަކަށް މަހަކު 50،000ރ. އަދި ދެ ދައުރު އަދާކުރި މީހަކަށް 75،000ރ. ގެ މާލީ އިނާޔަތެއް ދޭން ޖެހެ އެވެ. އެ މީހަކު މަރުވެއްޖެނަމަ، އެ މީހާގެ އަނބިމީހާއަށް، އޭނާ އެހެން ކައިވެންޏެއް ކުރަންދެން ނުވަތަ އޭނާ ދުނިޔޭގައި ހުރިހާ ދުވަހަކު އެ އިނާޔަތް ދޭން ޖެހެ އެވެ.
ދިރިއުޅޭނެ ތަނެއް ހަމަޖެއްސުމަށް 50،000ރ. ގެ އިނާޔަތެއް މަހެއްގެ މައްޗަށް ދޭއިރު ދަތުރުފަތުރުގެ ހަރަދު ވެސް ދައުލަތުން ހަމަޖައްސައިދެ އެވެ. ރާއްޖެއިންނާއި ރާއްޖެއިން ބޭރުން ދައުލަތުގެ ހަރަދުގައި ސިއްހީ ހިދުމަތް ވެސް ކުރީގެ ރައީސުންނަށް ލިބެ އެވެ.
އޭގެ އިތުރުން އޮފީސް ހިންގަން މަހެއްގެ މައްޗަށް 175،000ރ. ގެ އިނާޔަތެއް ކުރީގެ ރައީސުންނަށް ލިބެ އެވެ.
ޕީއެންސީގެ މެންބަރުންގެ ވިސްނުން
މި ދެ ގާނޫނަށް ބަދަލު ގެނައުމާމެދު ޕީއެންސީގެ މެންބަރުންގެ ދެކެވަޑައިގަންނަވާ ގޮތެއް ބެއްލެވުމަށް މުއިއްޒު ވަޓްސްއަޕް ގުރޫޕްގައި ލިޔުއްވުމާއެކު، ރައްޔިތުންގެ މަޖިލީހުގެ ރައީސް އަބްދުއްރަހީމް އަބްދުﷲ އެކަމަށް 100 ޕަސެންޓު ތާއިދު ކުރެއްވި އެވެ. އަދި ޕީޖީ ގްރޫޕުގެ ލީޑަރު، އިނގުރައިދޫ ދާއިރާގެ މެންބަރު އިބްރާހިމް ފަލާހުއާއެކު ގިނަ އަދަދެއްގެ މެންބަރުން މުއިއްޒުގެ ހިޔާލަށް ތާއިދު ކުރައްވާ ކަމަށް ގްރޫޕުގައި ލިޔުއްވި އެވެ.
ވަޓްސްއަޕް ގްރޫޕްގައި ތާއިދު ކުރެއްވި ނަމަވެސް އެ ބަދަލު ގެންނަން ޕީއެންސީގެ ހުރިހާ މެންބަރުން ކަހަލަ ގޮތަކަށް ދެކޮޅު ކަމަށް އަދަދު ނޫހާ ވާހަކަ ދެއްކެވި ބައެއް މެންބަރުން ވިދާޅުވި އެވެ.
"ހުރިހާ މެންބަރުން ކަހަލަ ގޮތަކަށް ރައީސްގެ ހިޔާލާ ދެކޮޅު. ނަމަވެސް އެ ބޭފުޅުންނަށް ވަޓްސްއަޕް ގްރޫޕްގައި އެހެން ލިޔުއްވަން ކެރިވަޑައިނުގަންނަވަނީ،" މެންބަރަކު ވިދާޅުވި އެވެ.
އަދަދު ނޫހާ ވާހަކަ ދެއްކެވި އެހެން މެންބަރަކު ވިދާޅުވީ އެ އިނާޔާތް ދިނުން ހުއްޓާލައިފި ނަމަ ނުވަތަ އިނާޔަތާ ކުޅެފި ނަމަ މިހާރަށް ވުރެ ބޮޑަށް ސަރުކާރުގެ ތާއިދު ދަށަށް ދާނެ އެވެ.
މުއިއްޒު ހިޔާލާ ދެކޮޅަށް ވާހަކަ ދެއްކެވި ބައެއް މެންބަރުން ފާހަގަ ކުރެއްވި ގޮތުގައި ހަމައެކަނި އިނާޔަތް ކުޑަކުރަން ޖެހެނީ މަޖިލީހުގެ މެންބަރުންގެ ނޫން ކަމަށާއި، މެންބަރުންގެ އިނާޔަތްތައް ކުޑަކުރާނަމަ ފުލުހުންނާއި ސިފައިން އަދި ފަނޑިޔާރުންގެ ތެރެއިން ރިޓަޔާކުރާ މީހުންގެ އިނާޔަތް ވެސް ކުޑަކުރަންޖެހެ އެވެ. އަދި ޑަބަލް ޕެންޝަންގެ މައްސަލަ ވެސް ހައްލުކުރަންޖެހެ އެވެ.
