ކުރިއަށް އޮތް 20 އަހަރަށް ހަދާ ގައުމީ ތަރައްގީގެ މާސްޓާ ޕްލޭން އެކުލަވާލުމުގެ އަމަލީ މަސައްކަތް ނެކްސިއާ މޯލްޑިވްސް ކިޔާ ކުންފުންޏަކާ ހަވާލުކުރީ 17.9 މިލިއަން ރުފިޔާއަށް ކަން އެނގިއްޖެ އެވެ.
ނެކްސިއާ މޯލްޑިވްސްއަކީ އެޗްޑީއެފްސީގެ ކުރީގެ ބޯޑު މެންބަރު ހާމިދު ސޯދިގު އަދި ކޮމާޝަލް ބޭންކް އޮފް މޯލްޑިވްސްގެ ކުރީގެ ބޯޑު ޑައިރެކްޓަރު ފަރީހާ ޝަރީފުގެ ނަމުގައި ރަޖިސްޓްރީކޮށްފައިވާ ކުންފުންޏެކެވެ. އެ ކުންފުންޏާ މި މަސައްކަތް ހަވާލުކުރި އަގު މިއަދާ ހަމައަށް ސަރުކާރުން އޮތީ ސިއްރުކޮށްފަ އެވެ.
މިކަން ހާމަވީ މައުލޫމާތު ހޯދުމާއި ލިބިގަތުމުގެ ގާނޫނުގެ ދަށުން ގާނޫނީ ވަކީލު އަހުމަދު މައުރޫފް ހުށަހެޅުމުން ފިނޭންސުން ދިން ޓެންޑާ އެވޯޑު ލިޔުމުންނެވެ.
އެ ލިޔުމުގައިވާ ގޮތުން ނެކްސިއާއަށް މި މަސައްކަތް ހަވާލުކުރީ ޖޫން 25، ގަ އެވެ. އެ މަސައްކަތުގެ ޖުމްލަ އަދަދަކީ 17,940,096ރ. އެވެ. މަސައްކަތް ހަވާލުކުރީ އެއް އަހަރުގެ މުއްދަތަކަށެވެ.
ގައުމީ ތަރައްގީގެ މާސްޓާ ޕްލޭނެއް ހަަދާނެ ކަމަށް މުއިއްޒު އިއުލާން ކުރެއްވީ ސެޕްޓެމްބަރު 17، 2024، ގަ އެވެ. އެ ދުވަހު އެމަނިކުފާނު ވިދާޅުވީ މާސްޓާ ޕްލޭން އެކުލަވާލުމުގެ މަސައްކަތް އެއް އަހަރު ދުވަހުގެ ތެރޭގައި ނިންމަވާނެ ކަމަށެވެ. މާސްޓާ ޕްލޭން ހެދުމަށް މުއިއްޒު ދެއްވި ތާރީހަށް އެ ޕްލޭން ހެދޭނެ ކަމަކަށް ނުފެނެ އެވެ.
"އިރާދަކުރެއްވިއްޔާ ކުރިއަށް އޮތް އެއް އަހަރު ދުވަހުގެ ތެެރޭގައި ރައްޔިތުންގެ ފުރިހަމަ ބައިވެރިވުން ހިމެނޭ ގޮތަށް އަދި ހުރިހާ ސިޔާސީ ޕާޓީތަކާއި ޖަމިއްޔާ ޖަމާއަތްތަކާއި އެކިއެކި ސްޓޭކް ހޯލްޑަރުންނާއި އެކިއެކި އެކްސްޕާޓުންނާއި ހުރިހާ ފަރާތްތަކެއް ހިމެނޭ ގޮތަށް ވަރަށް ފުރިހަމަ ބައިވެރިވުމާއި މަޝްވަރާއާ އެކީ ގައުމީ ތަރައްގީގެ މާސްޓާ ޕްލޭނެއް ކުރިއަށް އޮތް 20 އަހަރު ދުވަހަށް އިރާދަކުރެއްވިއްޔާ ތަރައްގީ ކުރުމުގެ މަސައްކަތް މި ފަށަނީ،" ރައީސް ވިދާޅުވި އެވެ.
ގައުމީ ތަރައްގީގެ މާސްޓާ ޕްލޭނެއް ހަދާނެ ކަމަށް މުއިއްޒު އިއުލާނު ކުރެއްވި ނަމަވެސް އެ ޕްލޭނަށް މަޑުނުކޮށް މުއިއްޒު ދަނީ ވަރަށް ގިނަ ކަންކަން އިއުލާނު ކުރައްވަމުންނެވެ. އެ ޕްލޭނުގައި ނުހިމެނޭ އެންމެ ބޮޑު އެއް ކަމަކީ ފުށިދިއްގަރުފަޅު ހިއްކުމެވެ.
