މިނިވަން މީޑިއާ ނެތިކޮށްލުމަށް ސަރުކާރުން ފަހަތުގައި އޮވެގެން ރައްޔިތުންގެ މަޖިލީހަށް ހުށަހަޅާފައިވާ ބިލާ ދެކޮޅަށް މުޒާހަރާ ކުރާ ނޫސްވެރިންނާ ރައީސް މުހައްމަދު މުއިއްޒު ބައްދަލު ކުރައްވަން ނިންމައިފި އެވެ.
މުއިއްޒު ނޫސްވެރިންނާ ބައްދަލު ކުރައްވާއިރު އެމަނިކުފާނާ ބައްދަލު ކުރެއްވުމަށްފަހު އިއްޔެއިން ފެށިގެން ނޫސްވެރިން ދަނީ ޑިމާންޑު ކުރަމުންނެވެ. އަދި މުއިއްޒުއާ ބައްދަލު ކުރެއްވުމަށް ނޫސްވެރިންގެ ޖަމިއްޔާ މޯލްޑިވްސް ޖާނަލިސްޓް އެސޯސިއޭޝަނުން ވެސް އޮތީ އެދިފަ އެވެ.
އެ ބައްދަލުވުން ފެށޭނީ 1:15 ގަ އެވެ. މުއިއްޒު ނޫސްވެރިންނާ ބައްދަލު ކުރައްވަން ނިންމީ ރައީސުލްޖުމްހޫރިއްޔާގެ އޮފީހުގަ އެވެ. މުއިއްޒު ނޫސްވެރިންނާ ބައްދަލު ކުރައްވަން ނިންމިއިރު ނޫސްވެރިން ދަނީ ރައީސް އޮފީސް ކުރިމަތީ ހަދާފައި ހުރި މީޑިއާ ފެންޑާގައި މުޒާހަރާ ކުރަމުންނެވެ.
މުއިއްޒުއާ ބައްދަލު ކުރަން ރައީސް އޮފީހަށް ވަޑައިގަތީ އަދަދު ނޫހުގެ ޗީފް އެޑިޓަރު ހުސެއިން ފިޔާޒް މޫސާ އާއި ދައުރު ނޫހުގެ ޗީފް އެޑިޓަރުން ހިރިގާ އަހުމަދު ޒާހިރު އާއި މިހާރު ނޫހުގެ ނާޒިމް ހަސަން އާއި ނޫސްވެރިންގެ ޖަމިއްޔާގެ ޖުނައިދު ސަލީމް އާއި މީޑިއާ ކައުންސިލުގެ މެންބަރު ނަހުދާ ފާއިޒް އެވެ.
އެ ބިލާ ދެކޮޅަށް މުޒާހަރާ ކުރި ހަތަރު ނޫސްވެރިއަކު ފުލުހުން ވަނީ އިއްޔެ ހައްޔަރުކޮށްފަ އެވެ. އެއީ ދައުރު ނޫހުގެ މުޒައްޔިން ނާޒިމް އާއި ސިޓިޒެން ނޫހުގެ މޫސާ ރަޝީދު އާއި އަދަދު ނޫހުގެ އަހުމަދު އާއިދު އަދި އެމްވީ ޕްލަސް ގެ ލަމްޔާ އަބްދުލްހާދީ އެވެ.
އެ ނޫސްވެރިން ހައްޔަރު ކުރުމަށްފަހު ވަނީ ފުލުހުންގެ ވެހިކަލަށް ވެސް އަރުވައިފަ އެވެ. އަދި ހައްޔަރު ކުރި ކަމުގެ ގާނޫނީ އިންޒާރު ވެސް ނޫސްވެރިންނަށް ދިނެވެ. ނޫސްވެރިން ދޫކޮށްލީ މުޒާހަރާ ކުރަމުންދިޔަ ސަރަހައްދުން ދުރަށް ގެންގޮސް، މުޒާހަރާގައި ބައިވެރިނުވާން ޝަރުތު ކުރުމަށްފަހު އެވެ.
މިނިވަން މީޑިއާ ނެތިކޮށްލާ ބިލު، ވެރިކަން ކުރާ ޕީއެންސީގެ މެންބަރުންގެ ތާއީދާއެކު ވަނީ އިއްޔެ ބަލައިގެންފަ އެވެ. އަދި އެ ބިލުގެ މަސައްކަތްތަކެއް އަންނަ ހަފުތާގައި ކުރިއަށް ގެންދިޔުމަށް މިއަދު މަޖިލީހުން ބޭއްވި ކޮމިޓީއެއްގައި ވަނީ ނިންމައިފަ އެވެ.
އެ ބިލުގެ ބަހުސް މަޖިލީހުގައި އިއްޔެ ކުރިއަށްދިޔައިރު، ބައެއް ނޫސްވެރިން އުލުބައިންދާ މަރަންޖެހޭ ކަމަށް ޕީއެންސީގެ ޕާލަމެންޓަރީ ގްރޫޕުގެ ލީޑަރު އިބްރާހިމް ފަލާހު ވަނީ ގޮވާލައިފަ އެވެ.
"... މި ލެވެލުގައި މަސައްކަތް ކުރީމަ މީޑިއާ ގެންގޮސް ޖަލަކަށް ނޫން [ލާންވީ]، އުލުބައިންދަންވަނީ. އުލުބައިންދަންވީ،" ދައުރުން ބޭރުގައި އިއްޔެ ބޭއްވި ރައްޔިތުންގެ މަޖިލީހުގެ ޖަލްސާގައި ފަލާހު ވިދާޅުވި އެވެ.
ތުޅާދޫ ދާއިރާގެ މެންބަރު އަބްދުލްހަންނާނު މުހައްމަދު (އެންޓްރެކް ހަންނާނު) ހުށަހެޅުއްވި މީޑިއާ ނެތިކޮށްލާ ބިލު ފަރުމާކޮށްފައި އޮތީ މިނިވަންކަމާއެކު ނޫސްވެރިކަން ކުރެވޭނެ މަގު ބަންދު ކުރެވޭނެ ގޮތަށެވެ. އެ ބިލުގެ ދަށުން ކޮމިޝަނެއް އުފައްދައި، އެ ކޮމިޝަނުގެ ބާރު ރައީސް މުހައްމަދު މުއިއްޒަށް ނެގޭނެ މަގު ވެސް ބިލުން ފަހިވެ އެވެ.
އެ ބިލު މިހާރު އޮތް ގޮތަށް ފާސްވެއްޖެ ނަމަ، ނޫސްވެރިންނާއި ނޫސްތައް ޖޫޫރިމަނާކޮށް، ހުއްޓުވައި، ރެޖިސްޓްރޭޝަން ވެސް ބާތިލު ކުރެވޭނެ އެވެ.
އެ ބިލުގެ 60 ވަނަ މާއްދާގައި ބުނެފައިވާ ގޮތުން އެ ބިލުގެ ބާރު ސޯޝަލް މީޑިއާއަށް ވެސް ހިނގާނެ އެވެ. އެ މާއްދާގައި ބުނެފައި ވަނީ "މި ގާނޫނުގައި ނޫހާ ގުޅޭ ގޮތުން ބަޔާންކޮށްފައިވާ އުސޫލުތައް، އިލެކްޓްރޯނިކް މީޑިއާއަށް ވެސް އެ މީޑިއާއަކާ ގުޅޭ ނިސްބަތަކުން ހިނގާނެ" ކަމަށެވެ.
އެހެންކަމުން ސަރުކާރުން ބޭނުންވާ ގޮތަށް އެ ބިލު ފާސްވެއްޖެ ނަމަ، ސޯޝަލް މީޑިއާގައި ވެސް މިނިވަންކަމާއެކު ހިޔާލުފާޅު ކުރުމަށް ހުރަސްއެޅޭނެ އެވެ. ބިލުގެ 40 ވަނަ މާއްދާގެ ހ. ގައި ބުނެފައިވާ ގޮތުން، ދޮގަކަށް ވެދާނެ ފަދަ މައުލޫމާތެއް ވެސް ނޫހެއްގައި ޖެހުމަކީ ކުށެކެވެ.
އެ ބިލު ބޭރުކޮށްލުމަށް ރާއްޖޭގެ ނޫސްވެރިންނާއި ހައްގުތަކަށް ވަކާލާތު ކުރާ ބޭރުގެ ވަރަށް ގިނަ ޖަމިއްޔާތަކުން ވެސް ދަނީ ގޮވާލަމުންނެވެ. އެކަމަކު، ސަރުކާރުން މިހާތަނަށް އެކަންކަމަށް ޖަވާބެއް ނުދެ އެވެ. ގިނަ ބަޔަކު ބުނަނީ، މިއީ އެފަދަ ބިލެއް ހުށަހެޅި ދެ ވަނަ ފަހަރު ކަމުން މި ފަހަރު އެ ބިލު ފާސް ކުރާނެ ކަމަށެވެ.
ރައްޔިތުންގެ މަޖިލީހަށް އެ ބިލު ހުށަހެޅި ފަހުން، މުއިއްޒު ގެންދަވަނީ މީޑިއާއާ ގުޅޭ ގޮތުން ދޮގު ފަތުރައި، ހަގީގަތް އޮޅޭ ގޮތަށް ވާހަކަ ދައްކަވަމުންނެވެ. ގައުމީ ދުވަހުގެ މުނާސަބަތުގައި މިއަދު ބޭއްވި ޖަލްސާގައި މުއިއްޒު ވަނީ އެމަނިކުފާނުގެ ރުޅިވެރިކަން މީޑިއާތަކަށް އަމާޒުކޮށްފަ އެވެ.
"މި ހޯލު ތެރޭގަ މި ތިބީ އެންމެން. މިސާލެއްގެ ގޮތުގަ މިކަމާ ބެހޭ ގޮތުން އެއްޗެއް ދަންނަވާލާނަން. ތީގެ ތެރެއިން ބޭފުޅަކު ތިމަންނަގެ ހިޔާލުފާޅުކުރުމުގެ މިނިވަންކަމޭ މިތާ ތެދުވެ އިއުލާނުކޮށްލަންވީ މިތާ ބޮމެއް އެބަ އޮތޭ. [އެހެން] ކިޔާފަ ހަޅޭލަވައިލައްވަންވީ. އެއީ މިނިވަންކަންތޯ. ދެން އެހެން މީހުންގެ ހައްގުތަކަށް އެ ހިސާބުން ވާނީ ކިހިނެއްތޯ،" މުއިއްޒު ވިދާޅުވި އެވެ.
