ރައީސް މުހައްމަދު މުއިއްޒު އަތޮޅު ތެރެއަށް ކުރައްވާ ދަތުރުތަކުގެ ތެރެއިން ކުރައްވާ މައިގަނޑު ކަމަކީ ގިނަ ރަށްރަށުގައި ބޭންކް އޮފް މޯލްޑިވްސް (ބީއެމްއެލް) ގެ އޭޓީއެމް ހުޅުވަން ރިބަން ކެނޑުން ކަމަށް ބުނެ ކުރިމަތިވަމުންދާ ފާޑުކިޔުންތަކަށް އެމަނިކުފާނު ރައްދު ދެއްވައިފި އެވެ.
ހދ. އަތޮޅަށް ކުރައްވަމުން ގެންދަވާ ދަތުރުގެ ތެރެއިން ނެއްލައިދޫ ރައްޔިތުންނާ ބައްދަލުކުރައްވާ ވާހަކަ ދައްކަވަމުން މުއިއްޒު ވިދާޅުވީ، އޭޓީއެމް ބެހެއްޓުމަކީ އާދައިގެ ކުޑަ ކަމެއް ނޫން ކަމަށެވެ.
"[މި ރަށުގައި ވެސް] އަޅުގަނޑުމެން އޭޓީއެމް އެއްގެ ހިދުމަތް ފަށައިފިން. އޭޓީއެމް ބަހައްޓާތީ ބައެއް ފަރާތްތަކުން އެކަން އާދައިގެ ކަމަކަށް އެބަ ހަދާ. އެއީ އާދައިގެ ކަމެއް ނޫން. ފަހަރެއްގަ މިފަދަ ރަށްރަށުގެ ރައްޔިތުންނަށް މިކަމުގެ މުހިންމުކަން. މިފަދަ ކަންކަމުގެ މުހިންމުކަން އެނގިވަޑައިނުގަންނަވަންޏާ އާދައިގެ ކަމަކަށް ބައެއް ފަރާތްތަކުން ހަދާފާނެ،" މުއިއްޒު ވިދާޅުވި އެވެ.
އެމަނިކުފާނާއި މި ސަރުކާރުގެ ސިޔާސަތަކީ ހުރިހާ ރައްޔިތުންނަށް ހަމަހަމަ އުސޫލެއްގެ ދަށުން ހިދުމަތް ދިނުން ކަމަށް ވެސް ވިދާޅުވި އެވެ. އޭގެ ތެރޭގައި ބޭންކިންގެ ހިދުމަތް ހިމެނޭކަން ފާހަގަކުރެއްވި އެވެ.
"އެހެން ނޫނި މި ވާ ގޮތަކީ އޭޓީއެމް ނުހުންނަ ރަށްރަށުގެ ރައްޔިތުން ކައިރި ކޮންމެވެސް އޭޓީއެމް ހުންނަ ރަށަކަށް، އަތުން ހަރަދުކޮށްފަ ފައިސާ ޖަމާކުރަން، ނޫނިއްޔާ ނަގަން ދާން މި ޖެހެނީ،" މުއިއްޒު ވިދާޅުވި އެވެ.
އެމަނިކުފާނު މިހެން ވިދާޅުވި ނަމަވެސް، ސޯޝަލް މީޑިއާގައި ގިނަ ބަޔަކު ފާޑުކިޔަނީ އޭޓީއެމް ބަހައްޓާތީއެއް ނޫނެވެ. ފާޑުކިޔުން އަމާޒުވާ މައިގަނޑު ސަބަބަކީ ކޮންމެ އޭޓީއެމް އެއް ހުޅުވުމަށް މުއިއްޒު ވަޑައިގަންނަވާތީ އެވެ
މީހުން ދިރިއުޅޭ ހުރިހާ ރަށެއްގައި އޭޓީއެމް ހިދުމަތް ދިނުމަށް ހިންގާ މަޝްރޫއުގެ ދަށުން 103 އޭޓީއެމް އަންނަ އަހަރު ގާއިމު ކުރުމުގެ މަޝްރޫއެއް ބީއެމްއެލް އިން ފެށީ މިދިޔަ ނޮވެމްބަރު މަހު އެވެ.
އެ މަޝްރޫއު ފެށިއިރު ޖުމްލަ 90 ރަށުގައި ބީއެމްއެލްގެ 150 އޭޓީއެމްއަކުން ހިދުމަތް ދެމުން ދިޔަ އެވެ. އެ އޭޓީއެމްތަކުގެ ބޭނުން އަހަރެއްގެ މައްޗަށް 15 މިލިއަން ފަހަރު ކަސްޓަމަރުން ބޭނުން ކުރެ އެވެ.
