ބ. އަތޮޅު ދޮންފަނުގެ ތަރައްގީއަށް އޮތް އެންމެ ބޮޑު އުއްމީދަކީ ލާމަރުކަޒީ މާލީ ބާރުވެރިކަން ކަމަށާއި އެއީ ކައުންސިލް އިމާރާތަކަށް ވުރެ މާ މުހިއްމު ކަމެއް ކަމަށް، އެ ރަށު ކައުންސިލްގެ ރައީސް އަހުމަދު އިރުޝާދު ވިދާޅުވެއްޖެ އެވެ.
ރައީސް މުހައްމަދު މުއިއްޒު ބ. އަތޮޅަށް ކުރައްވާ ދަތުރުގައި ދޮންފަނަށް އިއްޔެ ވަޑައިގެން ރައްޔިތުންނާއެކު ބޭއްވި ޖަލްސާގައި އިރުޝާދު ވިދާޅުވީ ލާމަރުކަޒީ ގާނޫނު ބަދަލުކޮށް ކައުންސިލްތަކުގެ ބާރު ހަނިކުރަން ރައްޔިތުންގެ މަޖިލީހުން ފާސްކޮށްފައިވާ ބިލާމެދު ނުހަނު ކަންބޮޑުވާ ކަމަށެވެ.
"ކައުންސިލްތަކުގެ އާމްދަނީ ދަށްވާނެ އިސްލާހުތައް ތަސްދީގު ނުކުރުމަށް ރައީސުލްޖުމްހޫރިއްޔާގެ ކިބައިން ވަރަށް އަދަބުވެރިކަމާއެކު އަޅުގަނޑު އެދެން،" އިރުޝާދު ވިދާޅުވި އެވެ.
ލާމަރުކަޒީ ގާނޫނަށް މިދިޔަ ހަފުތާގެ ބުދަ ދުވަހު ގެނައި އިސްލާހުތައް އަދި ރައީސް މުއިއްޒު ތަސްދީގެއް ނުކުރައްވަ އެވެ.
އެ ބިލްގައި ހިމެނޭ ބަދަލުތަކުގެ ތެރޭގައި ވިޔަފާރި ކުރުމަށާއި ތަންތަން ކުއްޔަށް ދިނުމަށާއި ތަރައްގީގެ ޕްރޮޖެކްޓު ހިންގުމަށާއި މުވައްޒަފުން ނެގުމަށް ކައުންސިލަށް ލިބިދީފައިވާ ބާރު ހަނިކުރުން ހިމެނެ އެވެ.
އެހެންވެ އެ ބިލާ ދެކޮޅަށް 80 އަށް ވުރެ ގިނަ ކައުންސިލްތަކުން ބަސްބުނެ، އެ ބިލް ފާސް ނުކުރަން ވަނީ ގޮވާލައިފަ އެވެ.
މަޖިލީހުން ފާސް ކުރި ބިލުން ކައުންސިލުތަކަށް ކުރިމަތި ކުރުވާ ހުރަސްތައް
- ވިޔަފާރި ކުރަން ކުރިމަތި ކުރުވާ ހުރަސްތައް
- އަމިއްލަ މީހަކު ކުރަމުންދާ ވިޔަފާރިއެއް ނުކުރެވޭ ގޮތް ހެދުން
- އުމްރާނީ ތަރައްގީއަށް ކޮންމެހެން ބޭނުންވާ މަސައްކަތެއް ނޫނީ ނުކުރެވުން
- ވިޔަފާރީގެ އިންވެސްޓްމަންޓު ނުވަތަ ރައުސުލްމާލު 10 މިލިއަން ރުފިޔާއަށް ވުރެ ބޮޑުވުން
- ކައުންސިލުން މިހާރު ކުރަމުންދާ ވިޔަފާރިތައް މަތީގައި ބަޔާން ކުރާ އުސޫލަކާ ހިލާފުވެއްޖެ ނަމަ އެ ވިޔަފާރިއެއް ތިން މަސްދުވަސް ތެރޭ ހުއްޓާލަން ޖެހުން
ތަންތަން ކުއްޔަށް ދިނުމަށް އެޅި ހުރަސްތައް
- އަސާސީ ހިދުމަތް ދިނުމަށް އެކި ފަރާތްތަކަށް ދޫކޮށްފައިވާ ބިންތަކުން ކުލި ނެގުން މަނާ ކުރުން.
މާލީ ކަންކަމަށް ނުފޫޒު ފޯރުވުން
- ފިނޭންސް މިނިސްޓްރީ އިން ކަނޑައަޅާ އުސޫލެއްގެ ދަށުން ކައުންސިލުތަކުގެ ބޭންކް އެކައުންޓުތައް ބަލަހައްޓަން މަޖުބޫރު ކުރުވުން
- ފިނޭންސް މިނިސްޓްރީ އިން ބޭނުންވެއްޖެ ހިނދެއްގައި ކައުންސިލުގެ ބޭންކު އެކައުންޓުގެ ސްޓޭޓްމަންޓެއް ދިނުމަށް މަޖުބޫރު ކުރުވުން
ކައުންސިލުގެ މަސައްކަތަށް ހުރަސް އެޅުން
- ކައުންސިލެއްގެ އުމުރުގައި ބާކީ އަހަރެއް އޮތް ނަމަ ދާއިމީ އަދި ކޮންޓްރެކްޓަށް ވެސް މުވައްޒަފުން ނެގޭނެ މަގު ބަންދު ކުރުން
- ކައުންސިލެއްގެ އުމުރުގައި ބާކީ އަހަރެއް އޮތް ނަމަ ކައުންސިލުގެ އިހުތިސާސްގެ ދަށުގައިވާ ބިމާއި ފަޅާއި ފަރުގެ ސަރަހައްދުގެ ކުއްޔަށް ދޫކުރުން މަނާ ކުރުން
- ކައުންސިލެއްގެ އުމުރުގައި ބާކީ އަހަރެއް އޮތް ނަމަ ތަރައްގީގެ އާ މަޝްރޫއުއެއް ހިންގުން މަނާ ކުރުން
