ރޯމް، އިޓަލީ (އޮގަސްޓް 12) - މި ވަގުތު ކުޅޭނެ ޓީމެއް ނެތް ކަމުގައި ވިޔަސް ފުޓްބޯޅަ އިން ރިޓަޔާކުރުމުގެ ވިސްނުމެއް ނެތް ކަމަށް އިޓަލީގެ މާރިއޯ ބަލޮޓެއްލީ ބުނެފި އެވެ.
މިދިޔަ ސީޒަނުގައި ޖެނޯއާ އަށް ކުޅުމަށް ފަހު، ބަލޮޓެއްލީ ހުރީ ޓީމަކާ ނުގުޅި އެވެ.
މިއަދު، 35 އަހަރު ފުރޭ އުފަން ދުވަސް ފާހަގަކުރާ ބަލޮޓެއްލީ، އިޓަލީގެ މީޑިއާއެއް ކަމަށްވާ، ލަ ގަޒެޓާ ޑެލޯ ސްޕޯޓްސް އަށް ދިން އިންޓަވިއުއެއްގައި ބުނެފައިވަނީ، ކުޅޭނެ އާ ކްލަބެއް ހޯދުމުގެ މަސައްކަތް ކުރަމުން އަންނަ ކަމަށެވެ.
"އަމިއްލަ ސިއްހަތާއި ގާތްމީހުންގެ ކަންކަމަށް މި ވަގުތު ފަރުވާ ބަހައްޓައިގެން މި އުޅެނީ، ދެން، އަހަރެން ކުޅޭނެ ކްލަބެއް ކަނޑައެޅުމުގެ މަސައްކަތް ވެސް ދަނީ ކުރަމުން، އަދި، އިތުރު ދޭން ނޫނީ ތިން އަހަރު ކުޅޭނަން. އޭގެ ފަހުން، އަހަރެންގެ ކޮއްކޮގެ ކަންކަން ބަލަހައްޓަން ހުންނާނީ،" ޔޫރަޕްގެ މަޝްހޫރު ގިނަ ޓީމުތަަކަށް ކުޅެފައިވާ ބަލޮޓެއްލީ ބުންޏެވެ.
ބަލޮޓެއްލީ އަކީ، އިޓަލީގެ ފުޓްބޯޅައިގެ ވަރުގަދަ ދެ ބާރު ކަމަށްވާ އޭސީ މިލާނާއި އިންޓަ މިލާނަށް ކުޅުނު އެ ގައުމަށް އުފަން މަދު ކުޅުންތެރިންގެ ތެރެއިން އެކަކެވެ. ބަލޮޓެއްލީ ބުނީ، އޭނާ އަކީ އިންޓަގެ ސަޕޯޓަރެއް ކަމަށާއި އައިޑަލް އަކީ ބްރެޒިލްގެ ރޮނާލްޑޯ ނަޒާރިއޯ ކަމަށެވެ.
އޭސީ މިލާންގެ ކޯޗުކަމަށް އަލުން މެސިމޯ އަލެގްރީ އައުމާ އެކު، އެ ޓީމަށް ކުރު ކޮންޓްރެކްޓެއްގައި ބަލޮޓެއްލީ ގޮސްފާނެ ކަމުގެ އަޑުތަކެއް މީޑިއާގައި ވަނީ ފެތުރިފަ އެވެ. އެ އަށް ސީދާ ޖަވާބެއް ނުދީ ބަލޮޓެއްލީ ބުނެފައިވަނީ، އަލެގްރީއާ އެކު މިލާން ހަމަ މަގަށް އެޅޭނެ ކަމަށެވެ.
އިންޓަ އިން 2007 ވަނަ އަހަރު ފާހަގަވާން ފެށި ބަލޮޓެއްލީ ވަނީ، މެންޗެސްޓާ ސިޓީ، ލިވަޕޫލް، މިލާން، ނީސް، މާސޭ، ބްރެސިއާ، މޮންޒާ، އަޑަނަ ޑެމިރްސްޕޯ، ސިއޯން އަދި ޖެނޯއާ އަށް ކުޅެފަ އެވެ.
އިޓަލީގެ ގައުމީ ޓީމަށް 2010 ވަނަ އަހަރު ކުޅެން ފެށި ބަލޮޓެއްލީ އެންމެ ފަހުން ގައުމީ ޓީމުގައި، ހިމެނުނީ، މީގެ ތިން އަހަރު ކުރިން، 2022 ވަނަ އަހަރު އެވެ. އެއީ، އޭރުގެ އިޓަލީ ކޯޗު ރޮބާޓޯ މަންޗިނީ ކުރިއަށްގެންދިޔަ ޓްރެއިިނިން ކޭމްޕަކުން ދިން ފުރުސަތެކެވެ.
