ދިވެހިރާއްޖޭގެ ބާ ކައުންސިލްގެ ނައިބު ރައީސް ކަމަށް އެ ކައުންސިލްގެ އެގްޒެކެޓިވް ކޮމިޓީގެ މެންބަރު، އިބްރާހިމް ޝަމީލް އިންތިހާބުވެއްޖެ އެވެ.
ބާ ކައުންސިލްގެ އެގްޒެކެޓިވް ކޮމިޓީއަށް މެންބަރުން އިންތިހާބު ކުރުމަށް ބުރާސްފަތި ދުވަހު ބޭއްވި އިންތިހާބުގައި އެ ކައުންސިލްގެ ނައިބު ރައީސް ކަމަށް ޝަމީލް އިންތިހާބުވީ 291 ވޯޓު ހޯދައިގެންނެވެ. އޭނާއާ ވާދަކުރި މައާޝާ ލުތުފީއަށް ލިބުނީ 216 ވޯޓެވެ.
އެ އިންތިހާބުގައި ބާ ކައުންސިލްގެ އެގްޒެކެޓިވް ކޮމިޓީއަށް ވެސް ދެ މެންބަރުން އިންތިހާބު ކުރި އެވެ. އެގްޒެކެޓިވް ކޮމިޓީއަށް އިންތިހާބުވީ 294 ވޯޓު ހޯދި އަބްދުالله ނާހިދު އާއި 284 ވޯޓު ހޯދި އަހުމަދު ޝާފިއު އެވެ. އެގްޒެކެޓިވް ކޮމިޓީއަށް ދެން ވާދަކުރި ސަމާހަތު އަބްދުއްލަތީފްއަށް ލިބުނީ 146 ވޯޓެވެ.
ދިވެހިރާއްޖޭގެ ގާނޫނީ ފަންނުގެ ގާނޫނުގައި ބަޔާން ކޮށްފައި ވާގޮތުން ބާ ކައުންސިލުގެ އެގްޒެކެޓިވް ކޮމިޓީ މެންބަރުންގެ ދައުރަކީ ތިން އަހަރެވެ. އެ ކޮމިޓީގައި މިހާރު ތިއްބެވި މެންބަރުންގެ ތެރެއިން ހަތަރު ބޭފުޅެއްގެ ދައުރު އަންނަ ޖުލައި 14، އަށް ހަމަވާނެ އެވެ. އެ ބޭފުޅުންނަކީ:
- އިބްރާހިމް ޝަމީލް
- އަހުމަދު މުއިއްޒު
- ދީނާ ހުސައިން
- ސާދިހު ނަސީރު
އެ ބޭފުޅުންގެ އިތުރުން އެ ކޮމިޓީގެ ނައިބު ރައީސް، މިޒްނާ އަހުމަދުގެ ދައުރު ވެސް ޖުލައި 14، އަށް ހަމަވާނެ އެވެ.
ބާ ކައުންސިލްގެ ނައިބު ރައީސްއަކަށް އިންތިހާބުކުރި ޝަމީލު އަކީ ސުޕްރީމް ކޯޓުގެ ފަނޑިޔާރުކަމުން ޑރ. އަޒަމިރާލްދާ ވަކިކުރި މައްސަލައިގައި އޭނާގެ ވަކީލެވެ.
