ގައުމީ ފުޓްބޯޅަ ޓީމަށް 20 އަކަށް އަހަރު ކުޅުމަށް ފަހު، ރިޓަޔާކުރި، ރާއްޖޭގައި އުފެދުނު އެންމެ މޮޅު ގޯލްކީޕަރު، އިމްރާން މުހައްމަދު، ރޭ ސޯޝަލް މީޑިއާގައި ފާޅުުކުރީ ރާއްޖޭގެ ކުޅިވަރުގެ ހައްގުގައި ވަރަށް މުހިންމު ކަމަށް ފެންނަ ޝުއޫރެއް ކަމަށް ބުނެފި އެވެ. .
އިމްރާން ވަނީ ގައުމީ ޓީމަށް މެދު ކެނޑުމެއްނެތި 17 އަހަރަށްވުރެ ގިނަ އަހަރު ކުޅެފަ އެވެ. އަދި، ގައުމީ ޖާޒީގައި 110 މެޗު ކުޅެދިން އިމްރާން އަކީ ފީފާ ސެންޗަރީ ޓީމަށް އެރި ހަމައެކަނި ދިވެހި ކުޅުންތެރިޔާ އެވެ.
އިމްރާން އޭނާގެ ސޯޝަލް މީޑިއާގައި ރޭ ކުރި ޕޯސްޓެއްގައި ބުނެފައިވާ ގޮތުގައި، ގައުމީ ޓީމަށް ކުޅުމަށްޓަކައި ވީ ގުރުބާނީގެ ބަދަލުގައި، 20 ވަރަކަށް އަހަރު ވަޒީފާއަކަށް ދިޔަނަމައޭ ހިތަށް އަރާ ކަމަށެވެ. އޭރުން އެންމެ ކުޑަ މިނުން "ރިޓަޔާމަންޓް ޕެންޝަން" ލައްވާލާނެ ކަމަށް އިމްރާން ވަނީ ބުނެފަ އެވެ.
"20 ވަރަކަށް އަހަރު ތެރޭގައި ޤައުމީޓީމަށް 110 މެޗު ކުޅެ، އެތަކެއް އަނިޔާއެއްވެ، އާއިލީ އެތައް މުހިއްމު އަދި ހާއްސަ ވަގުތުތަކެއް ޤުރުބާންކޮށް ޤައުމަށް އެތަކެއް ކާމިޔާބީއެއް ހޯދަދީފައި، ކެރިއަރު ނިންމާލުމަށްފަހު މިއަދު އިށީނދެލައިގެން އިނދެ ރަނގަޅަށް ވިސްނާލާއިރު ހިތަށް މި އަރަނީ އަސްލު މި ކުރެވުނީ ރަނގަޅު ކަމެއްބާވަޔޭ؟ މިހާރު ހިތަށް އެބަ އަރާ މިކަން ނުކޮށް 20 އަހަރު ވަޒީފާއަކަށް ދެވުނުނަމަ ހަމަ ގައިމުވެސްެ އެއްމެ ކުޑަމިނުން ޕެންޝަން ވެސް ލައްވާލާނެތާއޭ!" އިމްރާން ރޭ ކުރި ޕޯސްޓުގައި ބުނެފައިވެ އެވެ.
އިމްރާން، ފޭސްބުކްގައި ކުރި ޕޯސްޓް.
އިމްރާން ބުނީ ކުޅިވަރުގައި ނަތީޖާތަކެއް ނެރޭ ހުނަރުވެރި އެތުލީޓުން ދިގު މުއްދަތެއްގައި ގައުމީ ޖާޒީގައި ދެމި ތިބޭނީ އެކަން ކޮށްގެން އެ އެތުލީޓުގެ ދިރިއުޅުމަށް މުސްތަގުބަލުގައި ފައިދާއެއްވާނެ ނަމަކަން ގަބޫލުކުރާ ކަމަށެވެ.
އިމްރާން ބުނީ ރާއްޖޭގައި ތިބި ހުނަރުވެރި ގިނަ އެތުލީޓުން ގެއްލެނީ ކުޅިވަރު ކުޅެގެން މުސްތަގުބަލުގައި ފައިދާއެއް ވާނެތަން ނުފެންނާތީ ކަމަށެވެ. އަދި މި ކަމަކީ ކުޅިވަރު އެސޯސިއޭޝަންތަކުން، ކުޅިވަރާ ބެހޭ ވުޒާރާ އަދި ކުޅިވަރާ ގުޅުންހުރި އެންމެހާ ތަންތަނުން ވިސްނާލުން މުހިންމު ކަމެއް ކަމުގައި އިމްރާން ވަނީ ބުނެފަ އެވެ.
އިމްރާން ބުނީ މީގެ ކުރިން މިކަންކަން ހައްލުކުރާނެ ކަމަށް ބުނެ ފޮނި ހުވަފެންތައް ފެނިގެންދިޔަ ކަމަށާއި، އެކަމަކު އެ ހުވަފެންތަކުގައި މިއަދާ ހަމައަށްވެސް ކުލަ ނުޖެހޭ ކަމަށެވެ.
ގައުމުގެ ކުޅިވަރުގެ މުސްތަގުބަލަށްޓަކައި ދައްކަން ޖެހޭ ވާހަކައެއް
އިމްރާން، މިއަދު "އަދަދު ސްޕޯޓްސް" އަށް ބުނީ، ރާއްޖޭގެ ގައުމީ ޓީމުތަކަށް ގިނަ އަހަރުތަކެއް ވަންދެން ކުޅުނު ކުޅުންތެރިން މިއަދު ވިސްނާނެ އެއް ކަމަކީ، ގައުމަށްޓަކައި، އެ މީހުން ކޮށްދިން ހިދުމަތުގެ ބަދަލުގައި އެ މީހުންނަށް ލިބުނީ ކޮން ކަމެއްތޯ އެެވެ.
މީގެ ހަ އަހަރު ކުރިން، 2019 ވަނަ އަހަރު، ސަރުކާރުން ވަނީ އިމްރާން، ކުޅިވަރުގެ ރޮނގުން ކޮށްފައިވާ ހިދުމަތް ބަލައިގަނެ އޭނާ އަށް ހިތްވަރުދިނުމުގެ ގައުމީ އިނާމް ދީފަ އެވެ. އިމްރާން ބުނީ، ފާއިތުވި ސަރުކާރުތަކުން ކުޅިވަރު ހިންގާއިރު ކުރީގެ ކުުޅުންތެރިންނަށް ކޮށްދޭނެ ކަމަށް ބުނެ ގިނަ ކަންތައްތަކެއް އިއުލާނުކުރި ކަމަށާއި އެކަމަކު، އޭގެއިން އެއްވެސް ކަމެއްގައި އަމަލީ ސިފައެއް ޖެހިފައި ނެތް ކަމަށެވެ.
"އެއްވެސް ހާލަތެއްގައި ކުޅިވަރު ގާނޫނާ ގުޅިގެން ދައްކާ ވާހަކައެއް ނޫން. ހަގީގަތުގައި މި ގޮތަށް މި ހިޔާލު ފާޅުކުރީ، ރާއްޖޭގެ ކުޅިވަރުގެ ހާލަތަށް ވިސްނާފައި، ގައުމީ ޓީމަށް ގިނަ އަހަރުތަކެއް ވަންދެން ކުޅުނު ކުުޅުންތެރިންނަށް ރިޓަޔަމެންޓް ޕެންޝަނެއް ނޫނީ ބޯހިޔާވަހިކަމެއް ނޫނީ ސްކީމެއް، އިންޝުއަރެންސެއްގެ ވާހަކަ އަބަދުވެސް ދައްކާ، އެކަމަކު، ސުވާލަކީ އެ އަށް އަމަލީ ސިފައެއް އަތުވެއްޖެތޯ،" އިމްރާން ބުންޏެވެ.
އޭނާ ބުނީ، ގައުމީ ޓީމަށް ގިނަ އަަހަރުތަކެއް ވަންދެން ކުޅެފައިވާ ކުޅުންތެރިންނަށް ރިޓަޔާވުމުން ދޭން ޖެހެނީ "ސިޔާސީ މަގާމެއް" ނޫން ކަމަށެވެ. އަދި، އެ ފަދަ ސިޔާސީ މަގާމަކަށް ކުޅުންތެރިއަކު ދިއުމުން، އެތައް އަހަރެއް ވަންދެން މީހުންގެ ހިތްތަކުން ހޯދި ލޯތްބާއި އިހުތިރާމަށް ހީނަރުކަން އަންނަ ކަމަށެވެ.
"(ގައުމީ ޓީމަށް ގިނަ އަހަރުތަކެއް ވަންދެން ކުޅުނު ކުޅުންތެރިންނަށް) ސިޔާސީ މަގާމެއް ދިނުމެއް ނޫން ހައްލަކީ، އެއީ ސިޔާސީ ކަމެއްގައި، އޮންނާނެ ދެ ފަޅީގެ މީހުން. ދެ ވިސްނުމުގެ މީހުން. ގައުމީ ޓީމަށް ކުޅޭ ކުޅުންތެރިއަކަށް މި ލިބެނީ މުޅި ގައުމުގެ ލޯބި،" އިމްރާން ބުންޏެވެ.
ކުޅިވަރަށް ގިނަ ދުވަސްތަކެއް ވަންދެން ހިދުމަތްތަކެއް ކޮށްދީފައިވާ ކުޅުންތެރިންނަށް ދިމާވާ ގޮތް، އަރަމުން އަންނަ ޖީލުތަކުގެ ކުޅުންތެރިންނަށް ފެންނާނެ ކަމަށް އިމްރާން ވަނީ ބުނެފަ އެވެ. އަދި، ކުރީގެ ކުޅުންތެރިންނަށް ދިމާވެފައި އޮތް ހާލަތު އޮތްގޮތުން، މިހާރު ޒުވާން ކުޅުންތެރިންގެ ވިސްނުން ދިގު މުއްދަތަކަށް ގައުމީ ޓީމަށް ކުޅެން ނުހުންނަކަން އިމްރާން ފާހަގަކުރި އެވެ.
"ހޮބީ އެއް ކަަަހަލަ ވިސްނުމަކަށް ވަރަަށް އާދައިގެ ގޮތަަކަށް ގައުމީ ޓީމަށް ކުޅުން ވެފައި މި އޮންނަނީ. ވަކި ވަރަކަށް ކުޅެލާފައި ނިންމާލަން، އަހަރެެމެން ކުޅުނުއިރު ގައުމީ ޓީމަށް ކުޅެންޏާ ވަރަށް ބޮޑު ޒިންމާއެއް ބޮލުގައި އަޅައިގެން ތިބެ އެކަން ކުރީ، އެކަމަކު، މިހާރު ކަންތައްތައް ވަމުން އަންނަ ގޮތުން، ގައުމީ ޓީމަށް ކުޅެވުމަކީ މާ ބޮޑު ކަމަކަށް ނުވާތަން މި ފެންނަނީ، މީގެ ގެއްލުން ހަގީގަތުގައި މި ލިބެނީ ގައުމަށް،" އިމްރާން ބުންޏެވެ.
