ރޯމް، އިޓަލީ (މެއި 18) - އިޓާލިއަން އޯޕަންގެ ފައިނަލުގައި، ކޮކޯ ގޯފް އަތުން މޮޅުވެ، އިޓަލީގެ ޖާސްމީން ޕައޮލީނީ، 40 އަހަރުވީ ތާރީހު ބަދަލުކޮށްލައިފި އެވެ.
މިއީ މި މުބާރާތުގެ ޗެމްޕިއަންކަން، އިޓަލީ އަށް އުފަން އަންހެން ކުޅުންތެރިއަކު، މިދިޔަ 40 އަހަރުތެރޭ ހޯދި ފުރަތަމަ ފަހަރު އެވެ.
އިޓަލީގެ ރައީސް، ސާޖިއޯ މަޓަރެއްލާ ވެސް އިއްޔެގެ މެޗު ބެލުމަށް ފޯރޯ އިޓާލިކޯ އަށް ވަޑައިގެންނެވިއިރު، ގޯފް އަތުން ޕައޮލީނީ މޮޅުވީ 6-4، 6-2 އިން ސެޓުތައް ގެންގޮސްގެންނެވެ. މިދިޔަ އަހަރުގެ ފްރެންޗް އޯޕަން އާއި ވިމްބަލްޑަންގެ ފައިނަލަށް ދަތުރުކުރި ޕައޮލީނީ ވަނީ ގޯފްއާ ދެކޮޅަށް ކުޅުނު މެޗު އެއް ގަޑިއިރާއި 30 މިނިޓަށް ދިގުލައިގެންދިޔައިރު ވެސް ތަފާތު ރޫހެއްގައި ކުޅެފަ އެވެ.
"އަހަރެން ކުޑަ ކުއްޖެއްގެ ގޮތުގައި މި ތަނަށް މި މުބާރާތް ބަލަން އައިން. މިއަދު މި މުބާރާތުގެ ތަށި އަހަރެންގެ އަތުން ފެންނަން އޮތުމަކީ ގަބޫލުކުރަން ވެސް ދަތި އާދަޔާހިލާފު އިހުސާސެއް ކުރެވޭ ކަމެއް. މިއީ ހުވަފެނެއް ހަގީގަތަކަށް ވުން،" ޕައޮލީނީ ބުންޏެވެ.
ޕައޮލީނީ އަކީ، 1985 ވަނަ އަހަރު ރަަފައެއްލާ ރެއްޖީ، މި މުބާރާތުގެ ޗެމްޕިއަންކަން ގެނައި ފަހުން، ތަށި ހޯދި ފުރަތަމަ އަންހެން ކުުޅުންތެރިޔާ އެވެ. މިއީ، 1930 ގައި ފެށި މި މުބާރާތުގެ ޗެމްޕިއަންކަން ޖުމްލަ އެކު، އިޓަލީ އަށް އުފަން ކުޅުންތެރިއަކު ހޯދި ހަތަރު ވަނަ ފަަހަރެވެ.
