އަހުމަދުއާބާދު، އިންޑިއާ (މެއި 3) - މިހާރު ކުރިއަށްދާ މަޝްހޫރު ފްރެންޗައިސް ކްރިކެޓް މުބާރާތް، އިންޑިއަން ޕްރިމިއާ ލީގު (އައިޕީއެލް)ގައި ރޭ ކުޅުނު މެޗުން ސަންރައިޒާސް ހައިދަރުއާބާދު އަތުން 38 ލަނޑުން މޮޅުވެ، ގުޖުރާތު ޓައިޓަންސް އިން ލީގު ތާވަލުގެ ދެ ވަނަ އަށް ޖެހިލައިފި އެވެ.
އެއް ވަނައިގައި އޮތް މުމްބައި އިންޑިއަންސް އާއި ދެ ވަނައިގައި އޮތް ގުޖުރާތު އަދި ތިން ވަނައިގައި އޮތް ރޯޔަލް ޗެލެންޖާސް ބެންގަލޫރަށް ވަނީ 14 ޕޮއިންޓް ލިބިފަ އެވެ. ޖެހިޖެހިގެން ހަ މެޗުން މޮޅުވި، މުމްބައި އިންޑިއަންސް އެއް ވަނައިގައި އޮތީ 11 މެޗު ކުޅެ، ނެޓް ރަން ރޭޓުންކުރިހޯދައިގެންނެވެ. ދެ ވަނައިގައި އޮތް ގުޖުރާތާއި ތިން ވަނައިގައި އޮތް ބެންގަލޫރުން އަދި ކުޅުނީ 10 މެޗެވެ.
ނަރެންދުރަ މޯދީ ސްޓޭޑިއަމްގައި ރޭ ކުޅުނު މެޗުގައި، ހައިދަރުއާބާދަށް ޓޮސް ދިމާވުމުން އެ ޓީމުން ނިންމީ ހޮވާށެެވެ. ގުޖުރާތުން ވަނީ 20 އޯވަރުގެ ތެރޭގައި، ހަ ކުޅުންތެރިން ނުބައިވިއިރު، 224 ލަނޑު ހަދައިފަ އެވެ. އެންމެ ރަނގަޅަށް ކުޅުނީ، ޓީމުގެ ކެޕްޓަން، ސުބްމަން ގިލް އެވެ. އޭނާ ނުބައިވީ، 38 ބޯޅައިން 76 ލަނޑު ހަދާފައިވަނިކޮށެވެ. އެ ޓީމުގެ ޖޯޝް ބަޓްލާ ވަނީ، 37 ބޯޅައިން 64 ލަނޑު ހަދައިފަ އެވެ.
މި އިނިންގްސްގައި ހައިދަރުއާބާދުގެ ޖޭދޭވް އުނާދުކަޓް ވަނީ ތިން ވިކެޓް ނަގައިފަ އެވެ.
ޖަވާބުގައި ކުޅެން އަރައި، ހައިދަރުއާބާދަށް ހެދުނީ 20 އޯވަރުގެ ތެރޭގައި ހަ ކުޅުންތެރިން ނުބައިވެގެން 186 ލަނޑެވެ، އެންމެ ރަނގަޅު ކުޅުމެއް ދެއްކީ، 41 ބޯޅައިން 74 ލަނޑު ހެދި އަބިޝޭކް ޝަރްމާ އެވެ. މި އިނިންގްސްގައި ގުޖުރާތުގެ މުހައްމަދު ސިރާޖު އާއި ޕްރާސިދު ކްރިޝްނާ ވަނީ ކޮންމެ ކުޅުންތެރިއަކު ދެ ވިކެޓް ނަގައިފަ އެވެ.
މުބާރާތުގައި މިރޭ ކުޅޭ މެޗުގައި، ބެންގަލޫރު ކުޅޭނީ ޗެންނާއި ސުޕަ ކިންގްސްއާ ދެކޮޅަށެވެ. ފަސް ފަހަރު ޗެމްޕިއަންކަން ހޯދި ޗެންނާއި ވަނީ މި ފަހަރުގެ މުބާރާތުން ކަޓައިފަ އެވެ.
