ރޯމް، އިޓަލީ (މެއި 2) - މިދިިޔަ އަހަރު ތެރޭ ދެ ފަހަރެއްގެ މަތިން މަނާބޭހަށް ޕޮޒިޓިވްވި، ދުނިޔޭގެ އެއް ވަނަ ޓެނިސް ތަަރި، އިޓަލީގެ ޖަނިކް ސިނާ، އަށް އެ މައްސަލައިގެ ތެރޭގައި އަމާޒުވި ފާޑުކިޔުންތަކާ ހެދި ކުޅުން ހުއްޓާލަން ވިސްނި ކަމަށް ބުނެފި އެވެ.
ސިނާ، 23، މަނާބޭހަށް ޕޮޒިޓިވްވުމުން، އެކަމަށް އިންޓަނޭޝަނަލް ޓެނިސް އިންޓަގްރިޓީ އެޖެންސީ (އައިޓީއައިއޭ) އިން އެކުލަވާލި ޕެނަލުން ނިންމާފައިވަނީ، ގަސްދުގައި ކުރި ކަމެއް ކަމަށްވާތީވެ، ސިނާ ސަސްޕެންޑް ކުރެވެން ނެތް ކަމަށެވެ. އެކަމަކު، ފަހުން ވާޑާ އިން އެ މައްސަލަ ކޯޓް އޮފް އާބިޓްރޭޝަން ފޯ ސްޕޯޓްސް (ކާސް) އަށް ހުށަހަޅައި، ސިނާ ދެ އަހަރަށް ސަސްޕެންޑް ކުރަން އެދުނެވެ.
ކާސްގައި މި މައްސަލަ ތާވަލުކުރި ފަހުން، ސިނާ ވަނީ، ވާޑާއާ އެކު، އެއްބަސްވުމެއް ހަދައި، ކުށަށް އިއުތިރާފްވެފަ އެވެ. އެ ހުރިހާ ކަމަކަށް ބަލައި، ވާޑާ އިން ނިންމީ، ސިނާ ތިން މަހަށް ސަސްޕެންޑް ކުރުމަށެވެ. އެއީ، ސިނާގެ ސާމްޕަލުން މަނާބޭސް ފެނުނީ އޭނާ އަށް ފަރުވާ ދިނުމުގައި، ފިޒިއޯތެރަޕިސްޓު ބޭނުންކުރި ބޭހެއްގެ ސަަބަބުން ކަމަށް ވާޑާ އިން ހޯދި ހޯދުމުން އެނގިފައިވާތީ އެވެ.
ސިނާ އަށް ދީފައިވާ ސަސްޕެންޝަން ހަމަވާނީ މި މަހު ފަސް ވަނަ ދުވަހަށެވެ. މި މަހު ހަ ވަނަ ދުވަހު ފަށާ ރޯމް އޯޕަންގައި ސިނާ އަށް ކުޅެވޭނެ އެވެ. ކުޅުމަށް އެނބުރި އައުމުގެ ކުރިން، އިޓަލީގެ މީޑިއާ އަކަށް ދިން އިންޓަވިއުއެއްގައި ސިނާ ބުނެފައިވަނީ، މަނާބޭހުގެ މައްސަލަތަކުގެ ތެރޭގައި ގިނަ ކަންތައްތަކެއް ތަހައްމަލުކުރި ކަމަށެވެ.
"އަހަރެން ހަނދާންވޭ، މި އަހަރުގެ އޮސްޓްރޭލިއަން އޯޕަން ތެރޭގައި، އަހަރެން އުޅުނީ މި ޑޯޕިން މައްސަލަ (މަނާބޭހުގެ މައްސަލަ) ތެރޭގައި، ރަނގަޅަކަށް ނޫން ކުޅުންތެރިން އަހަންނާ މެދު ދެކެމުން އައީ. ލޮކަރޫމް ތެރޭގައި އަހަރެން ކާން ހުންނައިރު، އެހެން ކުޅުންތެރިން އަހަންނާ މެދު ދެކެމުން އައީ ވަރަށް ދެރަކޮށް، އަހަންނާ މެދު ހިތްހަމަނުޖެހޭ މާހައުލެއް ހުރިހާ ދިމާލަކުން ފެންނަމުންދިޔައީމަ އަހަންނަށް ހީވި މިއީ އަހަންނަށް ހައްގު ގޮތެއް ނޫނޭ،" މި އަހަރުގެ ޖެނުއަރީގައި އޮސްޓްރޭލިއަން އޯޕަންގައި އުޅުނު ހަނދާންތައް ކިޔައިދެމުން ސިނާ ބުންޏެވެ.
"އަހަންނަކީ މީހުންގެ ނަޒަރުގައި ޖޯކެއް ގޮތަށް ވެފައި އޮތީ، ކުޅުން ހުއްޓާލުމުގެ ވިސްނުން ވެސް އައި، އެކަމަކު، ކަން ދިމާކުރި ގޮތުން، އަހަންނަށް މި ލިބުނު ސަސްޕެންޝަނުގެ ސަބަބުން ވަގުތު ކޮޅެއް ވިސްނާލަން ލިބުނީ،"
ސިނާ އަށް ދިން ސަސްޕެންޝަނާ މެދު މަޝްހޫރު ކުޅުންތެރިން ވަނީ ފާޑުކިޔައިފަ އެވެ. ޓެނިސް ލެޖެންޑަރީ ތަރި، ސްޓޭން ވަވްރިންކާ ބުނީ، މިހާރު ޓެނިހަކީ މަހާބޭހުން ސަލާމަތްވެފައި، އޮތް "ކްލީން" ސްޕޯޓެއް ކަމަށް ގަބޫލުކުރަން ދަތި ކަމަށެވެ. އަނެއްކޮޅުން، ސާބިއާގެ ތަރި، ނޮވަކް ޖޮކޮވިޗް ބުނީ، މިހާރަކަށް އައިސް ކުޅުންތެރިންނާ މެދު ގޮތް ނިންމުމުގައި، ގަޔާވާ ކުޅުންތެރިންނާ މެދު އޮންނަނީ ވަކި ގޮތެއް ކަމަށެެވެ. އަދި، އެމެރިކާގެ ލެޖެންޑަރީ ތަރި، ސެރީނާ ވިލިއަމްސް ވަނީ، އޭނާގެ މި ފަދަ މައްސަލައެއް އަތުވިނަމަ، 20 އަހަރުގެ ސަސްޕެންޝަނަކާ އެކު، އަތުގައި ހުރި ހުރިހާ ތަށްޓެއް އަތުލާނެ ކަމަށެވެ.
މަޝްހޫރު ކުޅުންތެރިންގެ މި ވާހަކަތަކާ ބެހޭގޮތުން ސުވާލުކުރުމުން ސިނާ ބުނެފައިވަނީ، ކޮންމެ މީހެއްގެ ވެސް އަމިއްލަ ހިޔާލުތަކާއި ވިސްނުން ހުންނާނެ ކަމަށެވެ. އަދި، އެހެން އެ ވިސްނުމުގައި މީހުން ފާޅުކުރާ ޝުއޫރުތަކަށް ޖަވާބުދީ ނޫނީ ރައްދުދީ ހެދުމަކީ އެންމެ ރަނގަޅު ގޮތް ކަމުގައި ނުވާނެ ކަމަށް ސިނާ ވަނީ ބުނެފަ އެެވެ.
ސިނާ ބުނީ، އޭނާ އަށް ކުރިމަަތިލާން ޖެހުނު ކަންކަން އަމިއްލަ އަށް އިހުސާސްކުރެވޭ ކަމަށާއި އެހެން ކުޅުންތެރިއަކަށް އެކަން ތަޖުރިބާ ކުރަން ނުޖެހުން އެއީ އެދޭ ކަމެއް ކަމަށެވެ.
