ސުޕްރީމް ކޯޓުގެ ތިން ފަނޑިޔާރެއްގެ ސުލޫކީ މައްސަލަތަކެއް ފެންމަތިކޮށް ސަސްޕެންޑު ކުރި މައްސަލައިގައި ހިއުމަން ރައިޓްސް ކޮމިޝަން އޮފް ދަ މޯލްޑިވްސް (އެޗްއާރްސީއެމް) ގެ ރައީސް މަރިޔަމް މުނާ އެއްވެސް އެއްޗެއް ބުނަން ދެކޮޅު ހަދައިފި އެވެ.
އަދަދު އިން އިއްޔެ އާއި މިއަދު މުނާއަށް ތަކުރާރުކޮށް ގުޅައި މެސެޖު ކުރުމުން ވެސް، ސުޕްރީމް ކޯޓުގެ ފަނޑިޔާރުން ސަސްޕެންޑުކުރި މައްސަލައާ ގުޅިގެން އެއްވެސް އެއްޗެއް ވިދާޅެއް ނުވި އެވެ. އެޗްއާރްސީއެމްގެ މީޑިއާ އޮފިޝަލް އަލީ ޒާޖިލް ޝަހީދުއާ ވެސް އެކަމާ ގުޅިގެން ސުވާލު ކުރުމުން މިހާތަނަށް އެއްވެސް އެއްޗެއް ބުނެފައެއް ނުވެ އެވެ.
އެޗްއާރްސީއެމްގައި މި ވަގުތު ތިއްބެވީ ރައީސް މަރިޔަމް މުނާ އާއި ނައިބު ރައީސް މުއުމިނާ ވަހީދާއި މެންބަރު އައިމިނަތު ޝިފާއަތު އާއި މެންބަރު ސަމާއު އަހުމަދު ނަޖީބު އަދި މެންބަރު އިސްމާއިލް ހަބީބް އަބްދުއްރަހީމް އެވެ.
ސުޕްރީމް ކޯޓުގެ ފަނޑިޔާރު ހުސްނުއްސުއޫދާއި އަޒްމިރާލްދާ ޒާހިރާއި މަހާޒް އަލީ ޒާހިރު ޖުޑީޝަލް ސާވިސް ކޮމިޝަނުން ސަސްޕެންޑު ކުރީ ފެބްރުއަރީ 26، ގަ އެވެ. ފަނޑިޔާރުން ސަސްޕެންޑު ކުރިއިރު ސިޔާސީ ޕާޓީތަކަށް ރައްޔިތުންގެ މަޖިލީހުގެ މެންބަރުންގެ ގޮނޑި ގެއްލުވައިލެވޭ މައްސަލައިގައި ހިންގާ ޝަރީއަތުގެ އަޑުއެހުމެއް ފަށަން އޮތީ ކުޑަތަންވެފަ އެވެ.
ސުޕްރީމް ކޯޓުގައި ކުރިއަށް ދަނިކޮށް އެ ކޯޓުގެ ފަނޑިޔާރުން ސަސްޕެންޑުކުރުމުން، ސަރުކާރުން ފަނޑިޔާރުގެއަށް ނުފޫޒު ފޯރުވާ ކަމަށް ބުނެ ރާއްޖޭގެ ވަރަށް ގިނަ ވަކީލުންނާއި ގާނޫނީ ދާއިރާގެ ބޭފުޅުން ވަނީ ކަންބޮޑުވުން ފާޅުކުރި އެވެ.
ފަނޑިޔާރުންނާއި ވަކީލުންގެ މިނިވަންކަން ކަށަވަރު ކުރާ އދ. ގެ ހާއްސަ ރެޕަޓުއާއަށް ވެސް ސުޕްރީމް ކޯޓުގެ ފަނޑިޔާރުން ސަސްޕެންޑުކުރި މައްސަލަ ވަނީ ހުށަހަޅައިފަ އެވެ.
އެ ފަނޑިޔާރުން ސަސްޕެންޑުކުރި މައްސަލައިގައި އެޗްއާރްސީއެމް އިން އެއްޗެއް ނުބުނި ނަމަވެސް، އިދިކޮޅު އެމްޑީޕީން ކުރި މުޒާހަރާއެއްގައި ރައީސްގެ ދަރިކަލެއްގެ ވާހަކަ ދެއްކި ކަމަށް ބުނެ އެކަން ކުށްވެރިކޮށް ކޮމިޝަނުން ވަނީ މިފަހުން ބަޔާނެއް ނެރަފަ އެވެ.
ފަނޑިޔާރުން ސަސްޕެންޑު ކުރީ، ސުޕްރީމް ކޯޓުގެ ދެ ފަނޑިޔާރަކު މަގާމުން ވަކި ކުރަން މަޖުބޫރުވާ ގޮތަށް ރައްޔިތުންގެ މަޖިލީހުން ގައިރު ގާނޫނީ ބިލެއް ފާސް ކުރި ދުވަހު، ބިލު ފާސް ކުރިތާ ކުޑަ ވަގުތުކޮޅެއް ފަހުންނެވެ. ނަމަވެސް އެ ބިލު ގާނޫނުއަސާސީއާ ހިލާފު ކަމަށް ބުނެ އަނބުރާ ރައްޔިތުންގެ މަޖިލީހަށް މިހާރު ވަނީ ފޮނުވާލައިފަ އެވެ.
ފަނޑިޔާރު ސުއޫދު ސަސްޕެންޑު ކުރީ މީގެ ދެ އަހަރު ކުރިން ހިނގި ކަމެއް އަލުން ނެގުމަށްފަހެވެ. އެއީ މަސްތުވާތަކެތީގެ މައްސަލައެއްގައި ހިމެނޭ މުހިންމު ލިޔެކިޔުންތަކެއް ސުޕްރީމް ކޯޓަށް ނުފޮނުވައިގެން ހައި ކޯޓުގެ ކުރީގެ ރަޖިސްޓްރާ ހާޒިރުކޮށް ޖަވާބުދާރީ ކުރުވި މައްސަލައެއްގަ އެވެ.
ސަސްޕެންޑު ކުރި ފަހުން މާޗް 4، ގައި ފަނޑިޔާރު ސުއޫދު ވަނީ އިސްތިއުފާ ދެއްވައިފަ އެވެ. ސުއޫދު ވިދާޅުވީ އިސްތިއުފާ ދެއްވަނީ، ރައީސް މުހައްމަދު މުއިއްޒާއި ބަންޑާރަނައިބު އަހުމަދު އުޝާމް ފަނޑިޔާރުންނަށް ބިރު ދައްކަވާތީ އެކަމާ އިހުތިޖާޖު ކުރެއްވުމުގެ ގޮތުން ކަމަށެވެ.
ފަނޑިޔާރު އަޒްމިރާލްދާ އާއި މަހާޒް ސަސްޕެންޑު ކުރީ ކްރިމިނަލް ކޯޓަށް ނުފޫޒު ފޯރުވަން އުޅުނު ކަމަށް ބުނެ އެވެ. އެކަމަކު، ހައި ކޯޓުގެ ރަޖިސްޓްރާ ހާޒިރު ކުރުވި ތަނުގައި ހުންނެވުން އެއީ މައްސަލައަކަށް ހަދައި މަހާޒް އާއި އަޒްމިރާލްދާގެ އިތުރު މައްސަލައެއް އަނެއްކާ އަންނަނީ ބަލަމުންނެވެ.
ފަނޑިޔާރު އަޒްމިރާލްދާގެ ދިފާއުގައި އޭނާގެ ގާނޫނީ ވަކީލުންގެ ޓީމުން ނޫސް ބަޔާން ނެރޭތީ އެ މައްސަލަ ބަލަން ވެސް ޖޭއެސްސީއިން މިހާރު ވަނީ ނިންމައިފަ އެވެ.
ސަރުކާރުން ޖުޑިޝަރީއަށް ނުފޫޒު ފޯރުވާތީ ސުއޫދު އަދި ފަނޑިޔާރު އަޒްމިރާލްދާގެ ފަރާތުން ވަނީ އެ މައްސަލަ އދ. ގެ ކަމާ ބެހޭ ބޮޑީތަކަށް ހުށަހަޅައިފަ އެވެ. އަދި އެ މައްސަލަ ވަނީ ބައިނަލްއަގްވާމީ މާލީ ބައެއް އިދާރާތަކަށް ވެސް ހުށަހަޅައިފަ އެވެ.
