ޓެހްރާން، އިރާން (މާޗު 31) - ރާއްޖޭގެ ދެކުނުން އޮންނަ ޗާގޯސް ޖަޒީރާގައި ހިމެނޭ ޑިއެގޯ ގާސިއާއަށް ހަމަލާ ދީފާނެ ކަމުގެ އިންޒާރު އިރާނުން ދީފި އެވެ.
އީރާނުން މިފަދަ އިންޒާރެއް ދީފައިވަނީ އެ ގައުމުގެ ނިއުކްލިއާ ހަތިޔާރު އުފެއްދުމުގެ މަޝްރޫއު ހުއްޓާލުމަށް އެމެރިކާއިން ހުށަހަޅާފައިވާ އެއްބަސްވުމަށް ތަބާނުވެއްޖެނަމަ އިރާނަށް ހަމަލާދޭނެ ކަމުގެ އިންޒާރު އެމެރިކާގެ ރައީސް ޑޮނަލްޑު ޓްރަމް ދެއްވުމާ ގުޅިގެންނެވެ.
ޑިއެގޯ ގާސިއާ އަކީ ޗާގޯސް ޖަޒީރާގެ އެންމެ ބޮޑު ރަށެވެ. އެ ރަށުގެ އެމެރިކާ އަދި އިނގިރޭސިވިލާތުން ގުޅިގެން ހިންގާ އަސްކަރީ މަރުކަޒެއް ހުރެ އެވެ.
އިނގިރޭސިވިލާތުގެ ދަ ޓެލެގްރާފުން ރިޕޯޓުކޮށްފައިވާ ގޮތުގައި އެމެރިކާގެ ހަމަލާގެ ރައްދުގެ ގޮތުގައި އީރާނުން ޑިއެގޯ ގާސިއާގައި ހުންނަ އަސްކަރީ މަރުކަޒަށް ހަމަލާ ދީފާނެ ކަމަށް އެ ގައުމުގެ އަސްކަރިއްޔާގެ އޮފިޝަލަކު އެ ނޫހަށް ކަށަވަރުކޮށްދީފައިވެ އެވެ.
"ރައްދު ހަމަލާގެ ވަގުތު އައިސް ޖެހުމުން އަހަރުމެން ނުބަލާނަން އެއީ އެމެރިކާ، އިނގިރޭސިވިލާތް، ނުވަތަ ތުރުކީގެ ސިފައިންނެއްތޯއެއް. އެމެރިކާއިން ބޭނުންކުރާ އަސްކަރީ މަރުކަޒެއް ނަމަ އެ ތަނަކަށް ހަމަލާ ދޭނަން،" ޓެލެގްރާފާ ވާހަކަދެ އްކި އީރާނުގެ އޮފިޝަލު ބުނި ކަމަށް އެ ނޫހުން ރިޕޯޓުކޮށްފައިވެ އެވެ.
އެމެރިކާއިން ހަމަލާދީފިނަމަ ބެލިސްޓިކް މިސައިލްތަކާއި ޑްރޯންތައް ބޭނުންކޮށްގެން ޑިއެގޯ ގާސިއާއަށް ހަމަލާ ދޭން ނިންމާފައިވާކަން އިރާނުގެ ސަރުކާރުން ހިންގާ އެ ގައުމުގެ ސްޓޭޓް މީޑިއާއިންވެސް ވަނީ ކަށަވަރުކޮށްދީފަ އެވެ.
އީރާނާ ޑިއެގޯ ގާސިއާއާ ދެމެދު 2،390 މޭލުގެ ދުރުމިނެއް ހުރެ އެވެ. އިރާނުގެ ދައުލަތުގެ މީޑިއާއިން ބުނާ ގޮތުގައި އެ ގައުމުގެ އަސްކަރިއްޔާއިން ބޭނުންކުރާ ހޮރަމްޝަހްރު މިސައިލް އަދި ޝަހީދު-136ބީ ޑްރޯން ބޭނުންކޮށްގެން ޑިއެގޯ ގާސިއާއަށް ހަމަލާ ދެވޭނެ އެވެ. ޝަހީދު ޑްރޯންގެ ރޭންޖަކީ 2،485 މޭލެވެ.
ޓެހްރާނުން ގަބޫލުކުރާ ގޮތުގައި އެ ގައުމަށް ހަމަލާދޭން އެމެރިކާއިން ބޭނުންކުރާނީ ޑިއެގޯ ގާސިއާގައި ހުންނަ މަރުކަޒެވެ. މިކަމަށް ބޭނުންކުރާނެ ކަމަށް ބެލެވޭ ބީ-2 ސްޕްރިޓް މަރުކާގެ އަސްކަރީ ވައިގެ އުޅަނދުތަކެއް މިދިޔަ ހަފުތާގެ ތެރޭ ޑިއެގޯ ގާސިއާއަށް އައިސްފައިވާ ކަމަށްވެސް ޓެލެގްރާފުން ރިޕޯޓުކޮށްފައިވެ އެވެ.
ޑިއެގޯ ގާސިއާގައި އެމެރިކާ އަދި އިނގިރޭސިވިލާތުގެ ޖުމްލަ 4،000 އެއްހާ ސިފައިން މަރުކަޒުވެގެން ތިބޭ ކަމަށް ރިޕޯޓުތައް ބުނެ އެވެ. މި މަރުކަޒުގެ އިތުރުން އޭޝިއާ އަދި މެދުއިރުމަތީގައި ހުރި އެމެރިކާގެ އެހެން އަސްކަރީ މަރުކަޒުތަކަށްވެސް އީރާނުން ބަދަލު ހަމަލާއެއް ދީފާނެ ކަމަށް އެ ގައުމުން ބުނެފައިވެ އެވެ.
ޗާގޯސް ޖަޒީރާއަކީ ރާއްޖޭގެ މަސްލަހަތުވެސް އޮންނަ ތަނެކެވެ. އެގޮތުން ސިޔާދަތީ ބާރު ރާއްޖެއަށް ލިބުން މާ ހައްގު ކަމަށް ވިދާޅުވެ، އިނގިރޭސިވިލާތުގެ ސަރުކާރަށް ވަނީ މި ފަހުން ސިޓީއެއް ފޮނުވާފަ އެވެ. އެކަން ކުރެއްވިކަން ރައީސް ޑރ. މުހައްމަދު މުއިއްޒު އިއުލާނުކުރެއްވީ މިދިޔަ އަހަރުގެ ޖުމްހުރީ ދުވަހުގެ ޖަލްސާގަ އެވެ.
އެފަދަ ސިޓީއެއް ރާއްޖެއިން ފޮނުވީ ޗާގޯސް ޖަޒީރާ ނުވަތަ ފޯޅަވަހީގެ ސިޔާދަތީ ބާރު މޮރިޝަސްއަށް ދޫކޮށްލަން އިނގިރޭސިވިލާތުން ނިންމައި، އެއްބަސްވުމެއް އެކުލަވާލިކަން އިއުލާނުކުރުމާ ގުޅިގެންނެވެ.
އިނގިރޭސިވިލާތުން ޗާގޯސްގެ ސިޔާދަތީ ބާރު މޮރިޝަސްއަށް ދޭން އެއްބަސްވީ އދ. އިން އެދެމުންދާތާ އެތައް އަހަރެއް ފަހުންނެވެ. އެގޮތަށް އެކަން ކުރުމަށް އަންގާ އިންޓަނޭޝަނަލް ކޯޓު އޮފް ޖަސްޓިސް އިން ވަނީ ހުކުމެއްވެސް ކޮށްފަ އެވެ.
މި އެއްބަސްވުމުގެ ދަށުން މޮރިޝަސް އަށް ޗާގޯސްގެ ސިޔާދަތީ ބާރު ދޫކޮށްލި ނަމަވެސް އެ ގައުމަށް ކުލި ދައްކާ ގޮތަށް ޑިއެގޯ ގާސިއާގައި ހުންނަ އަސްކަރީ މަރުކަޒު 99 އަހަރަށް ކުއްޔަށް ދޭން ޖެހޭނެ އެވެ. އެއްބަސްވުމަށް އެމެރިކާގެ އައު ސަރުކާރުން އެއްބާރުލުން ލިބޭނެކަމާމެދު ސުވާލު އުފެދިފައިވަނިކޮށް ޓްރަމްޕުގެ އެއްބާރުލުން ލިބޭނެ ކަމަށް މޮރިޝަސްގެ ބޮޑުވަޒީރު ނަވިން ރާމްގޫލާމް މި ފަހުން ވަނީ ވިދާޅުވެފަ އެެވެ.
ޑިއެގޯ ގާސިއާ އާއި އިރާނާ ދެމެދު ހަމަލާ ބަދަލުކުރަން ފަށައިފިނަމަ އެކަމުގެ ކޮންމެވެސް އަސަރެއް ރާއްޖެއަށް ކުރާނެ ކަމަށް ބެލެވެ އެވެ. ނަމަވެސް ދިވެހި ސަރުކާރުން މިކަމާ ގުޅިގެން އަދި ބަހެއް ނުބުނެ އެވެ.
