ގައުމީ ސަލާމަތާ ގުޅޭ މަޝްރޫއުތަކަށް އިންވެސްޓްކުރާ ބަޔަކަށް ކްރޮސް ސަބްސިޑީގެ ދަށުން އިންވެސްޓްމަންޓުގެ މުގާބިލުގައި ދޭން ނިންމާފައިވާ މާލެ އަތޮޅު ހިތްމިޔަ ފަޅުގެ އަސްލު އަގަކީ 38.6 މިލިއަން ޑޮލަރުކަން އެނގިއްޖެ އެވެ.
އިތުބާރުހުރި މަސްދަރަކުން އަދަދު ނޫހަށް ކަށަވަރުކޮށްދީފައިވާ ގޮތުގައި ޓޫރިޒަމް މިނިސްޓްރީން ކްރޮސް ސަބްސިޑީގެ ގޮތުގައި ފަޅުތަކާއި ބިންތައް ކުއްޔަށް ދިނުމަށް އެކުލަވާލާފައިވާ އުސޫލުގެ ދަށުން ހިސާބުކުރުމުން ހިތްމިޔަ ފަޅަށް ޖެހޭ އަންދާސީ އަގަކީ 38,650,000 ޑޮލަރެވެ.
މިއީ މާލެ އަތޮޅުގެ ފަޅުތައް ކުއްޔަށް ދިނުމުގައި ހެކްޓަރަކަށް ޖެހޭ އަގުގެ އިތުރުން ލޮކޭޝަން ޕްރިމިއަމްގެ ގޮތުގައި ނަގާ ފައިސާ އެއްކުރުމުން ޖެހޭނެ ކަމަށް ލަފާކުރާ އަދަދެވެ.
ހިތްމިޔަ ފަޅުގެ އަސްލު އަގު 38 މިލިއަން ޑޮލަރުގައި ހިސާބުކުރެވޭއިރު, މައުލޫމާތު ލިބޭ ގޮތުގައި ސަރުކާރުން ވަނީ ފަޅުގެ އަސްލު އަގަށް ވުރެ ކުޑަކޮށް މި ފަޅު ބަޔަކަށް ދޭން ނިންމާފަ އެވެ. އެއީ ހުކުރު ދުވަހު ރައީސް ނެރުއްވި ގަރާރުގެ ދަށުން 15 މިލިއަން ޑޮލަރު އިންވެސްޓުކުރާ ބަޔަކަށެވެ.
ކްރޮސް ސަބްސިޑީ އުސޫލު އޮންނަ ގޮތުން ސީދާ ފައިސާ އިންވެސްޓުކުރާކަށް ވެސް ނުޖެހެ އެވެ. ސަރުކާރުން ބުނާ މަޝްރޫއުގެ އަމަލީ މަސައްކަތް ކުރާ ގޮތަށް ވެސް މި އުސޫލުގެ ދަށުން ފަޅުތަކާއި ރަށްތައް ދޫކުރެވެ އެވެ.
އެހެންކަމުން މި މަޝްރޫއުގެ ސަބަބުން ދައުލަތަށް ލިބޭނެ ގެއްލުމެއް ހިސާބުކުރެވޭނީ މި މަޝްރޫއަށް އިންވެސްޓްކުރާ އަދަދެއް ސާފުވުމުންނެވެ. ނަމަވެސް ގައުމީ ސަލަމަތާ ގުޅޭ މަޝްރޫއެއްކަމުން މިކަމަށް އިންވެސްޓްކުރާ ފައިސާގެ އެއްވެސް ތަފުސީލެއް ސަރުކާރުން ހާމަކުރާނެ ކަމަކަށް ނުބެލެވެ އެވެ.
ގައުމީ ސަލާމަތާ ގުޅޭ މަޝްރޫއުތަކެއް ހިންގަން ބޮޑު އިންވެސްޓްމަންޓެއް ހޯދަން ސަރުކާރުން އިއުލާނުކޮށްފައި މިވަނީ ދިވެހި އަސްކަރިއްޔާއަށް މިސައިލްތަކެއް ގަންނަން އުޅޭކަމުގެ އަޑުތަކެއް ފެތެރިފައިވަނިކޮށެވެ.
ސޯޝަލް މީޑިއާގައި ދައުރުވަމުންދާ ޕޯސްޓުތަކުގައި ބުނާ ގޮތުން ދިވެހި ސަރުކާރުން ސާފޭސް-ޓު-އެއާ މިސައިލްތަކަކާއި އެ ތަކެތި ހަރުކުރެވޭ ފެންވަރުގެ މަނަވަރެއް ގަންނަނީ ތުރުކީގެ އަސްކަރީ ކުންފުންޏެއް މެދުވެރިކޮށެވެ.
މި ސަރުކާރުން ޑްރޯންތައް ގަތީ ވެސް ތުރުކީގެ ކުންފުންޏަކުންނެވެ. އެ ޑްރޯންތައް ގަންނަން 37 މިލިއަން ޑޮލަރު ހަރަދުކުރިކަން އެކި މަސްދަރުތަކުން ޔަގީންވެފައިވީ ނަމަވެސް ސަރުކާރުން ވަނީ ޑްރޯންތައް ގަންނަން ކުރި ހަރަދު ހާމަކުރަން ދެކޮޅުހަދާފަ އެވެ.
