ފެނަކައިގެ ޑެޕިއުޓީ މެނޭޖިން ޑިރެކްޓަރު، މުހައްމަދު އަބްދުލްކަރީމް (ރުކުމާ) ބީއެމްއެލަށް ނުދައްކާ އޮތް ދަރަންޏެއް، މަހަކު 110 އެމެރިކާ ޑޮލަރަށްވުރެ މަދު ނޫން އަދަދެއްގެ މަގުން ދައްކައި ހަލާސްކުރަން ސިވިލް ކޯޓުން ހުކުމްކޮށްފި އެވެ.
ސިވިލް ކޯޓުން ކުރި ހުކުމުގައި ބުނެފައި ވަނީ ފެބްރުއަރީ 11، 2025 ގެ ނިޔަލަށް ރުކުމާ މުހައްމަދު ބީއެމްއެލްއަށް ދައްކަންޖެހި ނުދައްކާ 4،542 ޑޮލަރު އެބަހުރި ކަމަށެވެ. އެހެންކަމުން އެ ފައިސާ އާއެކު އިތުރަށް އަރަމުންދާ އިންޓްރެސްޓާއި ޖޫރިމަނާ ފެބްރުއަރީ 12، އިން ފެށިގެން ކޮންމެ މަހަކު 110 އެމެރިކާ ޑޮލަރަށްވުރެ މަދު ނުވާ އަދަދަކުން ފައިސާ ދައްކަމުން ގޮސް ހަލާސް ކުރުމަށް ސިވިލް ކޯޓުގެ ހުކުމުގައި އަންގާފައިވެ އެވެ.
އެ ދަރަންޏަކީ ރުކުމާ މުހައްމަދު އަބްދުލްކަރީމްއަށް ބީއެމްއެލުން ދޫކޮށްފައިވާ ވިސާ ގޯލްޑް ކްރެޑިޓް ކާޑަށް މާޗު 31، 2021 ގެ ނިޔަލަށް ދައްކަންޖެހި ނުދައްކާ އޮތް 4،088 ޑޮލަރާއި އެ ފައިސާ ނުދައްކާ އޮތުމުން އަރާފައިވާ އިންޓްރެސްޓާއި ޖޫރިމަނާ އެވެ.
މިއީ އެ ދަރަނި ދައްކަން ރުކުމާ މުހައްމަދު އަބްދުލްކަރީމްގެ މައްޗަށް ސިވިލް ކޯޓުން ހުކުމްކުރި ދެވަނަ ފަހަރެވެ. މީގެ ކުރިން 2021 ވަނަ އަހަރު ވެސް އެހައިތަނަށް ދައްކަން ހުރި ފައިސާ އަށް މަސްދުވަހަށް ބަހާލައިގެން ދައްކަން އޭޕްރިލް 20، 2021 ގައި ސިވިލް ކޯޓުން ހުކުމްކުރި އެވެ. ނަމަވެސް އަލުން އެ މައްސަލަ ބީއެމްއެލުން ސިވިލް ކޯޓަށް ހުށަހެޅީ އެ ހުކުމާ އެއްގޮތަށް ރުކުމާ މުހައްމަދު އަބްދުލްކަރީމް ފައިސާ ދައްކާފައި ނުވާތީ އެވެ.
ސިވިލް ކޯޓުގައި ބީއެމްއެލުން ބުނެފައި ވަނީ އެ ބޭންކަށް ރުކުމާ އަބްދުލްކަރީމް ދައްކަން އޮތް ދަރަނި ދެއްކުމުގެ އެއްބަސްވުމެއް ވެސް މިދިޔަ އަހަރުގެ އޮކްޓޫބަރު 15، ގައި ރުކުމާ މުހައްމަދު އަބްދުލްކަރީމް އާއި ބީއެމްއެލްއާ ދެމެދު އެކުލަވައިލި ކަމަށެވެ. ނަމަވެސް އެ އެއްބަސްވުމާ އެއްގޮތަށް އޭނާ ފައިސާ ދައްކާފައި ނުވާކަން، ސިވިލް ކޯޓުން ފާހަގަކޮށްފައިވެ އެވެ.
ރުކުމާ މުހައްމަދު އަބްދުލްކަރީމް ފެނަކައިގެ ޑީއެމްޑީއަކަށް އައްޔަނު ކުރީ މިދިޔަ އަހަރުގެ އޯގަސްޓު 24، ގަ އެވެ.
