ރައްޔިތުންގެ މަޖިލީހުގެ މެންބަރަކު މަޖިލީހަށް އިންތިހާބުވާއިރު ނިސްބަތްވާ ސިޔާސީ ޕާޓީ ނޫން އެހެން ޕާޓީއަކަށް ބަދަލުވެއްޖެ ނަމަ ނުވަތަ ސިޔާސީ ޕާޓީއަކުން މަޖިލިސް މެންބަރަކު ވަކިކޮށްފި ނަމަ، މަޖިލީހުގެ މެންބަރުކަން ގެއްލޭ ގޮތަށް ގާނޫނުއަސާސީއަށް ގެނައި އިސްލާހު ބާތިލު ކުރަން ސުޕްރީމް ކޯޓަށް ހުށަހެޅި މައްސަލަ ބެލުމުގެ އިހުތިސާސް އެ ކޯޓަށް ލިބިގެން ނުވާ ކަމަށް ކަނޑައަޅައިދޭން އެޓާނީ ޖެނަރަލްގެ އޮފީހުން އެދިއްޖެ އެވެ.
މި މައްސަލައިގެ އަޑުއެހުންތައް މިއަދު ސުޕްރީމް ކޯޓުގައި ފެށިއިރު ދައުލަތުން ވަނީ އިޖުރާއީ ގޮތުން މި މައްސަލަ ބެލުމުގެ އިހުތިސާސް ލިބިގެން ނުވާ ކަމަށް ބުނެފަ އެވެ. އެގޮތުން، ގާނޫނުއަސާސީއަށް ގެނައި އިސްލާހު މާނަކުރަން ޖެހޭ ހާލަތެއް މެދުވެރި ވެފައި ނުވާ ކަމަށް ދައުލަތުގެ އިޖުރާއީ އިއުތިރާޒު ނުކުތާއެއްގައި ފާހަގަކޮށްފައިވެ އެވެ.
އެ ބަދަލާއެކު ދުސްތޫރީ ހުސްކަމެއް ކުރިމަތިވެދާނެ ހާލަތެއް އައުމުގެ ފުރުސަތު އޮތް ކަމަށާއި އެއީ ސަރުކާރު ހިންގާ ޕާޓީއަށް ނިސްބަތްވާ ހުރިހާ މެންބަރުން ވަކިކޮށްފި ހާލަތެއްގައި މަޖިލީހުގެ ޖަލްސާތައް ބާއްވައި ރައްޔިތުންގެ މަޖިލީހުން ކަންކަން ނިންމުމަށް ހުރަސް އެޅުމުގެ ފުރުސަތު އޮތް ކަމަށް ދައުވާ އުފުލާ ފަރާތުން ފާހަގަކޮށްފައިވެ އެވެ.
ރައްޔިތުންގެ މަޖިލީހުގެ މެންބަރުންގެ، މެންބަރުކަން ގެއްލުވައިލުމުގެ ބާރު ސުޕްރީމް ކޯޓަށް ހުށަހެޅީ މަޖިލީހުގެ ކުރީގެ މެންބަރު، އަލީ ހުސެއިން އެވެ. އޭނާގެ ގާނޫނީ ވަކީލެއްގެ ގޮތުގައި ކޯޓުގައި ވަކާލާތު ކުރައްވަނީ މަހްފޫޒު ސައީދު އެވެ.
މިއީ ދުސްތޫރީ މައްސަލައެއް ކަމަށާއި ރައްޔިތުންގެ މަޖިލީހުން ފާސްކުރާ ގާނޫނެއް ނުވަތަ ގާނޫނެއްގެ ބައެއް ވިޔަސް ގާނޫނުއަސާސީއާ ހިލާފުވޭތޯ ބަލައި ގޮތް ނިންމުމުގެ ބާރު ސުޕްރީމް ކޯޓަށް ލިބިގެންވާއިރު އެއީ މި މައްސަލަ އެ ކޯޓަށް ބެލޭނެ ސަބަބެއްގެ ގޮތުގައި އަލީ ހުސައިންގެ ފަރާތުން ފާހަގަކޮށްފައިވެ އެވެ.
"ދުސްތޫރީ މައްސަލަތަކުގައި ގާނޫނުގެ ވެރިކަން ނެގެހެއްޓުމަށާއި، ގާނޫނުއަސާސީއާ ހިލާފު އަމަލުތައް ހުއްޓުވުމަށް، ވީހާވެސް ފުޅާ ގޮތެއްގައި މަގުފަހިވެފައި އޮތުމަކީ މުހިންމު ކަމެއް ކަމަށް ވުމުން، ގާނޫނުއަސާސީ އެ މީހެއްގެ މައްޗަށް ހިނގާ ކޮންމެ މީހަކަށްމެ، ކަމުގެ އިހުތިސާސު ލިބިގެންވާ ކޯޓަކަށް ދުސްތޫރީ މައްސަލަ ހުށަހެޅުމުގެ ހައްގު ލިބިގެންވެ،" ދައުލަތުގެ އިޖުރާއީ އިއުތިރާޒުގެ ނުކުތާތަކަށް މައްސަލަ ހުށަހެޅި ފަރާތުން ދިން ޖަވާބުގައި ބުނެފައިވެ އެވެ.
އެ މައްސަލައިގައި ބުނެފައި ވަނީ ގާނޫނުއަސާސީގެ 73 ވަނަ މާއްދާއަށް ގެނައި ބަދަލު، ގާނޫނުއަސާސީގެ ހަތަރު ވަނަ މާއްދާގެ ދަށުން ދިވެހި ދައުލަތުގެ އެންމެހައި ބާރުތައް ދިވެހިރައްޔިތުންގެ ކިބައިގައި ދެމި އޮތުމުގެ އަސާސާއި، ގާނޫނުއަސާސީއާ އެއްގޮތްވާ ގޮތުގެ މަތީން ދިވެހި ދައުލަތުގެއެންމެހައި ބާރުތައް ހިންގަންވާނޭކަމަށް ގާނޫނުއަސާސީގެ އަށް ވަނަ މާއްދާގައި އޮންނަ އަސާސާ ހިލާފު ކަމަށެވެ.
ގާނޫނު ހެދުމުގެ އެންމެހައި ބާރެއް ލިބިގެންވާ ވަކި މިނިވަން ބާރެއްގެ ގޮތުގައި ރައްޔިތުންގެ މަޖިލިސް ދެމި އޮތުމަށް ގާނޫނުއަސާސީގެ ފަސް ވަނަ މާއްދާއިން ކަނޑައަޅާފައި އޮތް ދުސްތޫރީ ހަމައާ ވެސް އެ އިސްލާހު ހިލާފު ކަމަށް އަލީ ހުސެއިން ހުށަހެޅި މައްސަލައިގައި ބުނެފައިވެ އެވެ.
އޭގެއިތުރުން އަލީ ހުސެއިން ހުށަހެޅި މައްސަލައިގައި ބުނެފައި ވަނީ ގާނޫނުއަސާސީއަށް ގެނައި އިސްލާހު ގާނޫނުއަސާސީގެ 26 ވަނަ މާއްދާ އާއި، ގާނޫނުއަސާސީގެ 75 ވަނަ މާއްދާ އާއި، 90 ވަނަ މާއްދާއާ ވެސް ފުށުއަރާ ކަމަށާއި އެ އިސްލާހުގެ ސަބަބުން ތިން ބާރު ވަކިވެފައިވާ ރިޔާސީ ނިޒާމު ގަޑުބަޑުވެގެންދާނެ ކަމަށެވެ.
