ބަޖެޓު ނެތް ކަމަށް ބުނެ އެމަނިކުފާނުގެ މޭޔަރު ކަމުގައި ތަރައްގީ ނުކުރި ޕާކުތައް ވިރާނާވާތީ ރައީސް ޑރ. މުހައްމަދު މުއިއްޒު މިއަދު ހިތާމަފާޅު ކުރައްވައިފި އެވެ.
ރައީސް މުއިއްޒު "އެކްސް" ގައި ކުރެއްވި ޕޯސްޓެއްގައި ވިދާޅުވީ ރަސްފަންނާއި ސަލްޓަންޕާކު ވީރާނާވަމުންދާތީ، އެ ދެ ތަނުގެ ރީތިކަމާއި އާރޯކަން އަނބުރާ ގެނެސްދީ އަދި ކުރިއަށްވުރެ ފުރިހަމަ ކޮށްދިނުމަށް ސަރުކާރުން މަސައްކަތްތަކެއް ކުރާނެ ކަމަށެވެ.
"ރަސްފަންނާއި ސަލްޓަންޕާކް ގެ ހާލަތު ފެނިފައި ހިތާމަކުރަން. ދެ ތަންވެސް ދަނީ ވީރާނާވަމުން. މި ދެތަނަކީ ވެސް ތޮށްޖެހިފައިވާ މާލޭގައި، ރައްޔިތުންނަށް ނުހަނު ހިތްހަމަޖެހުމާއި އުފާ ލިއްބައިދޭ ދެތަން،" ރައީސް ވިދާޅުވި އެވެ.
ރައީސް މުއިއްޒުގެ މޭޔަރުގައި ކަމުގައި އެމަނިކުފާނު ވިދާޅުވީ ޕާކުތައް ވީރާނާވީ ކުރިން އޮތް ސިޓީ ކައުންސިލްގެ އިހުމާލުގެ ސަބަބުންނެވެ. އަދި ޕާކުތައް މަރާމާތުކޮށް ބަލަހައްޓާނެ ބަޖެޓެއް ނެތުމުން ޕްރައިވެޓް ޕާޓްނާޝިޕް އުސޫލަށް ދިއުމަށް ވިސްނާ ކަމަށް އެމަނިކުފާނު އޭރު ވިދާޅުވިއިރު، އެ މަސައްކަތް ބަޔަކާ ހަވާލު ކުރެވި ޕާކުތައް ބެލެހެއްޓިފައެއް ނުވެ އެވެ.
"މި ބަލަނީ އެއްގޮތުން ނުވިއްޔާ އަނެއް ގޮތުން ވެސް އަޅުގަނޑުމެންގެ ކެޕޭސިޓީގައި މި ތަންތަން ހެދޭނެ ގޮތްތައް ހޯދަން،" އެމަނިކުފާނުގެ މޭޔަރު ކަމުގައި ވިދާޅުވި އެވެ.
ޕާކުތައް ބަލަހައްޓާނެ ބަޖެޓެއް ނެތް ކަމަށް ރައީސް މުއިއްޒު މޭޔަރު ކަމުގައި ވިދާޅުވިއިރު، މާލެ ސިޓީން ބޮޑެތި ހަރަދުކޮށްގެން އޭރު ސްޓާފް ނައިޓެއް ބޭއްވުމުން އާންމުންގެ ފާޑުކިޔުން އަމާޒުވި އެވެ.
ރައީސް މުއިއްޒުގެ މޭޔަރުކަމުގައި ވިދާޅުވާ ގޮތުގައި ޕާކުތައް ހަލާކުވީ ކުރިން އޮތް ސިޓީ ކައުންސިލްގެ އިހުމާލުގެ ސަބަބުންނެވެ. އެއީ 2021 ވަނަ އަހަރު ޕީޕީއެމްގެ މެޖޯރިޓީ އޮތް ސިޓީ ކައުންސިލު އިންތިހާބުވެ މަގާމާ ހަވާލުވުމާ ހަމައަށް ޕާކުތައް އެއްވެސް ވަރަކަށް ނުބެލެހެއްޓި ދިޔަ ވާހަކަ އެވެ.
"އަޅުގަނޑުމެން ސާވޭއެއް ހެދިން. [ޕާކުތައް] މަރާމާތުކުރުމަށްޓަކައި ކަންކަން ދެނެގަނެ އެކަމަށް ދާނެ ހަރަދު ބެލިން. ވަރަށް ބޮޑު ހަރަދެއް އެބަ ހިނގާ މިތަންތަން ހަދަން. ވަރަށް ބޮޑަށް ނެގްލެކްޓް ކޮށްލާފަ މި ޕާކުތައް ހުރީ އަޅުގަނޑުމެންނާ މި ދައުރުގަ ޕާކުތައް ހަވާލުވީއިރު،" ރައީސްގެ މޭޔަރުކަމުގައި ވިދާޅުވި އެވެ.
