އެމެރިކާގެ 47 ވަނަ ރައީސްގެ ގޮތުގައި ޑޮނަލްޑް ޓްރަމްޕް ވެރިކަމުގެ ހުވާކުރައްވައިފި އެވެ.
މިއީ އެމަނިކުފާނު އެ ގައުމުގެ ރައީސްކަން ކުރައްވާ ދެވަނަ ދައުރެވެ. މީގެކުރިން ޓްރަމްޕް އެމެރިކާގެ ރައީސްކަން ކުރެއްވީ 2017 އިން 2021 އަށް އެ ގައުމުގެ 45 ވަނަ ރައީސްގެ ގޮތުގަ އެވެ.
ޓްރަމްޕް ހުވާކުރެއްވުމުގެ ރަސްމިއްޔާތު އޮތީ އެމެރިކާގެ ވެރިރަށް ވޮޝިންޓަނުގައި ހުންނަ ކެޕިޓަލް ހިލްގެ އެތެރޭގަ އެވެ. އާންމުކޮށް ރައީސުން ހުވާކުރެއްވުމުގެ ރަސްމިއްޔާތު އޮންނަނީ އެ އިމާރާތުގެ ބޭރުގަ އެވެ.
ނޮވެމްބަރު 2024، ގައި ބޭއްވި އެމެރިކާގެ ރިޔާސީ އިންތިހާބު ޓްރަމްޕް ކާމިޔާބު ކުރެއްވީ 277 އިލެކްޓޯރަލް ކޮލެޖު ވޯޓާއެކު އެވެ.
ޑިމޮކްރެޓްސްގެ ކެންޑިޑޭޓު، ނިމިދިޔަ ސަރުކާރުގެ ނައިބު ރައީސް ކަމަލާ ހެރިސްއަށް ހޯދުނީ 224 އިލެކްޓޯރަލް ކޮލެޖު ވޯޓެވެ.
އެ ޕާޓީން ރިޔާސީ ކެންޑިޑޭޓުގެ ގޮތުގައި ފުރަތަމަ ނުކުންނެވީ ނިމިދިޔަ ވެރިކަމުގެ ރައީސް ޖޯ ބައިޑަން އެވެ. ނަމަވެސް ބަލިހާލަތާ ގުޅިގެން ބައިޑަން ރޭހުން އެއްފަރާތަށް ޖެހިވަޑައިގަތީ އެވެ.
މިއީ އެމެރިކާގެ ތާރީހުގައި ވެސް ޖެހިޖެހިގެން ނޫން ގޮތަކަށް އެމެރިކާގެ ވެރިކަން ކުރިން ކުރި ރައީސްއަކު ވެރިކަމަށް ހޮވުނު ދެވަނަ ފަހަރެވެ. މީގެ ކުރިން އެ ގައުމުގެ ވެރިކަން ޖެހިޖެހިގެން ނޫން ގޮތަކަށް ކޮށްފައި ވަނީ ގްރޫވް ކްލެވްލޭންޑު އެކަންޏެވެ.
