ޝަހުސުން ވައްކަން ކޮށްގެން އެތައް ރައްޔިތުންނެއް ވެރިކަން ކުރާ ޕީޕަލްސް ނެޝަނަލް ކޮންގްރެސް (ޕީއެންސީ) އަށް ވެއްދުމުން، އީ-ގަވަނަންސަށް ރައްޔިތުން ކުރި އިތުބާރު ގެއްލިފައިވާ ކަމަށް އިދިކޮޅު އެމްޑީޕީގެ ރައީސް އަބްދުﷲ ޝާހިދު ރޭ ވިދާޅުވެއްޖެ އެވެ.
މާލޭ ޕީޓްރަލް ޕާކް ކަންމަތީގައި ބޭއްވި ކަންމަތީ ޖަލްސާގައި ޝާހިދު ވިދާޅުވީ އެމްޑީޕީގެ މެންބަރުންނާއި އެއްވެސް ޕާޓީއަކަށް ނިސްބަތް ނުވާ މީހުންގެ މައުލޫމާތު ޑީއެންއާރުން ވަގަށް ނަގައިގެން ފޯމުތައް ފުރައިގެން ޕީއެންސީއަށް ވެއްދިކަން ސާބިތުވެފައިވާ ކަމަށެވެ.
ދުނިޔޭގެ ގައުމުތަކުން އީ-ގަވަނަންސް ނިޒާމާ މެދު ރައްޔިތުންގެ މެދުގައި އިތުބާރު އުފައްދަމުންދާ ކަމަށާއި ނަމަވެސް އެސްޓޯނިއާގައި ހުންނަވައި ރައީސް ޑރ. މުހައްމަދު މުއިއްޒު ވަނީ އެ ނިޒާމަށް ރައްޔިތުން ކުރަމުންދިޔަ އިތުބާރު އެކީ ކަނޑާލައްވާފައި ކަމަށް ޝާހިދު ވިދާޅުވި އެވެ.
"އީ-ގަވަނަންސަކީ ކޮބައިތޯ. އީ-ގަވަނަންސަކީ އަޅުގަނޑުމެންގެ ހުރިހާ އެންމެންގެ ހުރިހާ މައުލޫމާތެއް ކޮމްޕިއުޓަރައިޒްޑް ސިސްޓަމެއްގެ ތެރޭގައި އިންޓަނެޓް މެދުވެރިކޮށް ރައްކާ ކުރެވިފައި ހުންނަ ނިޒާމެއްގެ ތެރޭގައި ހިނގާ ނިޒާމެއް. އެ ނިޒާމާ ދޭތެރޭގައި ދުނިޔޭގެ ގައުމުތަކުން ދަނީ އިތުބާރު އުފައްދަމުން. އެސްޓޯނިއާގައި ހުންނަވައިގެން އެމަނިކުފާނު އެ ކުރެއްވި ކަމަކީ އެ ނިޒާމާ ދޭތެރޭގައި ދިވެހި ރައްޔިތުންގެ އިތުބާރު އެކީގައި ކަނޑާލެއްވީ،" އޭނާ ވިދާޅުވި އެވެ.
ދައުލަތުގެ އެކި މުއައްސާތަކުގައި ހުންނަ މައުލޫމާތު ވެރިކަން ކުރާ ޕާޓީގެ ފައިދާއަށް ނަގައި އެ ބޭނުން ކުރާ ކަމަށްވާނަމަ، ދިވެހި ރައްޔިތުންގެ މައުލޫމާތުތައް ދައުލަތުގެ މުއައްސަސާތަކުގެ ތެރޭގައި ހުންނަން އެ ރައްޔިތުން ބޭނުން ނުވާނެ ކަމަށް ޝާހިދު ވިދާޅުވި އެވެ.
"މިއަދު އަޅުގަނޑުމެންގެ ތެރެއިން ކާކުތޯ އެއްބަސްވާނީ އަޅުގަނޑުގެ، ތިޔަ ބޭފުޅުންގެ އަދި ދިވެހިރާއްޖޭގެ އެއްވެސް ރައްޔިތެއްގެ މައުލޫމާތެއް ޑީއެންއާރުގެ ތެރޭގައި ދައުލަތުގެ މުއައްސަސާތަކުގެ ތެރޭގައި ހުންނަން. ދައުލަތުގެ މުއައްސާތަކުގެ ތެރޭގައި ހުންނަ މައުލޫމާތަކީ ވަގަށް ނަގައިގެން ސަރުކާރު ހިންގާ ޕާޓީގެ ފައިދާއަށްޓަކައި ބޭނުން ކުރެވޭ އެއްޗެއް ކަމަށްވެއްޖެއްޔާ އެ އިތުބާރު އެއޮތީ ގެއްލިފައި،" އޭނާ ވިދާޅުވި އެވެ.
"އެސްޓޯނިއާގައި ހުންނަވައިގެން އެ ނަގާލެއްވީ އަޅުގަނޑުމެން ބޭނުންވާ، ދުނިޔެ ކުރިއަށްދާން ބޭނުންވާ އީ-ގަވަނަންސްގެ އިތުބާރު. ދިވެހި ރައްޔިތުންގެ އިތުބާރު. މުޅި މި ނިޒާމަށް، މުޅި ދައުލަތަށް ނަގާލެއްވީ. މި ދައްކާލަނީ އާދައިގެ ކުދިކުދި ވާހަކައެއް ނޫނޭ. މި ދައްކާލަނީ ދިވެހި ރައްޔިތެއްގެ ޝަހްސް ހަމަ ރޮލަށް ވަގަށް ނަގައިގެން ގެންގޮސް އެ ބޭނުންހާ ގޮތެއް ހަދާލެވޭތޯ."
ޝާހިދު ވިދާޅުވީ އެމްޑީޕީ އޮތީ ސަރުކާރުގެ ހުރިހާ އޮޅުވާލުންތަކެއް ރައްޔިތުންނާ ހިސާބަށް ހާމަކޮށް ގެނެސްދިނުމުގައި ސާބިތުކަމާ އެކީގައި ކަމަށވެ.
އަދި މި ސަރުކާރުގައި އުނދަގޫވާ ވަރަށް ވިއްދަމުން ގޮސް ބޮޑު ތަނުން ސަރުކާރު ބަލިކޮށްލާނެ ކަމަށް ވެސް އޭނާ ވިދާޅުވި އެވެ.
